បន្ទាប់ពីខកខានបញ្ចេញសា្នដៃភាពយន្តថ្មីៗព្រោះកូវីដ១៩ «ស្នេហា Private» ដែលជារឿងថ្មីទី១ក្នុងឆ្នាំ២០២២ របស់ផលិតកម្ម LD Picture ត្រៀមនឹងចាក់បញ្ចាំងតាមបណ្តារោងភាពយន្តនៅថ្ងៃទី១៤ ខែមេសាស្អែកនេះនេះតទៅ។

បន្ទាប់ពីខកខានបញ្ចេញសា្នដៃភាពយន្តថ្មីៗរយៈពេលជាយូរ ព្រោះតែបញ្ហាការរាតត្បាតជំងឺកូវីដ១៩នៅកម្ពុជា ទីបំផុតផលិតកម្ម LD Picture ដាច់ចិត្តទម្លាក់រឿងថ្មីលើលើរោងភាពយន្ត។ រឿងថ្មីសន្លាងចំណងជើង «ស្នេហា Private» ត្រូវផលិតកម្ម LD Picture សម្ភោធចាក់បញ្ចាំងយ៉ាងអធិកអធមនៅល្ងាចថ្ងៃទី១២ ខែមេសា ឆ្នាំ២០២២ នៅបរិវេន K Mall ស្ថិតនៅតាមបណ្តោយផ្លូវវេងស្រេង ដោយមានការចូលរួមយ៉ាងច្រើនកុះករពីសំណាក់សិល្បករខ្មែរយ៉ាងច្រើនកុះករ។

«ស្នេហា Private» ឬ «Private Love» ត្រូវតែងនិពន្ធឡើងជាពិសេសដោយផ្អែកលើតថភាពពិតក្នុងសង្គមនាពេលបច្ចុប្បន្ន ដែលអ្នកខ្លះចូលចិត្តបើកបង្ហាញទំនាក់ទំនងស្នេហាដែលមាន ខ្លះទៀតចូលចិត្តស្នេហាបែបលួចលាក់ ស្រលាញ់គ្នាលួចលាក់ ឈឺចាប់លួចលាក់។ រឿងនេះទៀតសោធន៍ ក៏មានបង្កប់អត្ថន័យអប់រំ និងគុណតម្លៃជាច្រើនផងដែរ ពោលគឺបង្រៀនឱ្យយើងចេះស្មោះត្រង់ហ៊ានប្រឈមមុខជាមួយស្ថានភាពដែលបានកើតឡើង និងបង្ហាញឱ្យឃើញថា សេចក្តីស្នេហាមិនមែនជារឿងមិនល្អ តែស្នេហាអាចកែប្រែរឿងមិនល្អមួយចំនួនមកជារឿងល្អបាន ប្រសិនយើងជ្រើសរើសមានស្នេហាបែបត្រឹមត្រូវ។

ព្រោះទេពកោសល្យ និងសមត្ថភាពកំប្លែងពីកំណើតរបស់តារាកំប្លែងនាយគ្រឿន ធ្វើឱ្យរឿង «ស្នេហា Private» ពោរពេញដោយភាពកំប្លុកកំប្លែង ពិសេសកាយវិការទឹកមុខរបស់លោក គួបផ្សំទេពកោសល្យសម្តែងរបស់តារាចម្រៀងមុខជ្រុងៗ នូ ឧសភា និងស្រីស្អាតវ័យក្មេង២រូបគឺកញ្ញា ម៉ូនីតា និងស្រី លិក ធ្វើឱ្យអ្នកចូលទស្សនានាថ្ងៃបើកសម្ភោធផ្ទុះសំណើចយ៉ាងកងរំពងពេញរោងភាពយន្តតែម្តង។

លោក លៀក លីដា ចាងហ្វាងផលិតកម្ម LD Picture បានប្រាប់ឱ្យ PNN ដឹងថា លោករីករាយដែលចាប់ផ្តើមមានភាពយន្តខ្មែរតាមបណ្តារោងភាពយន្តវិញ បន្្ទាប់ពីខកខានរយៈពេលជាយូរ។ ការជ្រើសរើសរឿង «ស្នេហា Private» ជាការបើកទំព័រនៃការដាក់រឿងលើរោងភាពយន្តឡើងវិញនៅពេលនេះ ព្រោះ LD Picture ចង់ផ្តល់ភាពសប្បាយរីករាយដល់អ្នកមើល តាមរយៈសាច់រឿងស្នេហាបែបកំប្លែង ដើម្បីឱ្យគ្រប់គ្នាបានរំសាយអារម្មណ៍ធុញថប់ដែលកើតមានដោយសារជំងឺកូវីដ១៩។

ផ្នែកលើគុណភាពសាច់រឿង បច្ចេកទេសទំនើបក្នុងការផលិត និងការសម្រិតសម្រាងប្លង់ និងតួអង្គ លោកជឿជាក់យ៉ាងមុតមាំថា រឿងនេះនឹងទទួលការគាំទ្រពីទស្សនិកជន។កុំភ្លេចមកទទួលភាពរីករាយជាមួយរឿង «ស្នេហា Private» ជារឿងស្នេហាបែបកំប្លុកកំប្លែង។ រឿងនេះ ចាប់ចាក់បញ្ចាំងតាមបណ្តារោងភាពយន្តចាប់ពីថ្ងៃទី១៤ ខែមេសាស្អែកនេះតទៅ៕
 

អត្ថបទ៖ រ៉ាត់ ចាន់ធីតា រូបភាព៖ ឃាង ទូច