ត្រឡប់មកទឹកដីកំណើតវិញមិនយូរប៉ុន្មាន បវរកញ្ញារូបស្រស់ ជា ចារ៉ានី ប្រញាប់ទទួលការងារសិល្បៈ តែមិនទាន់មានតម្រុយការចូលប្រកួតបវរកញ្ញា។នេះជាមូលហេតុចម្បងនៃការបាត់មុខពីសិល្បៈមួយរយៈធំរបស់បវរកញ្ញារូបស្រស់ ជា ចារ៉ានី។

Miss International Cambodia 2022 ឱ្យដឹងថា នាងនឹករលឹកការងារសិល្បៈខ្លាំងណាស់ ដូច្នេះទើបនាងទទួលធ្វើការងារសិល្បៈវិញភ្លាមក្រោយត្រឡប់មកដល់កម្ពុជាវិញ។

ទោះបីផ្លាស់ទីទៅរស់នៅប្រទេសឥណ្ឌាតាមតម្រូវការការងារជាបាហុនិកាក៏ពិតមែន តែ ចារ៉ានី ពុំដែលបោះបង់ចោលវិស័យបវរកញ្ញាម្តងណាឡើយ ដោយនាងនៅតែតាមដានកម្មវិធីប្រកួតយ៉ាងជាប់លាប់ និងមើលការវិវត្តន៍របស់កម្មវិធីនីមួយៗ ដែលបច្ចុប្បន្នកំពុងមានភាពរីកចម្រើនខ្លាំងគួរឱ្យកត់សម្គាល់។

កញ្ញា ជា ចារ៉ានី អះអាងថា នាងនៅតែស្រលាញ់ការប្រកួតបវរកញ្ញាជានិច្ច គ្រាន់តែពេលនេះនាងមិនទាន់អាច comeback មកប្រកួតជាថ្មីនោះឡើយ។ ប៉ុន្តែ នាងក៏មិនបិទឱកាសខ្លួនឯង ព្រោះបើថ្ងៃណាមួយពេលវេលាអំណោយផល ហើយនាងត្រៀមព្រមជាស្រេចនាងអាចនឹងត្រឡប់មកអង្រួនឆាកបវរកញ្ញាវិញក៏ថាបាន៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងភីអិនអិន