ថ្ងៃសៅរ៍ ទី១៨ ខែឧសភា ឆ្នាំ២០២៤
ថ្ងៃសៅរ៍ ទី១៨ ខែឧសភា ឆ្នាំ២០២៤
លោក Antony Blinken រដ្ឋមន្ត្រីការបរទេសអាមេរិកកាលពីថ្ងៃច័ន្ទ បានជំរុញឱ្យក្រុមហាម៉ាសទទួលយកយ៉ាងឆាប់រហ័សនូវសំណើរបស់អ៊ីស្រាអែល សម្រាប់បទឈប់បាញ់នៅក្នុងសង្គ្រាមនៅតំបន់ហ្គាហ្សា និងការដោះលែងចំណាប់ខ្មាំងអ៊ីស្រាអែលដែលក្រុមសកម្មប្រយុទ្ធប៉ាឡេស្ទីនចាប់ពង្រត់ទៅ។
«ក្រុមហាម៉ាស់មាននៅចំពោះមុខ នូវសំណើដែលមានលក្ខណៈវិសេសវិសាល និងសប្បុរសលើចំណែកនៃប្រទេសអ៊ីស្រាអែល»។ Blinken បាននិយាយនៅក្នុងកិច្ចប្រជុំនៃវេទិកាសេដ្ឋកិច្ចពិភពលោក( WEF)នៅក្នុងរដ្ឋធានី Riyadh ប្រទេសអារ៉ាប៊ីសាអូឌីត។
ចំណាប់ខ្មាំងសរុបចំនួន ២៥៣ នាក់ត្រូវបានចាប់ខ្លួន នៅក្នុងការវាយប្រហាររបស់ក្រុមហាម៉ាសលើភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ដែលក្នុងនោះជនជាតិអ៊ីស្រាអែលប្រហែល ១២០០ នាក់ក៏ត្រូវបានសម្លាប់ផងដែរ។ យោងអាជ្ញាធរប្រទេសអ៊ីស្រាអែល។
លោក David Cameron រដ្ឋមន្ត្រីការបរទេសអង់គ្លេសដែលស្ថិតនៅក្នុងទីក្រុង Riyadh សម្រាប់កិច្ចប្រជុំ( WEF)ផងដែរនោះ ក៏បានពណ៌នាសំណើរបស់អ៊ីស្រាអែលថា «មានចិត្ដសប្បុរស» ។
លោក Cameron ក៏ស្ថិតក្នុងចំណោមរដ្ឋមន្ត្រីការបរទេសជាច្រើននៅក្នុងទីក្រុង Riyadh រួមទាំងមកពីសហរដ្ឋអាមេរិក បារាំង ហ្ស៊កដានី និងអេហ្ស៊ីប ដែលជាផ្នែកមួយនៃការជំរុញកិច្ចការទូតដើម្បីបញ្ចប់សង្រ្គាមនៅហ្គាហ្សា។
អត្ថបទ៖ណាវ័ន្ត