ធ្លាប់តែជាតួរាយរង និងតួអមឆាក ពេលនេះកញ្ញា រី ស្រីនេត ដែលជាលំដាប់រងទី១ Miss Grand Cambodia 2024 បានផ្លាស់ប្តូរទាំងស្រុងហើយ ដើម្បីទទួលបានតំណែងធំមួយនៅក្នុងពិភពសិល្បៈ ។ 

នារីដែលធ្លាប់តែមានសប្បុរខ្មៅស្រអែម និងមានជីវភាពលំបាករកតែម៉ូតូជិះទៅធ្វើការមិនបាននោះ ពេលនេះកញ្ញា រី ស្រីនេត បានផ្លាស់ប្តូរហើយ នាងមិនត្រឹមតែមានរូបសម្រស់ស្រស់ស្អាត និងមានកេរ្តិ៍ឈ្មោះក្នុងសិល្បៈនោះទេ នៅឆ្នាំថ្មីខាងមុខនេះ នាងត្រៀមវិឌ្ឍន៍ខ្លួនមួយជំហានទៀត ដើម្បីទទួលបានតំណែងតួឯកស្រី ។ 

កន្លងមកលំដាប់រងទី១ Miss Grand Cambodia 2024រូបនេះ ធ្លាប់តែដើរតួរាយរង និង តួអមឆាកប៉ុណ្ណោះ ហើយនាងក៏ធ្លាប់មានវត្តមាននៅក្នុងរឿងភាគរបស់ ភីអិនអិន ក្នុងរឿង « បុព្វេនិម្មិត » ផងដែរពេលនេះនាងគ្រាន់តែជាក្មេងស្រីធម្មតាដែលពុំសូវមានអ្នកស្គាល់ឡើយ ដោយឡែកនៅពេលដែលនាងបានជាប់លំដាប់រងទី ១ ពីការប្រកួតកាលពីពេលថ្មីៗ មក បានធ្វើឱ្យកេរ្តិ៍ឈ្មោះរបស់នាងប្រែប្រួល និងមានការងារធ្វើកាន់តែច្រើន ។ 

ជួបជាមួយ រី ស្រីនេត កាលពីពេលថ្មីៗនេះយើងចាប់អារម្មណ៍ឃើញថា កញ្ញា ពិតជាប្រែប្រួលខ្លាំង ទាំងសម្រស់ ការតុបតែងខ្លួន និងការសម្តែង។ ជាក់ស្តែងនៅលើឆាកនេះផ្ទាល់នាងបានបញ្ចេញអស់ពីសមត្ថភាព ធ្វើឱ្យអ្នកគាំទ្រលាន់មាត់សរសើរគ្រប់ៗគ្នា ។ កញ្ញា  បានឱ្យដឹងថា ឆ្នាំថ្មីនាងត្រូវផ្លាស់ប្តូរខ្លួនឯងថ្មីទាំងអស់ ។ 

ស្របពេលដែលកេរ្តិ៍ឈ្មោះកាន់តែល្បីល្បាញ កញ្ញា រី ស្រីនេត ក៏បានក្លាយទៅជា BA តំណាងផលិតផលជាច្រើន ដែលអាចធ្វើឱ្យនាងអាចរកប្រាក់ចំណូលបានច្រើនជាងមុន ដើម្បីពង្រឹងជីវភាពគ្រួសារ ។ ពេលនេះនាងមានរថយន្តជិះ មានផ្ទះនៅ មិនសូវខ្វះខាតដូចកាលពីមុនទេ ។

 រី ស្រីនេត ថែមទាំងនិយាយថា ប្អូនៗជំនាន់ក្រោយដែលមានការខ្វះខាត កុំអាល់អស់សង្ឃឹមក្នុងជីវិត ត្រូវតស៊ូតាមរកក្តីស្រមៃខ្លួន ថ្ងៃណាមួយយើងនិងជួប ប្រៀបដូចជារូបនាងជាដើម... ជាកូនអ្នកខេត្តដែលមានជីវភាពខ្វះខាត គ្មានម៉ូតូជិះ គ្មានអ្នកជួយជ្រោមជ្រែង ប៉ុន្តែនាងបានតស៊ូរហូតបានក្លាយទៅជាអ្នកសិល្បៈដែលមានមហាជនច្រើនស្គាល់ និងផ្តល់តម្លៃ  ៕ 

អត្ថបទ ៖ ម៉ា រីសា រូបភាព ៖ ញិល សុជា