ថ្ងៃអង្គារ៍ ទី៣០ ខែមេសា ឆ្នាំ២០២៤
ថ្ងៃអង្គារ៍ ទី៣០ ខែមេសា ឆ្នាំ២០២៤
ស្របពេលគ្រងតំណែង « ធីតាឯកសង្រ្កាន្ត » រដូវកាលទី ៥ កញ្ញា គឺ ស្រីនុត បានបង្ហាញនូវការលំបាកជាច្រើនក្នុងការថតតួអង្គទេវឆ្នាំថ្មីព្រះនាម មហោទរាទេវី តែទោះជាយ៉ាងណាកញ្ញា គឺ ស្រីនុតបានខំប្រឹងប្រែងសម្តែងអស់ពីសមត្ថភាពដើម្បីទទួលបានលទ្ធផលល្អដូចដែលមហាជនបានឃើញ ។
មហាជនជាច្រើនបានផ្ទុះការសរសើរចំពោះវិដេអូផ្ទេរតំណែងទេវតាឆ្នាំថ្មីព្រះនាម មហោទរាទេវី ដែលសម្តែងដោយតារាស្រី គឺ ស្រីនុត បើទោះបីជានាងនៅក្មេងមិនមានបទពិសោធខាងសិល្បៈ ប៉ុន្តែនាងពិតជាសក្តិសមនិងតំណែងនេះខ្លាំងណាស់ ។ នៅពីក្រោយរូបភាពនៃការថតឈុតឆាកទេវតាឆ្នាំថ្មីនេះ កញ្ញា គឺ ស្រីនុត បានជួបនូវការលំបាកជាច្រើន ទំរាំតែថតបានឈុតដ៏ល្អឯកឱ្យមហាជនបានទស្សនា។
មុននឹងថតតួអង្គទេវតាឆ្នាំថ្មីនេះ កញ្ញា គឺ ស្រីនុត បានហាត់រៀនសមជាមួយគ្រួជំនាញៗ ទាំងការ និយាយស្តី និង ការដើរជាដើម ដើម្បីឱ្យសមទៅនឹងតួអង្គទេវតាឆ្នាំថ្មី ជាក់ស្តែងនៅថ្ងៃហាត់សមថតតួអង្គទេវតានេះ គឺនាងបានជួបនូវហេតុការណ៍ជាច្រើន ។
កញ្ញា គឺ ស្រីនុត បានប្រាប់ថា នៅថ្ងៃហាត់សមនោះ នាងមានអារម្មណ៍ថា ឈឺក្បាលខ្លាំង ថប់ដង្ហើមពិបាកក្នុងខ្លួន ទ្រាំសឹងតែពុំបាន ដំបូងនាងគិតថានាងធ្វើមិនបានល្អទេ ព្រោះចេះតែមានរឿងរ៉ាវផ្សេងៗកើតឡើង ។ ដោយឡែកនៅថ្ងៃក្រុងពាលីចេញថតមែនទែន ស្រាប់តែនាងមានអារម្មណ៍ល្អប្រសើរឡើងវិញ បន្ទាប់ពីបានអុជធូបបន់ស្រន់ទៅតាមប្រពៃណី និងសុំឱ្យខ្លួនសុខសប្បាយ ។
កញ្ញាពិតជារំភើបចិត្តខ្លាំងនៅពេលដែលគ្រងឈុតទេវតាឆ្នាំថ្មី ជាពិសេសនៅពេលដែលថតឈុតជិះសត្វពាហនៈ គឺកាន់តែធ្វើឱ្យនាងមានអារម្មណ៍ថា ខ្លួនពិតជាអស្ចារ្យ និងមានសំណាងដែលបានគ្រងតំណែងមួយនេះ ។
បន្ទាប់ពីឃើញស្នាដៃដ៏ល្អរបស់បវរកញ្ញារូបនេះ ក្នុងតំណែងជាតួអង្គរទេវតាព្រះនាម មហោទរាទេវី បានធ្វើឱ្យមហាជនជាច្រើនផ្ទុះការសរសើរថា កញ្ញា គឺ ស្រីនុត ពិតជាធ្វើបានយ៉ាងល្អក្នុងតំណែងមួយនេះ ។
គួរបញ្ជាក់ផងដែរថា ក្រោយពីគ្រងម្ចាស់មកុដ « ធីតាឯកសង្រ្កាន្ត » រដូវកាលទី ៥ កញ្ញា គឺ ស្រីនុត កាន់តែមានហាងឆេងខ្ពស់នៅក្នុងការងារសិល្បៈ ទាំងការងារសប្បុរសធម៌ និងការងារថតម៉ូដផ្សេងៗ ។ កញ្ញា គឺ ស្រីនុត បានប្តេជ្ញាចិត្ត នឹងបំពេញការងារខ្លួនឱ្យល្អក្នុងនាមជា « ធីតាឯកសង្រ្កាន្ត » រដូវកាលទី ៥ ៕
អត្ថបទ ៖ ម៉ា រីសា រូបភាព ៖ អ៊ិន អាត