កក្រើកឆាកប្រកួតមិនខានឡើយឆ្នាំនេះ ដោយតារាកំប្លែងគីឡូធ្ងន់ ផេនខេក ដាក់ពាក្យចូលរួមប្រកួតដណ្តើមមកុដបវរកញ្ញាភេទទី៣កម្ពុជាឆ្នាំ២០២៥ ដើម្បីបំពេញក្តីស្រមៃដ៏ធំរបស់នាង។

អ្នកសិល្បៈ និងបណ្តាអ្នកគាំទ្រវិស័យបវរកញ្ញាស្រឡាំងកាំងជាខ្លាំង ក្រោយឃើញការបង្ហោះរបស់ផេកផ្លូវការ Miss Queen Cambodia គ្រប់គ្រងដោយក្រុមហ៊ុន CIM បង្ហាញរូបថតបេក្ខភាពផ្លូវការតំណាងខេត្តព្រះសីហនុ ដែលម្នាក់នោះត្រូវគេស្គាល់ច្បាស់ថា ជាតារាកំប្លែងគីឡូធ្ងន់ ផេនខេក។

នេះជាលើកទី២ដែលពិធីការនីភេទទី៣ល្បីឈ្មោះ ផេនខេក ធ្វើឱ្យគ្រប់គ្នាផ្ទុះការចាប់អារម្មណ៍មកលើរូបនាងពាក់ព័ន្ធការដាក់ពាក្យប្រកួតបវរកញ្ញា ព្រោះកាលពីដើមឆ្នាំ២០២៤ តារាគីឡូធ្ងន់រូបនេះ ធ្លាប់ប្រកាសដាក់ពាក្យប្រកួតបវរកញ្ញាចក្កវាឡកម្ពុជាឆ្នាំ២០២៤ (Miss Universe Cambodia 2024 ) ម្តងរួចមកហើយ តែគួរឱ្យសោកស្តាយដោយសារបញ្ហាមួយចំនួនបានកើតឡើង ធ្វើឱ្យនាងខកខានមិនបានបំពេញក្តីស្រមៃតាំងពីតូចនោះ។

មិនខុសពីការដាក់ពាក្យប្រកួតលើកមុនប៉ុន្មានឡើយ ផេនខេក បោះជំហានចូលប្រកួតដោយភាពជឿជាក់ និងការត្រៀមខ្លួនយ៉ាងល្អ។ តួយ៉ាង លើទំព័រហ្វេសប៊ុកផ្លូវការរបស់នាងនាព្រឹកថ្ងៃទី២៥ ខែធ្នូ នេះ បានប្រកាសប្រាប់ឱ្យហ្វេនៗជួយគាំទ្ររូបនាងផង ដើម្បីនាងមានឱកាសសម្រេចក្តីស្រមៃដែលពុំទាន់បានសម្រេច។

គ្រាន់ដែលដឹងដំណឹងថា ផេនខេក ដាក់ពាក្យប្រកួត Miss Queen Cambodia 2025 អ្នកសិល្បៈជាច្រើន រួមទាំងបវរកញ្ញា និងបុរសឯកផងនោះ នាំគ្នាបង្ហាញភាពភ្ញាក់ផ្អើល និងសារលើកទឹកចិត្ត ដែលតារាគីឡូធ្ងន់រូបនេះក្លាហានហ៊ានជម្នះពាក្យរិះគន់ទាំងឡាយ ដើម្បីបំពេញក្តីស្រមៃរបស់ខ្លួនឯង។ 

គ្រាន់តែផេកផ្លូវការ Miss Queen Cambodia បង្ហោះរូបថតបេក្ខភាពផ្លូវការនេះភ្លាម អ្នកគាំទ្រជាច្រើនបាននាំគ្នាចូលទៅ Comment ពាក្យពេចន៍ល្អៗជាការលើកទឹកចិត្ត ផេនខេក តែទន្ទឹមគ្នានោះក៏មានមតិអវិជ្ជមានមួយចំនួនបានលេចឡើងលើ Comment ពាក់ព័ន្ធស្តង់ដានៃសម្រស់របស់បេក្ខភាពផងដែរ។ទោះជាយ៉ាងនេះក្តី ផេនខេក សមាជិកក្រុម MOMO Team ហាក់គ្មានភាពភ័យព្រួយអ្វីឡើយ ផ្ទុយទៅវិញនាងមើលទៅមានទំនុកចិត្ត និងភាពជឿជាក់លើសម្រស់ និងរូបរាងរបស់ខ្លួនឯង ខណៈសមភូមិប្រកួត Miss Queen Cambodiaស 2025 កំពុងជិតចាប់ផ្តើមនាពេលឆាប់ៗខាងមុខនេះ៕

អត្ថបទ៖ រ៉ាត់ ចាន់ធីតា រូបភាព៖ ភីអិនអិន និងហ្វេសប៊ុក