រយៈពេលប៉ុន្មានថ្ងៃកន្លងទៅនេះ ការបំភ្លឺគោមអបអរចូលឆ្នាំថ្មីត្រូវបានរៀបចំឡើងនៅកន្លែងជាច្រើននៅទូទាំងប្រទេសចិន នាំមកនូវទិដ្ឋភាពដ៏ទាក់ភ្នែកសម្រាប់ភ្ញៀវទេសចរ។

នៅខេត្តក្វាងចូវ ពិធីបុណ្យពិព័រណ៍ចង្កៀងគោម Greater Bay ឆ្នាំ ២០២៥ បានចាប់ផ្ដើមប្រារព្ធឡើងជាមួយការបំភ្លឺភ្លើងពណ៌ចិញ្ចែញចិញ្ចាចនៅក្នុងស្រុកណានសា ចាប់ពីថ្ងៃទី ២២ ខែមករា។ ព្រឹត្តិការណ៍នេះបានទាក់ទាញអ្នកទស្សនាផ្ទាល់ និងតាមអ៊ីនធឺណិតរាប់លាននាក់ តាមរយៈទិដ្ឋភាពដ៏គួរឱ្យភ្ញាក់ផ្អើលនៃការបំភ្លឺចង្កៀងគោមមួយម៉ឺនគ្រាប់ពេលរាត្រី។

ពិធីបុណ្យនេះមានតំបន់សំខាន់ៗចំនួនបី និងមានប្រធានបទសំខាន់ៗចំនួនប្រាំ ក៏ដូចជាការដំឡើងចង្កៀងជារូបផ្សេងៗចំនួន ២១៨ ចង្កៀងដែលជាស្នាដៃរបស់សិប្បករបេតិកភណ្ឌវប្បធម៌អរូបីចំនួន ១ ពាន់នាក់។ ក្នុងចំណោមនោះក៏រួមបញ្ចូលនិមិត្តរូបផ្សេងៗនៃវប្បធម៌ទីក្រុង Greater Bay និងគំនិតផ្តួចផ្តើមខ្សែក្រវ៉ាត់ និងផ្លូវផងដែរ។

ក្រៅ​ពីពិធីបុណ្យ​នេះ​ក៏​មាន​ការ​តាំង​បង្ហាញ​ចង្កៀងគោមសម្រាប់ចូលឆ្នាំចិន​នៅ​តំបន់​ផ្សេងៗ​ទៀតជាច្រើន​នៃ​ប្រទេស​ចិន។ ជាក់ស្ដែង នៅភ្នំ Yantai (យ៉ានតាយ) ក្នុងទីក្រុង Fuzhou (ហ្វូចូវ) ការដំឡើងរូបភាពសិល្បៈ Outdoor ជាមួយសកម្មភាព "គូររូបពស់ដើម្បីបន្ថែមពរជ័យ" បានទាក់ទាញអ្នកទស្សនាជាច្រើន បង្កើតបានជាបរិយាកាសឆ្នាំថ្មីដ៏រឹងមាំ។

សួនឧទ្យាន Yuyuan (អ៊ូយ៉ន់) នៃទីក្រុងសៀងហៃត្រូវបានបំភ្លឺដោយចង្កៀងចម្រុះពណ៌ចាប់ពីថ្ងៃទី២៣ ខែមករា មុនថ្ងៃបុណ្យចូលឆ្នាំថ្មី។ ចង្កៀងពស់ដ៏ធំមួយត្រូវបានដាក់តាំងនៅទីលានធំដើម្បីអបអរឆ្នាំថ្មីឆ្នាំម្សាញ់ដែលឈានចូលមកដល់នៅថ្ងៃទី២៩ ខែមករា ខណៈចង្កៀងរូបផ្កា មេអំបៅ និងសត្វក្នុងទេវកថាជាច្រើនត្រូវបានតុបតែងនៅជុំវិញ។ 

ភ្ញៀវទេសចរជាច្រើនបានរីករាយនឹងបរិយាកាសពិធីបុណ្យ ខណៈអ្នកខ្លះបានស្លៀកសម្លៀកបំពពាក់បែបប្រពៃណីចិន។ ការតាំងបង្ហាញចង្កៀងគោមនៅទីក្រុងសៀងហៃនេះនឹងបន្ត​រហូតដលថ្ងៃទី១២ ខែកុម្ភៈ ៕

ប្រែសម្រួល៖ វ៉ាន់ថន