ពិធីបុណ្យសពរបស់សមាជិក One Direction, Liam Payne (លៀម ផេន) ទើបតែត្រូវបានប្រារព្ធឡើងកាលពីថ្ងៃទី២០ ខែវិច្ឆិកា នៅព្រះវិហារឯកជនក្នុងតំបន់ Buckinghamshire (បាកឃីងហេមស្ហឺ) ទីក្រុងឡុងដ៍ ប្រទេសអង់គ្លេស រយៈពេលជាងមួយខែបន្ទាប់ពីតារារូបនេះបានស្លាប់ក្នុងវ័យ ៣១ឆ្នាំ។ 

ក្នុងចំណោមអ្នកចូលរួមកាន់ទុក្ខ គឺមានអតីតសមាជិកក្រុមចម្រៀង One Direction ទាំង ៤នាក់រួមមាន Harry Styles (ហារី ស្តាលស៍), Zayn Malik (ហ្សេន ម៉ាលីក), Niall Horan (ណាយ ហូរ៉ាន) និង Louis Tomlinson (លូអ៊ីស ថមលីនសុន) ព្រមទាំងក្រុមគ្រួសារ និងមិត្តភ័ក្តិរបស់សព។

មឈូសរបស់តារាចម្រៀងរូបនេះបានមកដល់ព្រះវិហារក្នុងរទេះពណ៌សជាមួយសេះសពីរក្បាល ហើយបានលម្អដោយកម្រងផ្កាជាមួយពាក្យថា "កូនប្រុស" និង "លោកប៉ា"។

តារាចម្រៀង Liam Payne ត្រូវបានគេប្រទះឃើញស្លាប់បន្ទាប់ពីបានធ្លាក់ពីយ៉រសណ្ឋាគារ ក្នុងទីក្រុងប៊ុយណូស៊ែ (Buenos Aires) ប្រទេសអាហ្សង់ទីន បង្កឱ្យមានការចូលរួមកាន់ទុក្ខពីអ្នកគាំទ្រជុំវិញពិភពលោក។

គួររំឭកថា Liam Payne និងអតីតមិត្តរួមក្រុមបានទទួលភាពល្បីល្បាញទូទាំងពិភពលោកក្នុងទសវត្សរ៍ឆ្នាំ ២០១០ បន្ទាប់ពីបានចូលប្រឡងក្នុងកម្មវិធី X Factor របស់ចក្រភពអង់គ្លេស ហើយផលិតករកម្មវិធី Simon Cowell ក៏បានបង្រួមបង្រួមពួកគេបង្កើតជាក្រុម One Direction នេះឡើង ៕
 

ប្រែសម្រួល៖ វ៉ាន់ថន