រៀបការមានស្វាមីជាង៧ឆ្នាំហើយ សុគន្ធ និសា នៅតែមិនទាន់សម្រេចបំណងយកកូនបន្តវង្សត្រកូលទៀត រហូតធ្វើឱ្យនាងឈប់ខ្វល់ចិត្ត ងាកមកប្រឹងធ្វើបទចម្រៀងផ្ទាល់ខ្លួនឱ្យផ្ទុះខ្លាំងនៅក្នុងឆ្នាំ ២០២៥នេះ ។

ទោះបីជាមិនទាន់មានកូនតាមបំណងប្រាថ្នាតែតារាចម្រៀងស្រគត់ស្រគំរូបនេះ ទទួលបានការស្រឡាញ់ថ្នាក់ថ្នមពីស្នាមីគ្រប់ពេលវេលា ជាពិសេសស្វាមីរបស់នាងមិនចង់ឱ្យនាងហត់នឿជាមួយការងារឡើយទើបគាត់ចង់ឱ្យនាងសម្រាកពីការងារឱ្យបានច្រើន ។ សុគន្ធ និសា មិនដែលទុកខ្លួនឱ្យនៅទំនេរឡើយ នាងតែងតែទទួលបានការងារតាមបណ្តាខេត្តក្រុងនានាជារៀងរាល់ថ្ងៃ ដើម្បីរកប្រាក់ចំណូលសម្រាប់ខ្លួនឯង ។ 

អតីតតារាចម្រៀងរបស់ ផលិតកម្ម ហង្សមាស ខាងលើ សប្បាយរីករាយជាមួយជីវិតរបស់ខ្លួនទោះបីជាពេលនេះនាងមិនទាន់មានកូនតាមបំណងប្រាថ្នា ក៏នាងមិនអស់សង្ឃឹមដែរ នាងនៅតែរំពឹងថា ថ្ងៃណាមួយនាងនឹងមានកូនដូចជាមិត្តភក្តិដែរ ។

ទន្ទឹមនឹងការឈប់ខ្វល់ពីរឿងយកកូននេះ សុគន្ធ និសា ក៏បានងាកមកពង្រឹងការងារចម្រៀងរបស់ខ្លួនវិញ បន្ទាប់ពីបានចាកចេញពីផលិតកម្មអស់ពេលជាងមួយឆ្នាំ ។ 

ជួបជាមួយ សុគន្ធ និសា កាលពីបំណាច់ឆ្នាំ២០២៤កន្លងមកនេះ នាងបានបង្ហើបប្រាប់ថា នាងមានគម្រោងធ្វើបទចម្រៀង Original Song ជាច្រើននៅក្នុងឆ្នាំ២០២៥រួមជាមួយតារាចម្រៀង និងអ្នកជំនាញខាងធ្វើបទចម្រៀង ជាពិសេសបទចម្រៀងមនោរសញ្ចេតនា ពីព្រោះសម្លេងរបស់នាងត្រូវតែបទចម្រៀងបែបនោះ បើញាក់កន្រ្តាក់អារម្មណ៍ គឺមិនមែនជាចំណងចំណូលចិត្តរបស់នាងឡើយ ។

គួរបញ្ជាក់ផងដែរថា ចាប់តាំងពីចេញពីផលិតកម្ម សុគន្ធ និសា បានចេញបទចម្រៀងមនោរសញ្ចេតនាបានចំនួនពីរបទហើយដូចជាបទ « ពេលខ្ញុំដួលអ្នកនៅឯណា » និងបទ « អារម្មណ៍ចាស់ៗ » ដែលទទួលបានការគាំទ្រច្រើនពីសំណាក់ទស្សនិកជន រហូតធ្វើឱ្យនាងមានកម្លាំងចិត្តបោះទុនប្រាក់បន្ថែមដើម្បីធ្វើបទចម្រៀងផ្ទាល់ខ្លួន សាងប្រជាប្រិយភាពឱ្យកាន់តែខ្លាំងនៅក្នុងឆ្នាំ២០២៥ ។ 

ពេលនេះ សុគន្ធ និសាស មានវ័យជាង៤០ឆ្នាំហើយ តែនាងនៅអាចរក្សារូបរាងនិងរូបសម្រស់របស់ខ្លួនឱ្យនៅស្អាតក្មេងវ័យ រហូតត្រូវមហាជនហៅនាងថា តារាស្រីមុខក្មេងអាយុច្រើន ៕

អត្ថបទ ៖ ម៉ា រីសា រូបភាព ៖ ភីអិនអិន