ថ្ងៃអង្គារ៍ ទី៣០ ខែមេសា ឆ្នាំ២០២៤
ថ្ងៃអង្គារ៍ ទី៣០ ខែមេសា ឆ្នាំ២០២៤
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានចេញប្រកាសនៅព្រឹកថ្ងៃទី២៥កុម្ភៈនេះ សម្រេចបណ្តេញជនជាតិចិនម្នាក់ ជាម្ចាស់កាសែត Angkor Today ទៅប្រទេសចិនវិញ បន្ទាប់ពីបានផ្សាយថា កម្ពុជាលក់វ៉ាក់សាំង ដែលជាជំនួយពីប្រទេសចិន។ បើតាមប្រកាស រដ្ឋមន្ត្រីមហាផ្ទៃ កំណត់ហាមឃាត់ជនជាតិចិនរូបនេះ លែងឲ្យចូលកម្ពុជាសាជាថ្មី។
លោក Shen Kaidong ត្រូវបានរដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង បណ្តេញចេញ និងលែងអនុញ្ញាតឲ្យចូលកម្ពុជាវិញ បន្ទាប់ពីស្ថាប័នព័ត៌មានរបស់លោក បានចុះផ្សាយអត្ថបទមួយក្រោមចំណងជើងថា កម្ពុជាលក់វ៉ាក់សាំងដែលជាជំនួយរបស់ចិន។
គួររម្លឹកថាក្រោយការចេញផ្សាយអត្ថបទនេះ កម្លាំងសមត្ថកិច្ច ក៏បានឃាត់ខ្លួនជនជាតិចិនរូបនេះ នៅថ្ងៃទី២៤ ខែកុម្ភៈម្សិលមិញ និងបញ្ជូនទៅឃុំបណ្តោះអាសន្ននៅស្នងការដ្ឋាននគរបាលខេត្តសៀមរាប ពោលគឺមួយថ្ងៃមុនប្រកាសបណ្ដេញចេញ។
នៅថ្ងៃនេះដែរ រដ្ឋមន្ត្រីក្រសួងព័ត៌មាន ឯកឧត្តម ខៀវ កាញារីទ្ធ ក៏បានចេញប្រកាសដាច់ដោយឡែកមួយទៀតសម្រេចដកអាជ្ញាបណ្ណរបស់កាសែត Angkor Todayរបស់លោក Shen ផងដែរ។
បើតាមប្រកាសរដ្ឋមន្ត្រីក្រសួងព័ត៌មាន ការដកអាជ្ញាបណ្ណនេះ គឺម្ចាស់កាសែត Angkor Today បានផ្សាយព័ត៌មានបំភ្លៃការពិត មានចេទនាទុច្ចរិតធ្វើឱ្យអន្តរាយដល់សុខភាពសាធារណៈ បង្កភាពច្របូកច្របល់ ចលាចលក្នុងសង្គមដែលអាចធ្វើឱ្យប៉ះពាល់ដល់សន្តិសុខជាតិ កិត្យានិភាពរាជរដ្ឋាភិបាល បំពានលើវិជ្ជាជីវៈ និងកិសន្យាជាមួយក្រសួង។
គួរកត់សំគាល់ដែរថា ក្នុងសារជាសំឡែងផ្ញើទៅកាន់ក្រុមអ្នកកាសែតលើបណ្តាញទំនាក់ទំនាងតេឡេក្រាម លោំទាវ ឱ វណ្ណឌីន អ្នកនាំពាក្យក្រសួងសុខាភិបាល បានបដិសេធចំពោះការចុះផ្សាយរបស់កាសែត Angkor Today និង បានស្នើឲ្យអាជ្ញាធរ ចាត់វិធានការផ្លូវច្បាប់ចំពោះការចុះផ្សាយនេះ។
សូមបញ្ជាក់ថា មកដល់នៅថ្ងៃទី២៥ កុម្ភៈនេះ ស្នងការដ្ឋាននគរបាលខេត្តសៀមរាប បានបញ្ជូនម្ចាស់លាសែត Angkor Today មកកាន់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃហើយ ដើម្បីរៀបចំនិតិវិធីបណ្ដេញចេញតាមប្រកាសរដ្ឋមន្ត្រី៕
អត្ថបទ៖ រ៉េន រតនៈ រូបភាព៖ ឯកសារ