ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
នៅថ្ងៃទី២៤ ខែសីហានេះ កម្លាំងនគរបាលអគ្គនាយកដ្ឋានអន្តោប្រវេសន៍ នឹងធ្វើការបណ្តេញចេញជនជាតិចិន ចំនួន ១៦០ នាក់ ចេញពីប្រទេសកម្ពុជា។ ជនជាតិចិនទាំងនោះ ជាប់ពាក់ព័ន្ធនឹងករណីចាប់ជំរិតទារប្រាក់តាមប្រព័ន្ធ Internet ដែលត្រូវបានប៉ូលិសអន្តោប្រវេសន៍កម្ពុជា ចាប់ខ្លួន នៅគោលដៅចំនួន២ ស្ថិតនៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីដើមខែសីហា នេះ។
ឯកឧត្តម ឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានឲ្យដឹង នៅរសៀលថ្ងៃទី២៣ ខែសីហា ឆ្នាំ២០១៧ថា ជនជាតិចិនទាំង ១៦០នាក់ នឹងត្រូវបណ្តេញចេញទៅកាន់ស្រុកកំណើតរបស់ពួកគេវិញ នៅរសៀលថ្ងៃទី២៤សីហានេះ តាមព្រលានយន្តហោះអន្តរជាតិ ខេត្តសៀមរាប។
សូមបញ្ជាក់ថា កាលពីថ្ងៃទី២ ខែសីហា កម្លាំងនគរបាលអន្តោប្រវេសន៍ សហការជាមួយកម្លាំងនគរបាលខេត្តបន្ទាយមានជ័យ បានឃាត់ខ្លួនជនជាតិចិនជិត ២០០ នាក់ ដែលប្រព្រឹត្តបទល្មើស ឆបោក គំរាមកំហែង ជំរិតទារប្រាក់តាមប្រព័ន្ធ បច្ចេកវិទ្យា ទូគមនាគមន៍ (VOIP) ព្រមទាំងបានរឹបអូសវត្ថុតាង ប្រព្រឹត្តបទល្មើសមួយចំនួន និងបានរកឃើញបញ្ជីឈ្មោះជនរងគ្រោះ នៅប្រទេសចិន ដែលសម្រាប់គំរាមជំរិតទារប្រាក់៕
សូមទស្សនាព័ត៌មានជាវីដេអូ ៖
ប្រភព៖ PNN News