អ្នកគាំទ្រកម្ពុជាសប្បាយចិត្តយ៉ាងខ្លាំងដែលមានឱកាសបានជួបតារាថៃ ៥រូប តួអង្គក្នុងរឿង «ប្រមាញ់ព្រាយ ២» ដោយបានសំណេះសំណាល ថតរូបលេងកម្សាន្តជាមួយគ្នាដោយផ្ទាល់ថែមទៀតផង។

សន្ទុះគាំទ្រយ៉ាងខ្លាំងក្លាពីសំណាក់យុវវ័យអ្នកនិយមទស្សនាភាពយន្តរន្ធត់ព្រឺព្រួច ជាពិសេសភាពយន្តរឿង «ប្រមាញ់ព្រាយ២» ជំរុញឱ្យ M Pictures Cambodia សហការគ្នាជាមួយរោងភាពយន្ត Major Cineplex Cambodia បានពាំនាំតារាសម្តែងប្រុសស្រី ៥រូប នៃភាពយន្តនេះមកកាន់ប្រទេសកម្ពុជា ជាជំនួបរវាងតួអង្គសម្តែង និងអ្នកគាំទ្រ ដើម្បីជាការថ្លែងអំណរគុណទៅកាន់ទស្សនិកជនដែលបានគាំទ្រកន្លងមក។

យុវវ័យអ្នកនិយមទស្សនាភាពយន្ត និងជាអ្នកគាំទ្ររឿងរន្ធត់នេះ បានបង្ហាញអារម្មណ៍រំភើបរីករាយការដែលបានជួបផ្ទាល់ជាមួយតួអង្គសម្តែងទាំង ៥រូប និងបានមកទស្សនារឿង «ប្រមាញ់ព្រាយ២» កាលពីថ្ងៃទី០៨ ខែវិច្ឆិកា ឆ្នាំ២០២៤ កន្លងមកនេះនៅឯរោងភាពយន្ត Major Cineplex By Smart សាខាផ្សារទំនើបអ៊ីអនម៉លភ្នំពេញ និងសាខាអ៊ីអនម៉ល សែនសុខ។ 

តារាថៃទាំង ៥រូប បានសំណេះសំណាលផ្ទាល់ជាមួយអ្នកគាំទ្រ លេងហ្គេមសប្បាយៗ និងបានថតរូបស្អាតៗទុកជាអនុស្សាវរីយ៍ជាមួយអ្នកគាំទ្រ។ មិនតែប៉ុណ្ណោះ ថែមទាំងឆ្លៀតថតរូបលេងកម្សាន្តនៅរង្វង់មូលវិមានឯករាជ្យយ៉ាងសប្បាយរីករាយថែមទៀត។

គួររំឮកផងដែរថា «ប្រមាញ់ព្រាយ២» ជាភាគថ្មីមួយដោយបង្ហាញយើងដឹងពីដើមកំណើតរបស់ព្រាយឈុតខ្មៅ និងមូលហេតុនៃការស្លាប់របស់វា និងមូលហេតុដែលវិញ្ញាណរបស់វានៅវិលវល់រហូតមកដល់បច្ចុប្បន្ន។ យក្ស ដែលជាកូនប្រុសច្បងក្នុងគ្រួសារបានសុំឪពុកម្ដាយទៅតាមប្រមាញ់ព្រាយនេះ ដើម្បីកុំឲ្យវាធ្វើបាបអ្នកដទៃបានទៀត។

ក្រោមការនាំមកនូវភាពយន្តភ័យរន្ធត់ទម្រង់បច្ចេកវិទ្យាអេក្រង់យក្ស IMAX  មកចែកជូនទស្សនិកជន M Picture Cambodia សង្ឃឹមថា ផលិតករក្នុងស្រុកអាចសិក្សាឈ្វេងយល់បន្ថែមពីការផលិតរឿងបែបរន្ធត់ សម្រាប់ចាក់ក្នុងសាល IMAX មកអភិវឌ្ឍន៍ការផលិតរឿងក្នុងស្រុកបាន ព្រោះរឿងដែលចាក់ក្នុង IMAX បានទាល់តែរឿងនោះមានគុណភាពស្តង់ដារភាពយន្ត និងបច្ចេកវិទ្យាខ្ពស់។រឿង «ប្រមាញ់ព្រាយ២» ឬ «Death Whisperer2» ភាពយន្តដ៏ព្រឺព្រួចដ៏មានភាពល្បីល្បាញកំពុងតែចាក់បញ្ចាំងនៅគ្រប់រោងភាពយន្តទូទាំងប្រទេសកម្ពុជា ចាំកាលទៀត កុំភ្លេចទៅទស្សនារឿងនេះឱ្យបានច្រើនកុះករ!

អត្ថបទ៖ រ៉ាត់ ចាន់ធីតា រូបភាព៖ ឆិល សុភ័ស្ត និង ផុ្តល់ឱ្យ