ទោះសព្វថ្ងៃតារាចម្រៀងមានមន្តស្នេហ៍ ណាន វីសារ មមាញឹកការងារសិល្បៈខ្លាំងទាំងចម្រៀង និងការទទួលធ្វើទូតសុឆន្ទៈតំណាងផលិតផលផ្សេងៗ ក៏ម្ចាស់បទ «ស្រលាញ់គ្រប់ចក្រវាល» មិនភ្លេចចម្រៀងដែលជាការងារស្នូលរបស់ខ្លួន។

 
រឹតតែមមាញឹកខ្លាំងជាងមុន គ្រាន់តែឈានចូលឆ្នាំថ្មី២០២៥ភ្លាម តារាចម្រៀងរូបសង្ហាសម្លេងពីរោះ ណាន វីសារ មិនបង្អង់យូរក្នុងការបង្កើតសមិទ្ធិផលស្នាដៃថ្មីៗលើវិថីសិល្បៈនោះឡើយ ដោយថ្មីៗនេះលោកបានបង្ហើបឱ្យភីអីនអិនដឹងពីគម្រោងផែនការធំៗ ៣ ដែលកំពុងត្រៀមធ្វើក្នុងឆ្នាំថ្មី២០២៥។
 

 
បន្ថែមពីលើគ្រោងការផលិតចម្រៀងថ្មីៗ ដើម្បីបម្រើអារម្មណ៍ប្រិយមិត្តទស្សនិកជន តារាចម្រៀងមានមន្តស្នេហ៍រូបនេះ ក៏កំពុងសម្លឹងមើលឱកាសប្រឡូកវិស័យភាពយន្តផងដែរ ដោយរំពឹងថានឹងអាចទទួលបានឱកាសល្អក្នុងឆ្នាំ២០២៥។

 
ស្តាប់ទៅគួរឱ្យអស់សំណើច កំលោះសង្ហាថ្ពាល់ខួចគួរឱ្យស្រលាញ់នេះ​ទម្លាយឱ្យដឹងថា មែនទែនទៅកន្លងមកធ្លាប់មានផលិតករចាប់អារម្មណ៍ហៅលោកទៅសម្តែងសាកល្បង (casting) ដែរ តែទ្រេមុខរបស់លោកជាប់តែតួអង្គប្រុសក្បត់ ដូចនេះទើបលោកនៅរារែងពុំទាន់ហ៊ានសាកល្បង។
 

 
តារាចម្រៀងដែលតែបំពេរអារម្មណ៍ទស្សនិកជនតាមរយៈសូរសៀងដ៏អន្លង់អន្លោច ណាន វីសារ សង្ឃឹមថា ពុកម៉ែបងប្អូននឹងបន្តគាំទ្រស្នាដៃថ្មីៗរបស់លោកក្នុងឆ្នាំ២០២៥នេះ ហើយលោកក៏បន្តពង្រឹងស្នាដៃថ្មីមកបម្រើអារម្មណ៍ប្រិយមិត្តឱ្យស័ក្កសមការស្រលាញ់ចូលរួមរបស់អ្នកគ្រប់គ្នាចំពោះរូបលោក៕
 

អត្ថបទ៖ រ៉ាត់ ចាន់ធីតា រូបភាព៖ ឃាង ទូច