« ខ្សែចងក វគ្គ​២ » ជាភាពយន្តភ័យរន្ធត់ដែលរំលេចនូវការផ្សព្វផ្សាយពីតន្រ្តីបុរាណ ពិសេសវង់ភ្លេងពិពាណ្យ ដោយក្នុងនោះប្រជុំទៅដោយសិល្បករវ័យក្មេងដ៏មានទេពកោលស្យ បានរៀបចំសម្ពោធដាក់បញ្ជាំងកាលពីថ្ងៃទី ០៩ ខែ តុលា កន្លងមកនេះនៅរោងភាពយន្ត Legend បឹងកក់ ដោយមានវត្តមានសិល្បករសិល្បការិនីជាច្រើនចូលរួមអបអរសាទរ ។ 

ភាពយន្តថ្មីនេះគឺជាស្នាដៃថ្មីមួយទៀតរបស់ ឲផលិតកម្ម PDS ដែលឆ្លុះបញ្ចាំងពីការអប់រំ លាយឡំនិងឈុតឆាកកំប្លែង  ភ័យ រន្ធត់ ដែលនឹងធ្វើឱ្យទស្សនិកជនជក់ចិត្តឌិតអារម្មណ៍បន្ទាប់ពីបានទស្សនារួច។

បើតាមការរៀបរាប់អ្នកនាង ជុន សុធា ដែលជាម្ចាស់ផលិតកម្ម PDS បានបញ្ជាក់ប្រាប់ថា « ខ្សែចងក វគ្គ២ » នេះ កាន់តែពិសេសនិងមានឈុតឆាកជាច្រើនដែលកាន់តែគួរឱ្យចាប់អារម្មណ៍ជាងវគ្គ ១ ។ អ្វីដែលធ្វើឱ្យអ្នកនាងមានការសោកស្តាយនោះគឺលោក ទេព រិនដារ៉ូ បានជួបគ្រោះថ្នាក់ដោយចៃដន្យនៅពេលដែលថតឈុតមួយចំនួន ។

« ខ្សែចងក វគ្គ២ » ចាប់ផ្តើមបញ្ចាំងជាផ្លូវការចាប់ពីថ្ងៃទី ១០ ខែ តុលា នេះតទៅនៅគ្រប់រោងភាពយន្តទូទាំងខេត្តក្រុង ។ សម្រាប់តួអង្គសំខាន់ៗនៅក្នុងរឿង « ខ្សែចងក » រួមមានលោក ទេព រិនដារ៉ូ , លឹម ជាឡាយ នាយ គ្រឿន កញ្ញា សួង ស៊ីធឿន និងសិល្បករថ្មីចាស់ជាច្រើនរូបទៀត ។

លោក លឹម ជាឡាយ ដែលជាតួអង្គសំខាន់មួយរូបនៅក្នុងរឿងនេះបង្ហាញពីចំណាប់អារម្មណ៍របស់ខ្លួនថា រឿង «​ ខ្សែចងក វគ្គ ២ » គឺកាន់តែអស្ចារ្យជាងវគ្គ ១ ពីព្រោះក្នុងរឿងនេះបង្កប់ទៅដោយអាថ៌កំបាំងជាច្រើន ។

អត្ថបទ ៖ ម៉ា រីសា រូបភាព ៖ ឃាង ទូច