ព្រីកា អតីតក្មេងរើសសំរាមដែលមានប្រវត្តិតស៊ូយ៉ាងជូរចត់ក្នុងជីវិតនោះ បានប្រកាសយកថវិការបានពីការលក់សំបុត្ររឿង « រង់ចាំ » ដែលជាស្នាដៃដំបូងរបស់ខ្លួន ជួយដល់អង្គការ CCFដែលកំពុងខ្វះខាត ។ 

ទីបំផុតរឿង « រង់ចាំ » ដែលជាស្នាដៃដំបូងរបស់អតីតក្មេងរើសសំរាមលោក ព្រីកា ដែលទស្សនិកជនស្គាល់ថាជាកូនធម៌លោក Scott Neeson ជាប្រធានអង្គការ Cambodian Children Fun ហៅកាត់ ថា CCF ដែលបានរើសយកលោកទៅចិញ្ចឹមនោះ បានផលិតររួចរាល់ហើយ ហើយត្រៀមនឹងដាក់បញ្ចាំងនៅពាក់កណ្តាលខែ មករា ឆ្នាំ ២០២៥ ខាងមុខនេះ ។ 

« រង់ចាំ » គឺជាភាពយន្តមន្តអាគមអូមអាម ភ័យរន្ធត់ និង ព្រឺព្រួច ដែលផលិតឡើងដោយស្នាដៃ   ព្រីកា ផ្ទាល់នៅក្នុងផលិតកម្ម Partner Picture និងបានចំណាយដើមទុនផលិតច្រើនគួរសម ដើម្បីទទួលបានភាពយន្តដ៏មានគុណភាព ស្តង់ដាអន្តរជាតិ និងអាចនាំចេញទៅក្រៅប្រទេសបាន ជាពិសេសក្នុងរឿងនេះ គឺលោកបានទៅផ្តិតយករូបភាពនៅតាមតំបន់ដែលសក្តិសិទ្ធមួយកន្លែងនៅក្នុងស្រុក ល្វាឯម ខេត្តកណ្តាល ។ 

បន្ទាប់ពីចំណាយពេលវេលាផលិតរឿង « រង់ចាំ » អស់ពេលជិតមួយឆ្នាំ ទីបំផុតរឿងនេះបានផលិតនិងកាត់តរួចរាល់ជាស្ថាពរ និងត្រៀមដាក់បញ្ចាំងនៅថ្ងៃទី ១៦ ខែ មករា ឆ្នាំ ២០២៥ ។ មុនពេលដែលរឿងនេះដាក់បញ្ចាំងជាផ្លូវការ ព្រីកា បានឱ្យដឹងថា លោកមានបំណងយកថវិការដែលបានពីការលក់សំបុត្ររឿង « រង់ចាំ » យកទៅជួយអង្គការ Cambodian Children Fun ហៅកាត់ ថា CCF របស់លោក Scott Neeson ត្រូវជាឪពុកធម៌របស់លោកដែលបានរើសយកលោកពីគំនរសំរាមយកមកចិញ្ចឹម ពីព្រោះថា នៅអង្គការពេលនេះកំពុងជួបនូវការលំបាក និងខ្វះខាតច្រើន ។ 

ព្រីកា ដែលជាអ្នកនិពន្ធនិងដឹកនាំរឿង « រង់ចាំ » ដោយផ្ទាល់បានបញ្ជាក់បន្ថែមថា ក្នុងចន្លោះពេលដែលផលិតរឿងនេះក្រុមការងារបានជួបនូវរឿងចម្លែកៗជាច្រើន តែទោះជាយ៉ាងណាលោកនិងក្រុមការងារបានប្រឹងប្រែងផលិតរហូតដល់ចប់ និងទទួលបាននូវសមិទ្ធផលល្អមួយតាមអ្វីដែលខ្លួនបានគ្រោងទុក ។  គួរបញ្ជាក់ផងដែរថា លោក ព្រីកា គឺជាអតីតក្មេងរើសសំរាមមួយរួបដែលត្រូវបាន លោក Scott Neeson ដែលជាប្រធានអង្គការ Cambodian Children Fun ហៅកាត់ ថា CCF រើសយកទៅចិញ្ចឹមឱ្យរៀនសូត្របានខ្ពង់ខ្ពស់និងមានចំណេះដឹងលើផ្នែកជំនាញជាច្រើន លោកមិនដែលភ្លេចកំណើតរបស់ខ្លួនឡើយ ។

ព្រីកា បានសំណូមពរឱ្យមហាជនទាំងអស់ទៅចូលរួមគាំទ្រស្នាដៃដំបូងរបស់ខ្លួនឱ្យបានច្រើន ដើម្បីជូយដល់កុមារកំព្រានៅក្នុងអង្គការដែលកំពុងមានការខ្វះខាត រាល់ថវិការដែលបានពីការលក់សំបុត្រគឺលោកយកទៅជួយអង្គការ និងក្មេងៗដែលកំពុងជួបនូវការលំបាក ។ តួអង្គសំខាន់ៗនៅក្នុងរឿង « រង់ចាំ » រួមមានលោក នូ ឧសភា ,  សារី , កញ្ញា ពេជ្រ ចរណៃ និងកញ្ញា យូមិ ជាដើម...។ កុំភ្លេចចូលរួមគាំទ្រស្នាដៃដំបូងរបស់លោក ព្រីកា ទាំងអស់គ្នា ៕ 

អត្ថបទ ៖ ម៉ា រីសា រូបភាព ៖ ភីអិនអិន និង ផ្តល់ឱ្យ