តារាសម្ដែងល្បីអង់គ្លេស Rowan Atkinson ឬទស្សនិកជនភាគច្រើនបានស្គាល់ថាជា Mr. Bean បានឈានចូលវ័យ ៧០ឆ្នាំហើយនៅថ្ងៃទី៦ ខែមករាឆ្នាំនេះ។ ចង់ដឹងថាលោកមានជីវប្រវត្តិនិងជីវិតបច្ចុប្បន្នបែបណា សូមទស្សនាសេចក្ដីរាយការណ៍បន្តទៅនេះទាំងអស់គ្នា។

កើតនៅឆ្នាំ ១៩៥៥ ក្នុងក្រុង Consett ភាគឦសាននៃប្រទេសអង់គ្លេស លោក Rowan Atkinson (រ៉ូវេន អេតឃីនសុន) បានចាប់ផ្តើមអាជីពជាតារាសម្ដែងទូរទស្សន៍នៅឆ្នាំ ១៩៧៩ ដោយបានសម្តែងក្នុងរឿងភាគកំប្លែង "The Secret Policeman's Ball" និង "Not the Nine O'Clock News" ។

ក្នុងឆ្នាំ១៩៨២ កេរ្តិ៍ឈ្មោះរបស់លោកត្រូវបានគេស្គាល់ទូទាំងប្រទេសអង់គ្លេសសម្រាប់ការសម្ដែងក្នុងភាពយន្តភាគកំប្លែង “Blackadder”។ ភាពល្បីល្បាញបានធ្វើឱ្យភាពយន្តភាគនេះបន្តផលិតចំនួន ៣ រដូវកាលបន្តទៀតរហូតដល់ឆ្នាំ១៩៨៩។

យ៉ាងណាមិញ តារាសម្ដែងជនជាតិអង់គ្លេសរូបនេះ ត្រូវបានគេស្គាល់កាន់តែច្បាស់ថែមទៀតតាមរយៈការដើរតួ Mr. Bean ជាមនុស្សចាស់ចរិតកូនក្មេង និងមានតុក្កតាកូនខ្លាឃ្មុំជាមិត្តសម្លាញ់ ដែលបង្កភាពវឹកវរគ្រប់ទីកន្លែងដែលខ្លួនទៅដល់។ ភាពយន្តភាគ “Mr Bean” ត្រូវបានផលិតចំនួន ១៥ ភាគនិងបានចាក់ផ្សាយចាប់ពីខែមករាឆ្នាំ១៩៩០ រហូតដល់ខែធ្នូ ឆ្នាំ១៩៩៥។

មិនតែប៉ុណ្ណោះរឿងនេះក៏ត្រូវបានផលិតជាគំនូរជីវចល ព្រមទាំងភាពយន្តខ្នាតធំចំនួន ២ រឿងរួមមាន ភាពយន្ត “Bean: The Ultimate Disaster Movie” ចេញបញ្ចាំងក្នុងឆ្នាំ១៩៩៧ និង “Mr. Bean's Holiday” ចេញបញ្ចាំងឆ្នាំ២០០៧ ដែលសុទ្ធសឹងទទួលបានការគាំទ្រខ្លាំងទូទាំងពិភពលោក។

ជាច្រើនឆ្នាំកន្លងមកនេះ លោក Rowan Atkinson (រ៉ូវេន អេតឃីនសុន) ក៏បានសម្ដែងជាតួអង្គផ្សេងៗទៀតដូចជាតួអង្គអាចារ្យក្នុងរឿង "Four Weddings and a Funeral" ឆ្នាំ១៩៩៤ សម្ដែងជាតួអង្គអ្នកស៊ើបអង្កេតក្នុងរឿង "Johnny English" និងតួអង្គបុគ្គលិកផ្នែកលក់ក្នុងរឿង "Love Actually" ក្នុងឆ្នាំ២០០៣ និងតួអង្គលោកឪក្នុងរឿង "Wonka" កាលពីឆ្នាំ២០២៣ ជាដើម។

បច្ចុប្បន្នលោកនៅមានគម្រោងស្នាដៃសម្ដែងចំនួន ៣ រឿងទៀតដែលត្រៀមចេញបញ្ចាំង ក្នុងនោះរួមមានការវិលត្រលប់មកសម្ដែងជាតួអង្គ Mr. Bean និង Johnny English ផងដែរ។

ចំពោះជីវិតឯកជន លោក Mr. Bean បានរៀបការជាមួយភរិយាទីមួយឈ្មោះ Sunetra Sastry (ស៊ូនីត្រា សាស្ត្រ៊ី) ជាអ្នកធ្វើការនៅប៉ុស្តិ៍ BBC ក្នុងឆ្នាំ១៩៩០ និងមានកូន២នាក់ជាមួយគ្នា។

នៅឆ្នាំ២០១៣ ក្នុងវ័យ ៥៨ ឆ្នាំ លោកបានចាប់ផ្ដើមទំនាក់ទំនងស្នេហាជាមួយតារាកំប្លែងស្រីវ័យ ៣២ឆ្នាំ Louise Ford (ល្វីស ហ្វត) រហូតដល់បច្ចុប្បន្នពួកគេមានកូនម្នាក់ជាមួយគ្នា។

ក្រៅពីការងារសិល្បៈ លោក Atkinson ក៏មានចំណង់ចំណូលចិត្តលើរថយន្ត និងជាអ្នកប្រណាំងឡានក្រៅម៉ោងមួយរូបផងដែរ ដោយធ្លាប់ចូលរួមការប្រកួតទាំងក្នុងនិងក្រៅប្រទេស។ ក្នុងឆ្នាំ១៩៩៧ លោកបានទិញរថយន្ត McLaren F1 ក្នុងតម្លៃជាង ១ លានដុល្លារអាមេរិក ៕
 

ប្រែសម្រួល៖ វ៉ាន់ថន