មនុស្សជាច្រើនបានមកជួបជុំគ្នាកកកុញក្នុងទីក្រុងតូក្យូកាលពីថ្ងៃចន្ទ ទី៣១ ខែមីនា ដើម្បីទស្សនា ថតរូប និងញ៉ាំអាហារពិកនិកក្រោមដើមផ្កាសាគូរ៉ាដែលកំពុងរីកស្គុះស្គាយ។

នៅក្រោមអាកាសធាតុដ៏ត្រជាក់ខ្លាំង ប៉ុន្តែមនុស្សជាច្រើននៅតែមកជួបជុំគ្នាកកកុញក្នុងទីក្រុងតូក្យូនៅដើមសប្ដាហ៍នេះ ដើម្បីទស្សនាផ្កាសាគូរ៉ាដែលកំពុងពេញរីកស្គុះស្គាយ។

យោងតាមទីភ្នាក់ងារឧតុនិយមជប៉ុន បានឱ្យដឹងថា អាកាសធាតុជាមួយនឹងភ្លៀងធ្លាក់តិចៗអាចបណ្ដាលឱ្យប្រជាជនមួយចំនួនមានអារម្មណ៍មិនស្រួលខ្លួនរយៈពេលខ្លី ប៉ុន្តែយ៉ាងណា បញ្ហាអាកាសធាតុនេះមិនបានធ្វើឱ្យរាំងស្ទះដល់ការធ្វើដំណើរកម្សាន្តក្នុងរដូវផ្កាសាគូរ៉ានោះទេ។

មានវ័យ ៧៧ឆ្នាំ លោក Michie Kakihana ដែលបានធ្វើដំណើរពីខេត្ត Saitama ដែលនៅជិតទីក្រុងតូក្យូ ដើម្បីមកទស្សនាផ្ការីកតាមដងទន្លេ Meguro បាននិយាយថា រាល់ឆ្នាំ លោកតែងតែបានឃើញផ្កាសាគូរ៉ារីកដ៏ស្រស់ស្អាតក្រោមមេឃពណ៌ខៀវ ប៉ុន្តែឆ្នាំនេះ គឺជាលើកទីមួយហើយដែលអាកាសធាតុធ្វើឱ្យលោកខកចិត្តបន្តិច។

រដូវកាលផ្កាសាគូរ៉ារីកនៅរដ្ឋធានីប្រទេសជប៉ុនឆ្នាំនេះបានចាប់ផ្តើមកាលពីចុងខែមីនា ដែលជាការចាប់ផ្ដើមយឺតបំផុតក្នុងរយៈពេល ១០ ឆ្នាំចុងក្រោយដោយសារបញ្ហាអាកាសធាតុ។ ផ្កាសាគូរ៉ាជាធម្មតានឹងរីកពេញស្អាតរយៈពេលមួយសប្តាហ៍ទៅ ១០ ថ្ងៃ បន្ទាប់ពីចាប់ផ្ដើមរីកលើកដំបូង។

ជារៀងរាល់ឆ្នាំ ប្រពៃណីធ្វើដំណើរកម្សាន្តមើលផ្កាសាគូរ៉ា បានទាក់ទាញមនុស្សជាច្រើនទៅកាន់សួនឧទ្យាននានាតួយ៉ាងដូចជាឧទ្យាន Ueno ដើម្បីអង្គុយពិកនិក ហូបអាហារ ផឹកស្រាជុំគ្នានៅក្រោមដើមសាគូរ៉ា ដោយមានការច្រៀងរាំកម្សាន្តផងដែរ ៕

ប្រែសម្រួល៖ វ៉ាន់ថន