ដ្បិតមិនអាចចូលដល់វគ្គជ្រៅៗនៃកម្មវិធី Miss Universe 2024 នៅ ម៉ិចសិចកូ តែ ប្រាសាទ ដាវីនបានបំបែកកំណត់ត្រានាំកម្ពុជាចូលវគ្គ Top30 ជាលើកដំបូងសម្រាប់ កម្ពុជា ដែលកំពុងធ្វើឱ្យអ្នកគាំទ្រ កម្ពុជា មានមោទនភាពខ្លាំង។

អ្នកគាំទ្រជាច្រើន បាននាំគ្នាស្រែកហ៊ោកញ្ជ្រៀវដោយក្តីរំភើបក្រៃលែង បង្ហាញការអបអរសាទរដល់ Miss Universe Cambodia 2024 អ្នកនាង ប្រាសាទ ដាវីន ដែលនាងបានជាប់ក្នុងវគ្គ Top30 ក្នុងការប្រកួត Miss Universe លើកទី៧៣ នៅប្រទេសមិចស៊ីកូ។

នេះជាមោទកភាពដ៏ធំធេងសម្រាប់កម្ពុជា ដែលអ្នកនាង ប្រាសាទ ដាវីន ក្លាយជាបវរកញ្ញាកម្ពុជាដំបូងគេបង្អស់ដែលអាចបំបែកកំណត់ត្រានាំកម្ពុជាចូលវគ្គ Top30 ក្នុងការប្រកួត Miss Universe 2024 ខណៈដែលឆ្នាំមុនៗយើងនៅពុំទាន់មានលទ្ធភាពអាចឈានចូលដល់វគ្គ Top ម្តងណាឡើយ។

នេះជាសញ្ញាវិជ្ជមានមួយដែលឆ្លុះបញ្ចាំងពីការវិវត្តន៍របស់វិស័យបវរកញ្ញានៅកម្ពុជា។ អ្វីដែលសំខាន់ ការឈានជើងចូលវគ្គ Top30 របស់ ប្រាសាទ ដាវីន បានបង្ហាញឱ្យពិភពលោកឃើញពីភាពខ្លាំងពូកែរបស់បវរកញ្ញាកម្ពុជា ដែលមិនត្រឹមតែមានរូបសម្រស់ស្រស់ស្អាត ថែមទាំងមានសមត្ថភាព ទេពកោសល្យ និងភាពក្លាហានក្នុងការប្រកួតប្រជែងថែមទៀតផង។

ប្រាសាទ ដាវីន  បានប្រកាសប្រាប់អ្នកគាំទ្រទូទាំងប្រទេសដោយមោទភាពថា «កម្ពុជា យើងធ្វើបានហើយ Top30» ដែលនេះជាសម្រែកដ៏មានឥទ្ធិពលបំផុតដែល Miss Universe Cambodia 2024 ស្រែកចេញពីប្រទេសម៉ិចស៊ីកូ។ 

បវរកញ្ញាចក្កវាឡកម្ពុជាឆ្នាំ២០២៤ មិនមែនត្រឹមតែបំពេញក្ដីស្រមៃខ្លួនឯងប៉ុណ្ណោះទេ តែនាងបានបំពេញក្ដីស្រមៃមនុស្សជាច្រើននាក់ ជាពិសេសក្រុមអ្នកគាំទ្រជាទីស្រលាញ់របស់នាង។ ថ្វីបើ ដាវីន មិនអាចបន្តទៅវគ្គបន្ទាប់ទៀតក៏ពិតមែន តែអ្នកគាំទ្រកម្ពុជាមានមោទនភាពយ៉ាងខ្លាំងចំពោះរូបនាង ហើយពួកគេបានអរគុណដែល ដាវីន ធ្វើឲ្យក្ដីស្រមៃដ៏ធំនេះក្លាយជាការពិត និងពោរពេញដោយមោទកភាព។

សូមជម្រាបផងដែរថា គិតចាប់តាំងពីឆ្នាំ២០១៧ រហូតមកទល់បច្ចុប្បន្ន រយៈពេល៧ឆ្នាំហើយដែលកម្ពុជាបានបញ្ជូនបវរកញ្ញាទៅចូលរួមប្រកួតកម្មវិធី Miss Universe ដែលរៀបចំធ្វើឡើងនៅតាមបណ្តាប្រទេសផ្សេងៗជុំវិញពិភពលោក។ 

 អ្នកនាង ប្រាសាទ ដាវីន ជាអ្នកម្តាយដំបូងគេបង្អស់ក្នុងស្រឡាយ Miss Universe Cambodia ដែលបានតំណាងកម្ពុជាចេញទៅប្រកួត Miss Universe លើកទី៧៣ នៅប្រទេសមិចស៊ីកូ ជាលទ្ធផលអ្នកនាងបានជាប់ក្នុងវគ្គ Top 30 និងបានឈ្នះពានមាស (Gold Winner) ក្នុងវិញ្ញាសារ Voice For Change ក្នុងការប្រកួត Miss Universe 2024 ថែមទៀតផង។ 

ទោះលទ្ធផលដែលទទួលបាននាពេលនេះ មិនទាន់ដូចក្តីរំពឹងរបស់អ្នកគាំទ្រយ៉ាងណាក្តី ប៉ុន្តែគ្រប់គ្នាសប្បាយចិត្ត និងរំភើបយ៉ាងខ្លាំងដែលបវរកញ្ញាចក្កវាឡកម្ពុជាឆ្នាំ២០២៤ បានបញ្ចេញពន្លឺដ៏ចែងចាំលើដំណើរផ្លូវចក្កវាឡ ហើយពួកគេសង្ឃឹមថា ទៅថ្ងៃអនាគតកម្ពុជាយើងនឹងអាចឈានដល់វគ្គ Top ចុងក្រោយក្នុងការប្រកួតបវរកញ្ញាធំជាងគេលំដាប់ពិភពលោកនេះ៕

អត្ថបទ៖ រ៉ាត់ ចាន់ធីតា រូបភាព៖ ផ្តល់ឱ្យ និងហ្វេសប៊ុក