តារាចម្រៀងនិងសម្ដែងអាមេរិក Ariana Grande ឈ្នះពានរង្វាន់កិត្តិយសនៅកម្មវិធី National Board of Review ឆ្នាំ២០២៥ សម្រាប់ការសម្ដែងភាពយន្ត “Wicked”។

កម្មវិធីពានរង្វាន់ National Board of Review ហៅកាត់ NBR Awards ឆ្នាំ២០២៥ បានអបអរសាទរសមិទ្ធិផលពីខ្សែភាពយន្តដែលចេញកាលពីឆ្នាំមុន ជាមួយព្រឹត្តិការណ៍រៀបចំឡើងក្នុងទីក្រុង New York កាលពីល្ងាចថ្ងៃទី៧ ខែមករា។

ជយលាភីលេចធ្លោឆ្នាំមនេះមានដូចជា ពានរង្វាន់សម្រាប់អ្នកដឹកនាំឆ្នើមបានទៅលើលោក Jon M. Chu សម្រាប់ការដឹកនាំភាពយន្តល្ខោនតន្ត្រី "Wicked" ខណៈតារាសម្ដែងក្នុងរឿងនេះគឺ Cynthia Erivo (ស៊ីនធីអា រីវ៉ូ) និង Ariana Grande (អារីអាណា ក្រេនដេ) បានឈ្នះពានរង្វាន់ប្រជាប្រិយភាព ឬ Spotlight។

ពានរង្វាន់តួឯកប្រុសឆ្នើមបានទៅលើតារាសម្ដែង Daniel Craig (ដាញែល ក្រេក) សម្រាប់ការសម្ដែងភាពយន្ត "Queer" ខណៈពានតួឯកស្រីឆ្នើមបានទៅលើតារាសម្ដែង Nicole Kidman (នីខូល ឃីតមេន) សម្រាប់ភាពយន្ត "Babygirl"។

ពានរង្វាន់គួរឱ្យកត់សម្គាល់ផ្សេងទៀតរួមមាន ពានរង្វាន់តួរងប្រុសឆ្នើមបានលើតារាសម្ដែង Kieran Culkin (ឃារ៉េន ខាល់ឃីន) ពីភាពយន្ត "A Real Pain" និងពានតួរងស្រីឆ្នើមបានទៅ Elle Fanning (អ៊េល ហ្វេននីង) ពីភាពយន្ត "A Complete Unknown" និង ពានរង្វាន់តារាសម្ដែងល្បីជំនាន់ថ្មីបានលើតារាស្រី Mikey Madison (ម៉ាយឃី ម៉ាឌីសន់) ពីភាពយន្ត "Anora" ។

គួរបញ្ជាក់ថា កម្មវិធីពានរង្វាន់ National Board of Review ត្រូវបានប្រារព្ធឡើងជារៀងរាល់ឆ្នាំចាប់ពីឆ្នាំ១៩០៩ មក ដើម្បីផ្ដល់កិត្តិយសដល់អ្នកមានស្នាដៃ និងទេពកោសល្យក្នុងវិស័យភាពយន្ត ៕

ប្រែសម្រួល៖ វ៉ាន់ថន