ខ្សែភាពយន្តភាគថៃថ្មីសន្លាងមួយទៀតគឺរឿង”បាបអយុត្តិធម៌ ដែលសាច់រឿងបរយាយពីខ្សែជីវិតបុរសម្នាក់ក្នុងគំនុំសងសឹកកាលពីជាង ១០ឆ្នាំមុននឹងបង្ហាញវត្តមានផ្លូវការលើកញ្ចក់ទូរទស្សន៍ PNN យប់នេះ!។

ខ្សែភាពយន្តភាពថៃ ត្រៀមនឹងចូលមកបម្រើអារម្មណ៍ទស្សនិកជនបន្ត ពីរឿង «កម្មសិទ្ធិស្នេហ៍» ដែលកំពុងតែឈានមកដល់ភាគបញ្ចប់ហើយនោះ គឺ រឿង «បាបអយុត្តិធម៌»។ ជាសាច់រឿងមួយ ផ្តើមចេញពីប្រវត្តិនៃការឈឺចាប់ និ់ងគំនុំសងសឹករបស់ម្នាក់ ដែលត្រឹមតែមួយប៉ព្រិចភ្នែក បានធ្វើឲ្យគេបាត់បង់គូជីវិត និងអនាគតទាំងអស់។ ជាមួយនឹងការមកដល់នៃខ្សែភាពយន្តភាគថៃថ្មីនេះដែរ ទស្សនិកជន នឹងបានទស្សនាពីឈុតឆាក ស្នេហា និងភាពវៃឆ្លាតរបស់មេធាវីស្រីស្អាតរូបស្រស់មួយ នៅក្នុងសំណុំរឿងក្តៅឃាតកម្ម ដែលត្រូវកាត់អស់ជាង ១០ ឆ្នាំមកហើយ។ 

«បាបអយុត្តិធម៌» មិនត្រឹមតែផ្តល់ជូននូវចំណីចក្ខុទៅដល់ទស្សនិកជនប៉ុណ្ណោះទេ ថែមទាំងបង្ហាញពីការសិក្សាស្រាវជ្រាវ រកនូវភាពស្អាតស្អំ ក៏ដូចជា មេរៀនជីវិតក្នុងការរៀនរំងាប់ចិត្ត បញ្ចប់កំហឹង ដោយការមិនតបតទៅគេវិញ ទើបជីវិតមានក្តីសុខ។ តួយ៉ាង ដូចជា តួអង្គប្រុស  តាវ៉ាន់ គឺជាមនុស្សដែលមានចិត្តស្មោះត្រង់ និងក្លាហាន ប៉ុន្តែថ្ងៃមួយ គេត្រូវបានចោទណប្រកាន់ពីបទសម្លាប់បុរសម្នាក់ដែលត្រូវជាឪពុករបស់គូដណ្តឹងខ្លួន។ សំណុំរឿងក្តីនេះ តាវ៉ាន់ គឺជាអ្នកចាញ់ក្តី ហើយត្រូវបានតុលាការកាត់ទោស ឲ្យជាប់គុកអស់រយៈពេលជាច្រើនឆ្នាំ។

ការពិត នៃឃាតករ បែរជានៅក្រៅគុក ហើយតាវ៉ាន់ ដែលជាមនុស្សត្រូវគេទម្លាក់កំហុស ត្រូវរស់នៅជាប់ឈ្មោះជាអ្នកទោសពីបទឃាតកម្ម។ តាវ៉ាន់ ឈឺចាប់យ៉ាងខ្លាំង ស៊ូរស់ជាមួយនឹងភាពអយុត្តិធម៌ក្នុងគុកជាច្រើនឆ្នាំ ហើយនៅថ្ងៃដែលគេត្រូវបានដោះលែងនោះ ក៏ជាថ្ងៃដែលគេតាំងចិត្តថា នឹងសងសឹកមនុស្សដែលធ្វើឲ្យគេត្រូវរងការចោទការប្រកាន់ចំពោះរឿងនេះ។

ពៀររំងាប់ដោយការមិនចងពៀរ ប៉ុន្តែតាវ៉ាន់់បែរជាព្យាយាមសាងខ្លួនឲ្យកាន់តែមានកំហុស ម្តងហើយម្តងទៀត ដោយសារតែខ្លួនចង់រកយុត្តិធម៌ឲ្យខ្លួនវិញ។ រឿងរ៉ាវ និងឧបសគ្គក្នុងជីវិតជាច្រើនរសជាតិ បានកើតឡើងទៅលើតាវ៉ាន់ ដែលពេលខ្លះធ្វើឲ្យស្នេហារបស់គេសឹងតែបរាជ័យទៀតផង។ ចុងក្រោយ តាវ៉ាន់ បានក្លាយជាជនសង្គមងងឹត ក្នុងពពួកអន្ធពាល ដោយសារតែគំនុំសងសឹងរបស់គេ។ 

តើដំណើរសាច់រឿងភាគថៃថ្មីនេះ នឹងបកស្រាយជាមួយនឹងឈុតឆាកល្អមើលយ៉ាងណានោះ សូមរង់ចាំទស្សនានៅក្នុងរឿង «បាបអយុត្តិធម៌» ដែលមានផ្សាយជូនទស្សនានៅលើកញ្ចក់់ទូរទស្សន៍ភីអិនអិន ចាប់ពីយប់ថ្ងៃសុក្រទី ០៥ ខែវិច្ឆិកា ឆ្នាំ ២០២១ នេះតទៅវេលាម៉ោង ០៩ យប់ ពីថ្ងៃព្រហស្បតិ៍ ដល់ថ្ងៃសុក្រ៕ 

អត្ថបទ និងរូបភាព៖ PNN