មហោស្រពភាពយន្តជប៉ុនឆ្នាំ២០២៤ ត្រៀមនាំយកភាពយន្តប្រកបដោយគុណភាព និងគុណតម្លៃអប់រំចំនួន ៦រឿង ទៅចាក់បញ្ចាំងលើផ្ទាំងសំពត់សរនៅ ខេត្តសៀមរាម ដើម្បីឱ្យប្រជាពលរដ្ឋាបានចូលទស្សនាដោយឥតគិតថ្លៃ ចាប់ពីថ្ងៃទី២៥ដល់ថ្ងៃ២៧ខែតុលាខាងមុខនេះ។

 
ឆ្នាំ២០២៤នេះ មហោស្រពភាពយន្តជប៉ុន ឬ Japanese Film Festival បានកំណត់គោលដៅចាក់បញ្ចាំងភាពយន្តចំនួន ៤ ខេត្ត-ក្រុង រួមមាន៖ ខេត្តបាត់ដំបង , កំពត , សៀមរាប និងរាជធានីភ្នំពេញ។ ក្នុងចំណោមខេត្ត-ក្រុងទាំង ៤ ខាងលើ ខេត្តបាត់ដំបង  និងកំពត បានចាក់បញ្ចាំងរួចរាល់ហើយ កាលពីអំឡុងខែកញ្ញាកន្លងទៅ ខណៈដែលការចាក់បញ្ចាំងភាពយន្តនៅខេត្តសៀមរាប នឹងត្រូវធ្វើឡើងចាប់ពីថ្ងៃទី២៥ ដល់ថ្ងៃទី២៧ ខែតុលា ឆ្នាំ២០២៤ ខាងមុខនេះ។

 
មហោស្រពភាពយន្តជប៉ុន ត្រៀមនាំយកខ្សែភាពយន្តចំនួន ៦ រឿង ដូចជា «The  Imaginary» «Let’s Go Karaoke!» «OUR SECRET DIARY» «SAND LAND» «OUT» និង «MATCHED» ទៅចាក់បញ្ចាំងលើផ្ទាំងសំពត់សរ នៃរោងភាពយន្តទំនើប Legend Cinema Heritage Walk ខេត្តសៀមរាម ដែលរឿងទាំង ៦ខាងលើជាភាពយន្តបែប​ដ្រាម៉ាមនោសញ្ចេតនា ​វាយតប់ កំប្លែង ភ័យរន្ធត់ និង​គំនូរ​ជីវចល​​បែបផ្សងព្រេងផងដែរ។

 
បងប្អូនអ្នករស់នៅខេត្តសៀមរាបអាចអញ្ញើញចូលរួមទស្សនាភាពយន្តជប៉ុនប្រកបដោយ​គុណ​តម្លៃ ក្នុងមហោស្រពភាពយន្តជប៉ុនដោយឥតគិតថ្លៃ ដោយគ្រាន់តែមកដល់ទីតាំងរោងភាពយន្តរយៈពេល ៣០នាទីមុនពេលរឿងចាក់បញ្ចាំង។ ដូច្នេះ កុំភ្លេចមកទស្សនាភាពយន្តក្នុងមហោស្រពភាពយន្តជប៉ុនឱ្យបានច្រើនកុះករ ដើម្បីសិក្សា​ស្វែង​យល់​ពី​វប្បធម៌ ប្រពៃណី ទំនៀមទំលាប់ ការ​រស់នៅ​របស់​ប្រជាជន​ជប៉ុនឱ្យបានកាន់តែច្រើនឡើង។ ព័ត៌មានលម្អិតពីកាលវិភាគចាក់ផ្សាយ លោកអ្នកអាចតាមដានទំព័រហ្វេសប៊ុកផ្លូវការ Japanese Film Festival – Cambodia។

 
គួររំឮកផងដែរថា មកទល់ពេលនេះរយៈពេលប្រមាណ ៩ឆ្នាំហើយ ដែលមហោស្រពភាពយន្តជប៉ុន បាននាំយកភាពយន្តជប៉ុនប្រកបដោយគុណភាព និងគុណតម្លៃមកចាក់បញ្ចាំងនៅរាជធានី​ភ្នំពេញ និង​ខេត្ត​មួយ​ចំនួននៃ​ព្រះរាជាណាចក្រ​កម្ពុជាយើង ដែលផ្តល់ឱកាសឱ្យប្រជាជនកម្ពុជាបានសិក្សារៀនសូត្របន្ថែមពី​វប្បធម៌ ប្រពៃណី ទំនៀមទំលាប់ ការ​រស់នៅ​របស់​ប្រជាជន​ជប៉ុន​ និងកត្តាផ្សេងៗជាច្រើនទៀតដែលឆ្លុះបញ្ចាំងតាមរយៈភាពយន្តដែលបាននាំយកមកចាក់បញ្ចាំង។

 
បន្ថែមពីលើការចាក់បញ្ចាំងភាពយន្ត ​ជប៉ុន​ក៏​បាន​ចូលរួម​ចំណែក​ក្នុង​ការ​បណ្តុះបណ្តាល​ជំនាញ​ភាពយន្ត​ជូន​ដល់​ផលិតករ និង​អ្នកបច្ចេកទេស​ភាពយន្ត​កម្ពុជាផងដែរ។ ជាក់ស្តែង កន្លងមក ក្រោម​កិច្ច​សហ​រវាង​មូលនិធិ​ជប៉ុន ការិយាល័យ​អាស៊ី​ភ្នំពេញ និង​នាយកដ្ឋាន​សិល្ប​ភាពយន្ត​នៃ​ក្រសួង​វប្បធម៌ និង​វិចិត្រសិល្បៈ និង​អង្គការ​ឈូករ័ត្ន​បាន​បើក​វគ្គ​បណ្តុះបណ្តាល​ជំនាញ​សរសេរ​អត្ថបទ​ភាពយន្ត ជំនាញ​ថត ជំនាញ​កាត់ត​ដំឡើង​រូប ព្រមទាំង​ជំនាញ​យក​សំឡេង ជូន​ដល់​សិក្ខាកាម​ដែល​ជា​យុវជន​កម្ពុជា​ និងទទួលបានផ្លែផ្កាជាទីគាប់ចិត្តផងដែរ។

 
តាមគម្រោងដែលបានគ្រោងទុក មហោស្រពភាពយន្តជប៉ុន (JFF 2024) នឹងបន្តមកចាក់បញ្ចាំងនៅរាជធានីភ្នំពេញអំឡុងខែវិច្ឆិកា និងធ្នូ ឆ្នាំ២០២៤ ខាងមុខនេះ។ តួយ៉ាង ការចាក់បញ្ចាំងលើកទី១ នឹងធ្វើឡើងនៅថ្ងៃទី ២៩-៣០ ខែវិច្ឆិកា , ការចាក់បញ្ចាំងលើកទី២ នឹងធ្វើឡើងនៅថ្ងៃទី ៦-៨ ខែធ្នូ និងលើកទី៣ នៅថ្ងៃទី១៣-១៥ ខែធ្នូ ឆ្នាំ២០២៤។ សាធារណជនអាចចូលរួមទស្សនាភាពយន្តជប៉ុនដោយឥតគិតថ្លៃដោយគ្រាន់តែមកដល់ទីតាំងរោងភាពយន្តរយៈពេល ៣០នាទីមុនពេលរឿងចាក់បញ្ចាំងតែប៉ុណ្ណោះ៕
 
 

អត្ថបទ៖ រ៉ាត់ ចាន់ធីតា រូបភាព៖ ឃាង ទូច