ថ្ងៃអង្គារ៍ ទី០៧ ខែឧសភា ឆ្នាំ២០២៤
ថ្ងៃអង្គារ៍ ទី០៧ ខែឧសភា ឆ្នាំ២០២៤
រយៈពេល ១៨ ខែចុងក្រោយនេះ រាប់ចាប់ពីខែមករា ឆ្នាំ២០១៩ ដល់ខែមិថុនា ឆ្នាំ២០២០ មន្ត្រីឧទ្យានុរក្សនៃក្រសួងបរិស្ថាន និងមន្ត្រីនៃអង្គការសម្ព័ន្ធមិត្តសត្វព្រៃ និងស្ថាប័នពាក់ព័ន្ធ បានចុះល្បាតទាំងយប់ទាំងថ្ងៃចំនួនជាង ៧ពាន់លើក លើចម្ងាយផ្លូវជាង ២៤ម៉ឺនគីឡូម៉ែត្រ។ ក្នុងបេសកកម្មល្បាតព្រៃនេះ មន្ត្រីល្បាតបញ្ឈប់ការទន្ទ្រានដីខុសច្បាប់ចំនួន ១៧១ករណី និងជនល្មើសចំនួន ៨៧នាក់ ត្រូវបានបញ្ជូនទៅតុលាការ។
ទោះបីជាមានការរឹតបន្តឹងការអនុវត្តច្បាប់ និងបង្កើនសកម្មភាពអប់រំ ក៏បទល្មើសធនធានធម្មជាតិនៅតែបន្តកើតមាននៅក្នុងតំបន់ការពារធម្មជាតិនានា។ ជាក់ស្តែង មនុស្សចំនួន៨៧នាក់ ត្រូវបានបញ្ជូនទៅតុលាការ ពាក់ព័ន្ធនឹងបទល្មើសធនធានធម្មជាតិ ខណៈពាក្យបណ្តឹងមានចំនួន ២០៥ករណី និង៣០០ករណីទៀត រងការពិន័យអន្តរកាលតាមច្បាប់ស្តីពីតំបន់ការពារធម្មជាតិ។ នេះបើតាមការឲ្យដឹងពីឯកឧត្តម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន។
ឯកឧត្តមបានបញ្ជាក់ថា រយៈពេល ១៨ខែចុងក្រោយ រាប់ចាប់ពីខែមករា ឆ្នាំ២០១៩ ដល់ខែមិថុនា ឆ្នាំ២០២០ មន្ត្រីឧទ្យានុរក្សរបស់ក្រសួងបរិស្ថាន និងអង្គការសម្ព័ន្ធមិត្តសត្វព្រៃ បានចុះល្បាតទាំងយប់ទាំងថ្ងៃចំនួនជាង ៧ពាន់លើក លើចម្ងាយផ្លូវជាង ២៤ម៉ឺនគីឡូម៉ែត្រ នៅតំបន់ជួរភ្នំក្រវាញទំហំ ១,៤លានហិកតា គ្របដណ្តប់ក្នុងភូមិសាស្ត្រខេត្តកោះកុង ពោធិ៍សាត់ និងកំពង់ស្ពឺ។
ឯកឧត្តមបានបន្ថែមថា ក្នុងប្រតិបតិ្តការនេះ កម្លាំងល្បាតបានបញ្ឈប់ការទន្ទ្រានដីដោយខុសច្បាប់ចំនួន ១៧១ករណី រុះរើខ្ទមខុសច្បាប់ជិត១ពាន់កន្លែង ដកហូតឈើចំនួនជាង ២ពាន់ម៉ែត្រគូប ដកហូតនិងរឹបអូសរណាយន្តជិត ២ពាន់គ្រឿង ដោះអន្ទាក់បានចំនួនជាង ៣ម៉ឺនអន្ទាក់ ជួយសង្គ្រោះសត្វព្រៃរស់ និងស្លាប់ជិត១ពាន់ក្បាល រួមទាំងរឹបអូសរថយន្ត ត្រាក់ទ័រ ម៉ូតូ និងគោយន្តចំនួនជាង ៦០០គ្រឿង។
មន្ត្រីជាន់ខ្ពស់ក្រសួងបរិស្ថានរូបនេះ បានបន្តថា កិច្ចសហការល្អ និងការអនុវត្តច្បាប់ប្រកបដោយប្រសិទ្ធភាពក្នុងតំបន់ការពារធម្មជាតិពិតជាមានសារៈសំខាន់ណាស់ ក្នុងកិច្ចគាំពារបរិស្ថាន ការការពារធនធានធម្មជាតិ ការអភិរក្សជីវៈចម្រុះដែលកម្ពុជាមាន ពិសេសបានធ្វើឲ្យបទល្មើសកាប់បំផ្លាញព្រៃឈើ និងបរបាញ់សត្វព្រៃមានការថយចុះ។
សូមជម្រាបថា បច្ចុប្បន្ន កម្ពុជាមានតំបន់ការពារធម្មជាតិចំនួន ៦៩កន្លែង លើទំហំផ្ទៃដីចំនួន ៧,៣លានហិកតា ក្រោមការគ្រប់គ្រងរបស់ក្រសួងបរិស្ថាន។ ក្នុងនោះ មន្ត្រីឧទ្យានុរក្សនៃក្រសួងបរិស្ថានចំនួន១២៦០នាក់ កំពុងឈរជើងនៅតាមតំបន់ការពារធម្មជាតិនីមួយៗ ដើម្បីល្បាត ការពារ និងអភិរក្សធនធានធម្មជាតិ៕
អត្ថបទ៖ អឿន ភារ៉ា រូបភាព៖ សុខ ពិសិដ្ឋ