អ្នកជំនាញ បានអះអាងថា កម្ពុជា ត្រូវការឈាម ប្រមាណ ១៨ម៉ឺនប្លោកក្នុងមួយឆ្នាំ ដើម្បីជួយសង្គ្រោះដល់ ជីវិតមនុស្ស ខណៈការផ្គត់ផ្គង់តាមរយៈការបរិច្ចាគដោយស្ម័គ្រចិត្ត កើនឡើងគួរឱ្យកត់សម្គាល់។

លោកស្រីវេជ្ជបណ្ឌិត មើក សាមាន អនុប្រធានមជ្ឈមណ្ឌលជាតិផ្តល់ឈាម បានលើកឡើងថា ការបរិច្ចាគឈាម គឺមានប្រយោជន៍ខ្លាំងណាស់ ក្នុងការប្រើប្រាស់ដើម្បីសង្គ្រោះជីវិតដល់ ជនរងគ្រោះ និងអ្នកជម្ងឺ ដែលកំពុងត្រូវការឈាម។

លោកស្រី បន្តថា ជាធម្មតា យើងត្រូវការឈាមប្រមាណ ១% នៃប្រជាជនសរុបរបស់ប្រទេសកម្ពុជា ដែលស្មើទៅនឹង ១៨ម៉ឺនប្លោកក្នុងមួយឆ្នាំ ខណៈការផ្គត់ផ្គង់ឈាមតាមរយៈការបរិច្ចាគឈាមដោយស្ម័គ្រចិត្ត គឺមានការកើនឡើងគួរឱ្យកត់សម្គាល់ ហើយអាចកើនឡើងដល់ ១៧ម៉ឺនប្លោកក្នុងមួយឆ្នាំ។

ទន្ទឹមគ្នានេះ លោក ហូរ រតនៈ នាយកប្រតិបត្តិធនធានមនុស្សនៃធនាគារ អេស៊ីលីដា បានបញ្ជាក់ដែរថា នេះជាលើកទី ៩ហើយ ដែលកម្មករនិយោជិតធនាគារ អេស៊ីលីដា គ្រប់លំដាប់ថ្នាក់ នៅទូទាំងប្រទេស ចូលរួមបរិច្ចាគឈាម ដើម្បីជាការរួមចំណែកក្នុងសកម្មភាពសង្គម និងមនុស្សធម៌ សម្រាប់បំពេញ តម្រូវការកង្វះឈាមក្នុងការជួយសង្គ្រោះអាយុជីវិត ជូនដល់មជ្ឈមណ្ឌលជាតិផ្តល់ឈាម សម្រាប់ជួយសង្គ្រោះជនរងគ្រោះ និងអ្នកជំងឺដែលត្រូវការឈាមជាចាំបាច់ ជាពិសេសសម្រាប់ជួយជីវិតមនុស្សដែលត្រូវការសង្គ្រោះបន្ទាន់។

ជាចុងក្រោយ មជ្ឈមណ្ឌលជាតិផ្តល់ឈាម ក៏បន្តអំពាវនាវ ទៅកាន់ប្រជាពលរដ្ឋខ្មែរទូទាំងប្រទេស ជាពិសេសក្រុមយុវជន មេត្តាចូលរួមបរិច្ចាគឈាម ដើម្បីយកទៅជួយជនរងគ្រោះ ដែលត្រូវការឈាមជាចាំបាច់ ហើយសកម្មភាពទាំងនេះ ពិតជាបានចូលរួមចំណែកយ៉ាងខ្លាំង លើការជួយសង្រ្គោះជីវិតមនុស្ស៕
 

អត្ថបទ៖ ងួន សុភ័ត្រ្តា រូបភាព៖ អ៊ិន អាត