រឿងភាគកូរ៉េមានចំណងជើងថា "When Life Gives You Tangerines" បានបញ្ចប់ការចេញផ្សាយរយៈពេល ៤ សប្តាហ៍របស់ខ្លួន ដោយជាប់ចំណាត់ថ្នាក់លេខ ៣ នៅលើតារាង Global Top 10 ប្រចាំសប្ដាហ៍របស់ Netflix សម្រាប់ភាពយន្តមិននិយាយភាសាអង់គ្លេស។ភាពយន្តភាគនេះក៏បានជាប់ក្នុងចំណោមចំណាត់ថ្នាក់ Top Ten នៅប្រទេសចំនួន ៣៩ រួមមាន បូលីវី ប្រេស៊ីល ឈីលី ហ្វីលីពីន និងម៉ាឡេស៊ីផងដែរ។

ដឹកនាំដោយលោក Kim Won-seok (គីម វ៉នសក) និងជាស្នាដៃនិពន្ធរបស់អ្នកនិពន្ធស្រី Lim Sang-choon រឿងភាគ "When Life Gives You Tangerines" មានសាច់រឿងនិយាយពីដំណើរជីវិតរបស់គូស្នេហ៍លើកោះជេជូគឺ Ae-sun (អេស៊ុន) និង Gwan-sik (ក្វានស៊ីក) ចាប់ពីទសវត្សរ៍ឆ្នាំ ១៩៦០ រហូតដល់ពួកគេមានកូនធំពេញវ័យ និងផ្លាស់មករស់នៅទីក្រុងសេអ៊ូលនៅសម័យបច្ចុប្បន្ន ដោយមានការចូលរួមសម្តែងពីសំណាក់តារាល្បីៗដូចជា IU និង Park Bo-gum ជាតួឯកពេលនៅក្មេង និងតារាសម្ដែង Moon So-ri និង Park Hae-joon ជាតួឯកពេលវ័យកណ្ដាល។

មានសរុប ១៦ ភាគ រឿងភាគដែល Netflix ហ៊ានចំណាយដើមទុនផលិតខ្ពស់រហូតដល់ ៤២ លានដុល្លារមួយនេះបានចេញផ្សាយដំបូងនៅថ្ងៃទី ៧ ខែមីនា និងបានបញ្ចប់នៅថ្ងៃទី ២៨ ខែមីនា ដោយមានការចេញផ្សាយចំនួន ៤ ភាគក្នុងមួយសប្ដាហ៍ ខណៈបានជាប់ក្នុងបញ្ជី Global Top 10 សម្រាប់រឿងភាគមិននិយាយភាសាអង់គ្លេសរយៈពេល ៤ សប្តាហ៍ជាប់ៗគ្នា។

មិនតែប៉ុណ្ណោះ រឿងនេះក៏ទទួលបានការវាយតម្លៃវិជ្ជមានរហូតដល់ ៩៨ ភាគរយលើគេហទំព័រ Rotten Tomatoes និងទទួលបានពិន្ទុ ៩,៤ លើ ១០ នៅលើគេហទំព័រវាយតម្លៃកុនអាមេរិក IMDb ខណៈទស្សនិកជនជាច្រើនបានបញ្ចេញមតិថារឿងនេះធ្វើឱ្យពួកគេយំហើមភ្នែក ដោយសារសាច់រឿងដ៏ជ្រាលជ្រៅពាក់ព័ន្ធទំនាក់ទំនងរវាងឪពុកម្ដាយ និងកូន ៕

ប្រែសម្រួល៖ វ៉ាន់ថន