នៅថ្ងៃនេះ ធនាគារ អេស៊ីលីដា ភីអិលស៊ី បានចុះហត្ថលេខាលើអនុស្សរណៈនៃការយោគយល់គ្នា ស្តីពីគម្រោងហិរញ្ញប្បទានសាជីវកម្ម ជាមួយក្រុមហ៊ុន តូតាល់អេនើជី ម៉ាឃីធីង ដែលជាក្រុមហ៊ុនថាមពលដ៏ធំមួយ ផលិត និងផ្គត់ផ្គង់ថាមពលលើសកលលោក។

នាពិធីចុះហត្ថលេខាលើ អនុស្សរណៈនៃការយោគយល់គ្នា ស្តីពីគម្រោងហិរញ្ញប្បទានសាជីវកម្ម ជាមួយក្រុមហ៊ុន តូតាល់អេនើជី ម៉ាឃីធីង លោកស្រី សុខ សោភា គណៈប្រធាននាយិកាប្រតិបត្តិប្រតិបត្តិការ ធនាគារ អេស៊ីលីដា បានមានប្រសាសន៍ថា ការចុះហត្ថលេខានេះ មិនមែនជាលើកទី១នោះទេ ដោយស្ថាប័នទាំង ២ ជាដៃគូសហការដ៏ល្អ ក្នុងការផ្តល់សេវាកម្មឲ្យគ្នាទៅវិញទៅមក ជាមួយនឹងសេវាកម្មហិរញ្ញវត្ថុយ៉ាងសម្បូរបែប ទើបឈានដល់ការចុះអនុស្សរណៈលើកទី ២នេះ។

លោកស្រី បន្តថា ភាពជាដៃគូនេះ ក៏បានផ្តល់អត្ថប្រយោជន៍ជាច្រើនដល់ ម្ចាស់ស្ថានីយចែកចាយប្រេងឥន្ធនៈរបស់ ក្រុមហ៊ុនតូតាល់ អេនើជី ជាមួយនឹង សេវាឥណទានអេស៊ីលីដា រួមមាន ប័ណ្ណឥណទាន  ឥណទានសម្រាប់ពាណិជ្ជករអេស៊ីលីដា ឥណទានសម្រាប់អ្នកចែកចាយ និងសេវាហិរញ្ញប្បទានពាណិជ្ជកម្ម ជាមួយនឹងអត្រាការប្រាក់ពិសេស និងលក្ខខណ្ឌងាយស្រួល។

លោកស្រី Dinah Kumar អគ្គនាយិកាក្រុមហ៊ុន តូតាល់អេនើជី ម៉ាឃីធីង បានមានប្រសាសន៍ដែរថា ក្រុមហ៊ុន បានចាប់ដៃគូជាមួយធនាគារ អេស៊ីលីដា ដើម្បីផ្តល់នូវដំណោះស្រាយហិរញ្ញវត្ថុឌីជីថល ជូនដល់អតិថិជន និងអ្នកចែកចាយ ប្រកបដោយតម្លាភាព និងនវានុវត្តន៍ ជាពិសេសជំរុញកំណើនសេដ្ឋកិច្ចជាតិ។

គួរជម្រាបថា ស្របពេលដែល រថយន្តអគ្គិសនីនៅកម្ពុជា ចាប់ផ្តើមមានកំណើនបន្តិចម្តងៗ ក្រុមហ៊ុន តូតាល់អេនើជី ក៏ចាប់ផ្តើមវិនិយោគលើ ស្ថានីយ៍សាកថ្មរថយន្តអគ្គិសនីនៅកម្ពុជា ជាបណ្តើរៗហើយ ដែលជាផ្នែកមួយនៃផែនការអព្យាក្រឹត្យកាបូនរបស់ ក្រុមហ៊ុនលំដាប់អន្តរជាតិមួយនេះ៕

អត្ថបទ៖ ងួន សុភ័ត្រ្តា រូបភាព៖ អ៊ិន អាត