មន្ត្រីជាន់ខ្ពស់ក្រសួងពាណិជ្ជកម្ម បានលើកឡើងថា ក្នុងរយៈពេល ២ខែ ឆ្នាំ២០២៥ ទំហំពាណិជ្ជកម្មរវាងកម្ពុជា-ចិន ជាង ២ពាន់ ៦៦២លានដុល្លារអាមេរិក កើនឡើងប្រមាណ ២១% បើធៀបនឹងរយៈពេលដូចគ្នាឆ្នាំ២០២៤។

ក្នុងពិធីដំណើរការពន្លាជាតិកម្ពុជា នៅលើថ្នាលពាណិជ្ជកម្ម តាមប្រព័ន្ធអេឡិចត្រូនិច របស់ក្រុមហ៊ុន JD.com ដែលជាក្រុមហ៊ុនពាណិជ្ជកម្មតាមប្រព័ន្ធអេឡិចត្រូនិចដ៏ធំរបស់ចិន លោកជំទាវ ខា ឡេង រដ្ឋលេខាធិការ ក្រសួងពាណិជ្ជកម្ម បានលើកឡើងថា ត្រឹមរយៈពេល ២ខែ នៃឆ្នាំ២០២៥នេះ ទំហំពាណិជ្ជកម្មរវាងកម្ពុជា និងចិន សរុបមានជាង ២ពាន់៦រយលានដុល្លារអាមេរិក ដោយក្នុងនោះ ទំហំនាំចេញពីកម្ពុជាទៅចិន គិតជាទឹកប្រាក់មានចំនួនប្រមាណជាង ២១៧ លានដុល្លារអាមេរិក ហើយទំហំនៃការនាំចូលពីចិន មកកម្ពុជា មានចំនួនជាង ២ពាន់៤រយ លានដុល្លារអាមេរិក ដែលមានការកើនឡើងប្រមាណ ២១% បើប្រៀបធៀបទៅនឹងរយៈពេលដូចគ្នាកាលពីឆ្នាំ២០២៤។

ក្នុងឱកាសនោះ មន្ត្រីជាន់ខ្ពស់ក្រសួងពាណិជ្ជកម្ម បានបន្តថា ការផ្តួចផ្តើមបង្កើតផ្ទាល់ពន្លាជាតិ និងមានគម្រោងនាំយកផលិតផលរបស់កម្ពុជា ទៅបង្ហាញនៅលើថ្នាលពាណិជ្ជកម្មតាមប្រព័ន្ធអេឡិចត្រូនិចរបស់ខ្លួន ហើយសកម្មភាពនេះនឹងជំរុញដល់សកម្មភាពពាណិជ្ជកម្មរវាងកម្ពុជា និងចិន ដំណើរការកាន់តែខ្លាំងក្លា ព្រមទាំងបង្កើនឱកាសសម្រាប់ផលិតផល កម្ពុជាអាចទទួលការបញ្ជាទិញ និងនាំចេញទៅកាន់អ្នកប្រើប្រាស់ទីផ្សារចិន និងអន្តរជាតិ។ ចំណុចនេះក៏ជាសក្ខីភាពឆ្លុះបញ្ចាំងពីទំនុកចិត្ត និងគុណភាពនៃផលិតផលខ្មែរ ជាពិសេសជាការចូលរួមថែរក្សាចំណងមិត្តភាពកម្ពុជា-ចិន មានរយៈពេលជាង ២ពាន់ឆ្នាំមកហើយ ជាមិត្តភាពដែកថែប នៅក្នុងក្របខ័ណ្ឌកិច្ចសហប្រតិបត្តិការត្បូងពេជ្រ ស្របតាមកិច្ចខិតខំប្រឹងប្រែងរបស់រដ្ឋាភិបាលនៃប្រទេសទាំងពីរ ដែលមានចក្ខុវិស័យប្តេជ្ញារួមគ្នាជំរុញការកសាងសហគមន៍ជោគវាសនាតែមួយ។

