ស្នាដៃពិពរ័ណ៌ទោលលើកទី២ របស់សិល្បករ ព្រហ្ម អ៊ីរ៉ូ កំពុងតាំងបង្ហាញជាសាធារណៈ នៅទីស្នាក់ការស្នារដ្ឋបាលសិល្បៈ ចាប់ពីថ្ងៃ២៦ ខែមិថុនា ដល់ថ្ងៃទី២៩ ខែសីហា ឆ្នាំ២០២៥។

សិល្បករ ព្រហ្ម អ៊ីរ៉ូ បាននាំមកជូននូវពិពរ័ណ៌ទោលលើកទី២ របស់ខ្លួន ឈ្មោះថា «នេត្រាទស្សន៍» ដែលជាការប្រមូលផ្តុំនូវបទពិសោធន៍ បច្ចេកទេស និងគំនិតថ្មី ដើម្បីបង្ហាញពីទេសភាពស្ថាបត្យកម្មបែបសហគមន៍។ ស្នាដៃទាំងនេះ ជំរុញឱ្យអ្នកទស្សនាចំណាយពេលគិតទូលំទូលាយពីបញ្ហាប្រឈមនានាដែលសង្គមបច្ចុប្បន្នកំពុងប្រឈមមុខនៅក្នុងទិសដៅនៃការអភិរក្ស និងអភិវឌ្ឍន៍បរិស្ថាន។

«នេត្រាទស្សន៍» ជាស្នាដៃរូបថត ការដកបទពិសោធន៍លើបច្ចេកទេសសម្លេង និងកម្រងរូបភាពឯកសារនៃការស្រាវជ្រាវនាពេលកន្លងមក។ ដោយការមើលទៅធម្មជាតិ និងការសង្កេងលើទេសភាពស្ថាបត្យកម្មដែលបង្កើតឡើងដោយមនុស្សជាមួយទេសភាពស្ថាបត្យកម្មធម្មជាតិក្នុងសមុទ្រ។ សិល្បករបង្ហាញពីការប្រមូលផ្តុំគំនិត បច្ចេកទេស ការប្រាស្រ័យទាក់ទងគ្នារវាងមនុស្ស និងធម្មជាតិ ភាពរអេងឆ្ងល់ ការព្រួយបារម្ភ និងការពិចារណាជ្រាលជ្រៅលើបរិស្ថាន និងអនាគត។

ស្នាដៃរូបថត ការដកពិសោធន៍លើបច្ចេកទេសបង្កើតសម្លេង និងកម្រងរូបថតឯកសារមួយចំនួនពីស៊េរីរូបថត អង្គេតសាគរ ជាការងារកំពុងបន្តពីឆ្នាំ២០២០រហូតដល់បច្ចុប្បន្ននេះដែរ បានដាក់បង្ហាញនៅវិចិត្រសាលទីពិរ និងទីបី។ សិល្បករ អ៊ីរ៉ូ បានចាប់អារម្មណ៍យ៉ាងជ្រាលជ្រៅចំពោះធម្មជាតិ និងស្ថាបត្យកម្មជំរុញឱ្យមានការស្រាវជ្រាវលើទំនាក់ទំនងស្មុគស្មាញរវាងបរិស្ថានធម្មជាតិនៅក្នុងសមុទ្រ និងស្ថាបត្យកម្មទេសភាព។

អ៊ីរ៉ូ សង្គេតឃើញថា ផ្កាថ្មមានទម្រង់ដូចជាស្ថាបត្យកម្មដ៏ស្រស់ស្អាតដែលបង្កើតឡើងដោយធម្មជាតិ។ ផ្កាថ្ម និងទេសភាពស្ថាបត្យកម្ម បង្កើតស្រទាប់ជាច្រើនស្អេកស្កះក្នុងប្រព័ន្ធអេកូឡូស៊ី វាពិតណាស់ប្រព័ន្ធអេកូឡុស៊ី ដែលមានសុខភាពល្អវាជួយគាំទ្រដល់សុខុមាលភាពប្រចាំថ្ងៃនៃការរស់នៅរួមគ្នារវាងសត្វ ជីវចម្រុះជាមួយជម្រកធម្មជាតិ សីតុណ្ហភាពនៃបាតសមុទ្រ និងសហគមន៍មនុស្ស។ 

ក្នុងស្នាដៃនេហយើងមើលឃើញមានខ្សែបន្ទាត់ពន្លឺនៅជុំវិញ និងឆ្លងកាត់លើផ្កាថ្មដែលបង្ហាញពីទេសភាពស្ថាបត្យកម្ម។ ខ្សែបន្ទាត់ពន្លឺទាំងនេះអាចជាការបំភ្លឺ ការកើនរំលឹកស្មារតីសាធារណៈចំពោះស្ថាបត្យកម្មធម្មជាតដ៏អស្ចារ្យ និងជាសិល្បៈសម្រាប់ការពារព្រំដែនធម្មជាតិ។ ស្នាដៃទាំងនេះ បង្ហាញឱ្យឃើញពីសោភណ័ភាពស្ថាបត្យកម្មធម្មជាតិ ហើយក៏ជាការដាស់ស្មារតីអ្នកទាំងអស់គ្នាឱ្យយកចិត្តទុកដាក់អំពីផលប៉ះពាល់នៃសកម្មផាពរបស់មនុស្សទៅលើសមុទ្រ។

បច្ចុប្បន្ន «នេត្រាទស្សន៍» របស់សិល្បករ ព្រហ្ម អ៊ីរ៉ូ កំពុងតាំងបង្ហាញជាសាធារណៈ នៅទីស្នាក់ការស្នារដ្ឋបាលសិល្បៈ ដែលមានអាស័យដ្ខាន ផ្ទះលេខ១៦ ផ្លូវបេតុងវត្តនិរោធ (បុរី សម្បត្តិមានហេង៣) ភូមិតាងៅកណ្តាល សង្កាត់និរោធ ខណ្ឌច្បារអំពៅ រាជធានីភ្នំពេញ ចាប់ពីថ្ងៃ២៦ ខែមិថុនា ដល់ថ្ងៃទី២៩ ខែសីហា ឆ្នាំ២០២៥។ សូមធ្វើការទំនាក់ទំនងជាមុន សម្រាប់ការណាត់ជួបទស្សនាស្នាដៃពិពរ័ណ៌ទោល «នេត្រាទស្សន៍»៕

អត្ថបទ៖ រ៉ាត់ ចាន់ធីតា រូបភាព៖ ផ្តល់ឱ្យ