សមាជិកទាំង ២ រូបរបស់ក្រុមចម្រៀងខេប៉ុប  TVXQ បានប្រកាសបន្តកុងត្រាជាមួយផលិតកម្ម SM Entertainment ជាការបង្ហាញភាពជាដៃគូដ៏រឹងមាំរវាងភាគីទាំងពីរក្រោយរយៈពេល ២២ ឆ្នាំ។

នៅថ្ងៃទី ២ ខែមេសានេះ ផលិតកម្ម SM Entertainment បានឱ្យដឹងថា ពួកគេរីករាយក្នុងការបន្តធ្វើការជាមួយ TVXQ ។ ផលិតកម្មនឹងគាំទ្រយ៉ាងសកម្មនូវសកម្មភាពដ៏ទូលំទូលាយរបស់សមាជិក Yunho និង Changmin លើវិស័យផ្សេងៗទៀត ស្របពេលដែលពួកគេគឺជាសិល្បករ K-pop ជើងចាស់ដ៏ល្បីល្បាញ និងជាផ្នែកមួយនៃប្រវត្តិសាស្រ្តរបស់ផលិតកម្ម SM តែម្ដង។

សមាជិកក្រុម Yunho បានបង្ហាញចំណាប់អារម្មណ៍ថា លោកពិតជាមានអារម្មណ៍រំជើបរំជួលយ៉ាងខ្លាំងក្នុងការបន្តទំនាក់ទំនងជាមួយ SM ជាក្រុមហ៊ុនដែលនៅជាមួយលោកតាំងពីបង្ហាញខ្លួនលើកដំបូង។ ក្នុងនាមជាសមាជិក TVXQ លោកបានសន្យាថានឹងព្យាយាមបង្ហាញឱ្យអស់ពីសមត្ថភាពនៅគ្រប់ការងារដើម្បីតបស្នងនូវក្តីស្រលាញ់ និងការគាំទ្រដ៏ធំធេងពីអ្នកគាំទ្រ។

ទន្ទឹមនោះដែរ សមាជិក Changmin ក៏បានសម្តែងការដឹងគុណដោយនិយាយថា វាពិតជាមានន័យណាស់ដែលលោកបានដើរលើវិថីនេះជាមួយ SM ជាង ២០ ឆ្នាំមកហើយ។ រួមគ្នាជាមួយ SM ដែលតែងតែគាំទ្រ និងផ្តល់អំណាចដល់ពួកគេ Changmin សន្យាថានឹងបន្តបង្កើតអនាគតថ្មីដ៏គួរឱ្យកត់សម្គាល់ថែមទៀតសម្រាប់ TVXQ។

ត្រូវបានស្គាល់តាមរយៈបទចម្រៀងល្បីៗដូចជា Mirotic, Catch Me និង Keep Your Head Down ក្រុមចម្រៀង TVXQ បានបង្ហាញមុខដំបូងក្រោមផលិតកម្ម SM Entertainment ក្នុងឆ្នាំ២០០៣ ដោយមានសមាជិកដើមចំនួន ៥ នាក់ ប៉ុន្តែនៅឆ្នាំ២០១០ សមាជិក ៣ នាក់រួមមាន Jeajoong, Yoochun និង Junsu ក៏បានចាកចេញពីក្រុម។ ចាប់ពីពេលនោះក្រុម TVXQ ក៏បានបន្តដំណើរដោយមានសមាជិកតែពីររូបគឺ Yunho និង Changmin មកដល់បច្ចុប្បន្ន៕
 

ប្រែសម្រួល៖ វ៉ាន់ថន