មន្ត្រីជាន់ខ្ពស់ក្រសួងពាណិជ្ជកម្មរូបនេះ បានកត់សម្គាល់ឃើញថា សកម្មភាពពាណិជ្ជកម្មរវាងកម្ពុជា-ចិន បន្តយ៉ាងសកម្ម ដោយយោងតាមស្ថិតិពាណិជ្ជកម្មកម្ពុជា ត្រឹមរយៈពេល ២ខែ នៃឆ្នាំ២០២៥នេះ ទំហំពាណិជ្ជកម្មរវាងកម្ពុជានិងចិន សរុបមានជាង ២ពាន់៦រយលានដុល្លារអាមេរិក ដោយក្នុងនោះ ទំហំនាំចេញពីកម្ពុជាទៅចិន គិតជាទឹកប្រាក់មានចំនួនប្រមាណជាង ២១៧ លានដុល្លារអាមេរិក ហើយទំហំនៃការនាំចូលពី ចិន មកកម្ពុជា មានចំនួនជាង ២ពាន់៤រយលានដុល្លារអាមេរិក ដែលមានការកើនឡើងប្រមាណ ២១% បើធៀបនឹងរយៈពេលដូចគ្នាកាលពីឆ្នាំ២០២៤។ ប្រទេសចិនមានផលិតកម្មរោងចក្រកាត់ដេរ និងរោងចក្រឧស្សាហកម្មច្រើននៅកម្ពុជា។ ដូច្នេះ កម្ពុជាមានតម្រូវការវត្ថុធាតុដើម សម្ភារៈ ពីប្រទេសចិនធូរថ្លៃជាងគេ បើប្រៀបធៀបជាមួយអាស៊ាន ហើយសម្ភារៈវត្ថុធាតុដើមសម្លៀកបំពាក់ក៏មានច្រើន ដូចនេះ បើទោះបីកម្ពុជាបានចុះកិច្ចព្រមព្រៀងទីផ្សារសេរី ជាមួយប្រទេសចិនក៏ដោយ ក៏ឱនភាពពាណិជ្ជកម្មនៅតែបន្តកើតមាន ដោយសារ កម្ពុជាមានតម្រូវការធំពីប្រទេសចិន ដែលមានសម្ភារបរិក្ខាផ្សេងៗជាដើម។

ទន្ទឹមនឹងនេះ ក្រសួងពាណិជ្ជកម្ម ក៏បានចូលរួមយ៉ាងសកម្មក្នុងការជំរុញការអភិវឌ្ឍទំនាក់ទំនងទ្វេភាគីរវាងកម្ពុជា និងចិន ដោយក្នុងរយៈពេលប៉ុន្មានឆ្នាំចុងក្រោយនេះ អាចសម្រេចបានការចុះអនុស្សរណៈនៃការយោគយល់គ្នាជាមួយភាគីចិន ស្តីពីការជំរុញពាណិជ្ជកម្ម ជំរុញការនាំចេញផលិតផលក្នុងស្រុកទៅកាន់ទីផ្សារចិន ជាពិសេសបង្កើនការរៀបចំការតាំងពិព័រណ៍ក្នុងនិងក្រៅប្រទេស ធ្វើយ៉ាងណាផ្សព្វផ្សាយផលិតផលកម្ពុជាបានកាន់តែទូលំទូលាយ។សូមជម្រាបថា បើយោងតាមក្រសួងពាណិជ្ជកម្មនៅក្នុងឆ្នាំ ២០២៤ ពាណិជ្ជកម្មទ្វេភាគីរវាងកម្ពុជា-ចិន សម្រេចបាននូវទំហំទឹកប្រាក់ ១៥ពាន់លានដុល្លារ កើនឡើង ២៣% បើធៀបនឹងឆ្នាំ ២០២៣ ក្នុងនោះ កម្ពុជានាំចេញទំនិញទៅចិន មានតម្លៃ ១,៧៥ពាន់លានដុល្លារ កើនឡើង ១៨% និងទំនិញចិននាំចូលមកកម្ពុជាមានតម្លៃ ១៣ពាន់លានដុល្លារ កើនឡើង ២៤%៕
 

អត្ថបទ៖ ថុន សុកេតុមាលា រូបភាព៖ ឯកសារ