ចូលសិល្បៈច្រើនឆ្នាំហើយតារាសម្តែងរូបសង្ហា ប្រុសខួច ទើបប៉ះរឿងព្រឺព្រួច បន្ទាប់ពីមានវត្តមាននៅក្នុងរឿង « ប៉ាឆាបូជាព្រាយ » ដែលជាភាពយន្តភ័យរន្ធត់លើកដំបូងក្នុងជីវិតរបស់ខ្លួន ។ 

តារាសម្តែងរូបសង្ហា ប្រុសខួច បានជួបរឿងព្រឺព្រួចនឹកស្មានមិនដល់នៅពេលដែលចូលរួមថតរឿង « ប៉ាឆាបូជាព្រាយ » ដែលជាស្នាដ៏ធំរបស់ខ្លួននៅក្នុងឆ្នាំ២០២៤នេះ ។ 

ផលិតកម្ម LD បានរៀបចំពិធីសម្ពោធរឿងថ្មីរបស់ខ្លួនមួយទៀតដែលមានចំណងជើងថា « ប៉ាឆាបូជាព្រាយ » កាលពីថ្ងៃទី ២៦ ខែ វិច្ឆិកា នេះ ដោយមានវត្តមានសិល្បករជាច្រើនចូលរួមអបអរសាទរ ក្នុងនោះតារាសម្តែងរូបសង្ហា ប្រុសខួច គឺជាតួឯកប្រុស ។ នេះជាលើកដំបូងហើយដែល ប្រុសខួច បានចូលរួមសម្តែងរឿងភ័យរន្ធត់បែបនេះ ។ 

« ប៉ាឆាបូជាព្រាយ » គឺជាភាពយន្តថ្មីមួយដែលនិពន្ធឡើងដោយលោក នួន បូលីន និងដឹកនាំរឿងដោយលោក អ៊ុន ប៊ុនធឿន ទំរាំតែបង្កើតបានសាច់រឿងភ័យរន្ធលាយឡំជាមួយជំនឿបុរាណ នេះឡើងបាន គឺជួបនូវឧបសគ្គជាច្រើន ។  កញ្ញា  លីម៉ី ដែលជាតួស្រីនៅក្នុងរឿងនេះ ក៏បានជួបហេតុការណ៍ដូចជាតារាសម្តែង ប្រុសខួច ផងដែរ ។ 

គួរបញ្ជាក់ផងដែរថា រឿង « ប៉ាឆាបូជាព្រាយ » នឹងដាក់បញ្ចាំងជាផ្លូវការនៅថ្ងៃទី ២៨ វិច្ឆិកានៅគ្រប់រោងភាពយន្ត ។ ភាពយន្តនេះមិនត្រឹមតែមានសាច់រឿងល្អមើល ផ្ទុះសំណើចលាយឡំជាមួយសម្រែក ភ័យរន្ធត់ ប្រហោងពោះប៉ុណ្ណោះទេ ថែមទាំងមានឈុតឆាកនិងរឿងអាថ៌កំបាំងជាច្រើនទៀតដែលនឹងធ្វើឱ្យអ្នកទស្សនាមិនខកបំណងឡើយ ។ 

ជាមួយនិងការលេចមុខក្នុងរឿងថ្មីនេះតារាសម្តែង ប្រុសខួច ក៏ត្រៀមនឹងបង្ហាញវត្តមានថ្មីនៅក្នុងរឿងថ្មីមួយទៀតផងដែរ ដើម្បីសាងស្នាដៃក្នុងសិល្បៈ បន្ទាប់ពីអវត្តមាននៅក្នុងវិស័យនេះអស់ពេលយ៉ាងយូរ ៕ 

អត្ថបទ ៖ ម៉ា រីសា  រូបភាព ៖  ឃាង ទូច