« ប្រមាត់ត្រយ៉ូវ » ភាពយន្តបែបភ័យរន្ធត់របស់ស្នាដៃកូនខ្មែរដំបូងគេត្រៀមនឹងស្វាគមន៍ដើមឆ្នាំ២០២៥នេះហើយ ដែលប្រជុំទៅដោយតារាសម្តែងល្បីៗជាច្រើនរូប ។គ្រាន់តែលឺចំណងជើងរឿង « ប្រមាត់ត្រយ៉ូវ » ក៏ធ្វើឱ្យមហាជនមានការងឿងឆ្ងល់និងចង់ទស្សនាដែរ ទាំងសាច់រឿង ការសម្តែង និង បច្ចេកទេសនៃការកាត់តគឺពិតជាមិនធម្មតាឡើយ ។ ភាពយន្តនេះត្រៀមនឹងបង្ហាញមហាជនក្នុងដើមឆ្នាំ២០២៥នេះហើយដែលមានការចូលរួមសម្តែងពីតារាជើងចាស់លោក ទេព រិនដារ៉ូ ប្រុសខួច និងអ្នកនាង សឿន ផាន់ផាភួង ជាដើម  ។

«ប្រមាត់ត្រយ៉ូវ » ជាស្នាដៃថ្មីមួយទៀតរបស់ផលិតកម្ម PDS Entertainment បន្ទាប់ពីរឿង « ខ្សែចងក » ភាពយន្តនេះមានការខុសប្លែកពីភាពយន្តផ្សេងៗ ដោយសារក្នុងរឿងនេះមានបង្កប់ទៅដោយអាថ៌កំបាំងជាច្រើន ។ ដើម្បីបន្ថែមនូវរសជាតិថ្មីមួយទៀតអ្នកដឹកនាំរឿងបានបញ្ចូលនូវបទចម្រៀងដែលមានចំណងជើងថា « ទឹកភ្នែកម៉ែក្នុងផ្នូរកូន » ដែលច្រៀងដោយកញ្ញា ខាត់ រ៉ុងកែវ ជាក់ស្តែងគ្រាន់តែលឺសម្លេងថ្នូរដ៏គ្រលួចរបស់នាងក៏ធ្វើឱ្យអ្នកស្តាប់ព្រឺសប្បូរជាមួយអត្ថន័យនៃបទចម្រៀង ក៏ដូចជាមានការបញ្ចូលភ្លេងបុរាណ ទ្រ និង ខ្លុយជាដើម។  

  
អ្នកនាង ជុន សុធា ដែលជាអគ្គនាយិកាផលិតកម្ម PDS Entertainment បានបញ្ជាក់ប្រាប់ថា រឿង « ប្រមាត់ត្រយ៉ូវ » ជាស្នាដៃថ្មីរបស់កូនខ្មែរពិតៗ ក្នុងរឿងនេះមានបង្កប់ទៅដោយអាថ៌កំបាំងជាច្រើន តែបើចង់ដឹងច្បាស់មានតែមកទស្សនាទាំងអស់គ្នាប៉ុណ្ណោះ ។ 

ក្នុងចន្លោះពេលថតរឿង « ប្រមាត់ត្រយ៉ូវ » នេះ ក្រុមការងារក្នុងផលិតកម្មក្នុងផលិតកម្ម PDS Entertainment ក៏បានជួបនូវហេតុការណ៍ និងសម្លេងប្លែកជាច្រើន តែដើម្បីទទួលបានសាច់រឿងល្អមួយម្នាក់ៗខំប្រឹងប្រែងសម្តែងអស់ពីសមត្ថភាព ។  សម្រាប់តួអង្គសំខាន់ៗនៅក្នុងរឿង « ប្រមាត់ត្រយ៉ូវ » នេះរួមមានលោក ទេព រិនដារ៉ូ , ប្រុសខួច ,  និរន្តរ៍  , អ្នកនាង សឿន ផាន់ផាភួង កញ្ញា សុផានាថ និងកុមារី ពិឡេ ថាវីនវីតា ហៅ អូន លៀប ជាដើម...។ 

គួរបញ្ជាក់ផងដែរថា «ប្រមាត់ត្រយ៉ូវ » គឺជាសាច់រឿងថ្មីបែបលង ភ័យ រន្ធត់ ប្រកបដោយអារម្មណ៍កំសត់ និងមនោសញ្ចតនា ។  ក្នុងរឿងនេះគឺចង់និយាយអំពីជំងឺ ប្រមាត់ត្រយ៉ូវ ដែលតាមចាស់ៗពីមុនៗនិយាយតគ្នាថាមានព្រលឹងខ្មោចតាមលង ធ្វើបាបដោយនាំគេទៅសម្លាប់ខ្លួន ។ នៅពេលខ្លះអ្នកដែលកើតជំងឺនោះ អ្នកស្រុកអ្នកភូមិឃើញគេមិនមានក្បាល (កំប៊ុតក្បាល)។

 ភាគច្រើនតាមឯកសារពីចាស់ៗប្រាប់ថា នៅពេលគេដឹងថាម្នាក់ណាបែបនោះហើយ គ្រួសារាគេនាំគ្នារកវិធីបំភ័យអ្នកជម្ងឺដើម្បីឲ្យឲ្យវិញ្ញាណខ្មោចដែលតោងទោមនោះចេញពីខ្លួនអ្នកជម្ងឺ ដែលគេហៅថាពិធី កាត់ប្រមាត់ត្រយ៉ូវ ។ កុំភ្លេចចូលរួមទស្សនាភាពយន្តថ្មីមួយនេះទាំងអស់គ្នានៅថ្ងៃទី ០១ ខែ មករា ឆ្នាំ ២០២៥ នៅគ្រប់រោងភាពយន្ត ៕ 

អត្ថបទ ៖ ម៉ា រីសា រូបភាព ៖ ឃាង ទូច