អាយុទើបតែ៦ឆ្នាំប៉ុណ្ណោះ តែកុមារីតូចគួរឱ្យស្រលាញ់ សាន់ ម៉ាប៊ូតេ ចេះជំនាញសិល្បៈច្រើនមុខ ដោយឆ្នាំថ្មី២០២៥នេះ ប៊ូតេ ទទួលធ្វើការងារសិល្បៈគ្រប់មុខ ដើម្បីពង្រឹងស្នាដៃសិល្បៈទៅថ្ងៃអនាគត។

តារាម៉ូដែលវ័យក្មេងពោរពេញទេពកោសល្យសិល្បៈ សាន់ ម៉ាប៊ូតេ បានបង្ហាញខ្លួនយ៉ាងភ្ញាក់ផ្អើលជាមួយឈុតសម្លៀកបំពាក់ពណ៌ក្រហមទាក់ទាញ ក្នុងកម្មវិធីដើរបង្ហាញម៉ូដឈុតសម្លៀកបំពាក់ Fashion & Lifestyle ក្នុងបំណងអបអរសាទរពិធីបុណ្យ Christmas និង ថ្ងៃឆ្លងឆ្នាំសកល២០២៥ ដែលរៀបចំឡើងដោយក្រុមហ៊ុន CIM កាលពីថ្ងៃទី២៦ ខែធ្នូ ឆ្នាំ២០២៤ កន្លងទៅ នៅផ្សារទំនើបអូឡាំព្យារម៉ល។

រៀបរាប់ដោយទឹកមុខញញឹមប្រិយប្រិយ កុមារីគួរឱ្យស្រលាញ់ ម៉ាប៊ូតេ សប្បាយចិត្តដែលមានឱកាសបានចូលរួមដើរបង្ហាញម៉ូដកម្មវិធីនេះជាមួយមិត្តភ័ក្ត និងតារាម៉ូដែលរៀមច្បងជាច្រើនរូប។ 

ការដើរម៉ូដជាចំនូលចិត្តរបស់នាង ហើយកន្លងមកនាងតូចថ្ពាល់ខួចនេះក៏ធ្លាប់បានតំណាងឱ្យកម្ពុជាចូលរួមប្រកួតកម្មវិធីអន្តរជាតិ Little Miss - Mister Little World 2024 ដែលរៀបចំឡើងនៅទឹកដីព្រះរាជាណាចក្រកម្ពុជា កាលពីដើមខែវិច្ឆិកា ឆ្នាំ២០២៤ កន្លងទៅ។

 ទោះមិនជាប់ជយលាភីណាមួយ តែកុមារីឆ្លាតវ័យរូបនេះសប្បាយចិត្តខ្លាំងដែលបានតំណាងកម្ពុជាប្រកួតលើវេទិកាអន្តរជាតិ ហើយនាងនឹងយកបទពិសោធន៍នេះទៅពង្រឹងសមត្ថភាពបន្ថែមឱ្យរឹតតែខ្លាំងក្លា សម្រាប់ការប្រកួតផ្សេងៗនាពេលខាងមុខ។

អាយុទើបតែ ៦ឆ្នាំក៏ពិតមែន តែកុមារី សាន់ ម៉ាប៊ូតេ មានដុងទេពកោសល្យសិល្បៈពេញខ្លួន ដោយនាងមានសមត្ថភាពខ្ពស់លើការសម្តែង ការដើរម៉ូដ ការថតប្រម៉ូតផ្សព្វផ្សាយ រួមទាំងការតុបតែងខ្លួនឱ្យទាក់ទាញផងដែរ។

 ទទួលស្គាល់ថា ការដែលរៀនផងទទួលថតទាំងវ័យក្មេងផងធ្វើឱ្យកុមារីរូបនេះមានភាពហត់នឿយ តែដោយសារចំនូលចិត្ត និងការស្រលាញ់ ទើបម៉ូដែលតូចរូបនេះទទួលធ្វើការសិល្បៈគ្រប់មុខដែលផលិតករ និងបណ្តាក្រុមហ៊ុនទាក់ទងមក។ ម៉្យាង ក៏ដើម្បីពង្រឹងសមត្ថភាព និងអភិវឌ្ឍស្នាដៃសិល្បៈទៅថ្ងៃអនាគតផងដែរ។ 

ប្រសិនបើផលិតករ ឬភ្ញាក់ងារក្រុមហ៊ុនណាមួយចាប់អារម្មណ៍សមត្ថភាពកុមារីរូបនេះ អាចទំនាក់ការងារបានគ្រប់ពេលវេលា ដោយម៉ូដែលវ័យក្មេងពេញដោយសមត្ថភាពរូបនេះ ទទួលធ្វើការងារសិល្បៈគ្រប់មុខដូចជា ថតភាពយន្ត ស៉្បតពាណិជ្ជកម្ម ថតប្រម៉ូតផ្សព្វផ្សាយ និងចូលរួមកម្មវិធីផ្សេងៗជាដើម។ 

យ៉ាងណាមិញ ប្រសិនថ្ងៃក្រោយមានឱកាស នាងតូចគួរឱ្យស្រលាញ់រូបនេះអាចនឹងត្រឡប់មកប្រកួតកម្មវិធីបវរកញ្ញាវ័យក្មេងម្តងទៀត តែពេលនេះសូមពេលទទួលធ្វើការងារសិល្បៈសិន ដើម្បីជាទុនសម្រាប់ការវិលត្រឡប់មកវិញម្តងទៀត។

 ម៉ូដែលតូចពេញដោយសមត្ថភាព និងដុងទេពកោសល្យសិល្បៈរូបនេះសង្ឃឹមថា ពុកម៉ែបងប្អូននឹងបន្តគាំទ្រនាង ហើយនាងនឹងខំប្រឹងប្រែងឱ្យអស់ពីសមត្ថភាពដើម្បីបម្រើវិស័យសិល្បៈខ្មែរយើង៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច