ក្នុងឆ្នាំ២០២៣នេះ តារាសម្តែងរូបសង្ហា ប៊ីរី (Berry) នឹងបង្ហាញវត្តមានក្នុងរឿងភាគថ្មីសន្លាងមួយរបស់ PNN ចំណងជើង «ហ្គេមជីវិត» ជាការផលិតរបស់ផលិតកម្ម PR។ តួឯកស្រីដែលនឹងប៉ះគ្នាជាមួយ ប៊ីរី ក្នុងរឿងនេះ គឺស្រីស្រស់សោភា សិទ្ធិ នីកា។ 

តួឯកប្រុសរូបនេះនិយាយថា ក្នុងរឿងនេះលោកសម្តែងជាតួអង្គចរិក play boy តែចុងក្រោយត្រូវមានវិបត្តិសារីដោយសារទង្វើរបស់ខ្លួនឯង។ តួអង្គបែបនេះមើលហាក់រៀងថ្មីបន្តិចសម្រាប់លោក ព្រោះកន្លងមកលោកធ្លាប់សម្តែងតួអង្គស្រដៀងនេះដែរ។ យ៉ាងណាមិញ លោកយល់ថាតួអង្គដែលលោកសម្តែងក្នុងរឿងខាងលើ មានបង្កប់អត្ថន័យអប់រំជាច្រើនសម្រាប់អ្នកទស្សនា។ 

បច្ចុប្បន្ន រឿង «ហ្គេមជីវិត» កំពុងដំណើរការថត ដូច្នេះស្សនិកជននឹងបានទស្សនារឿងនេះលើកញ្ចក់ទូរទស្សន៍ទំនើប PNN នាពេលឆាប់ៗ។ ក្រៅពីស្នាដៃរឿងភាគ «ហ្គេមជីវិត» របស់ PNN ប៊ីរី ក៏ទទួលថតរឿងអប់រំខ្លីៗជាច្រើន និងមានថត MV ជាច្រើនទៀតផងដែរ ត្រៀមបង្ហាញក្នុងឆ្នាំថ្មី២០២៣។

គួររំលឹកផងដែរថា មកទល់ពេលនេះរយៈពេលប្រមាណជាង១០ឆ្នាំហើយដែល ប៊ីរី ប្រឡូកវិស័យសិល្បៈខ្មែរ។ ច្រើនឆ្នាំមកនេះ តារាសម្តែងដែលមានរូបរាងស្រស់សង្ហាខ្ពស់ ប៊ីរី ទទួលបានការគាំទ្រខ្លាំង និងមានប្រជាប្រយិភាពខ្ពស់ក្នុងការសម្តែងរឿង ការថត MV និងជាតារាម៉ូដែលផងដែរ៕ 

អត្ថបទ៖ រ៉ាត់ ចាន់ធីតា រូបភាព៖ ឃាង ទូច