តារាសម្តែងរូបសង្ហា យិន មាសឧស្សាហ៍ ហៅ អេតវីន បានទុករឿងដ៏ខ្មៅងងឹតរបស់កាលពីអតីតកាលមួយឡែក ដើម្បីចូលរួមប្រកួតកម្មវិធី IFBB (International Fitness and Bodybuilding) នៅ ប្រទេសថៃ នាចុងសប្ដាហ៍នេះ។ក្រោយប្រកាសខ្លួនចូលបម្រើវិស័យសិល្បៈវិញ តារាសម្តែងសាច់ដុំកង់ៗ លោក យិន មាសឧស្សាហ៍ ហៅ អេតវីន ចាប់ផ្តើមកសាងកេរ្តិ៍ឈ្មោះឡើងវិញបន្តិចម្តងៗ ដើម្បីលុបលាងកំហុសអចេតនាពាក់ព័ន្ធរឿងរ៉ាវគ្រួសាររបស់លោក ដែលវាបានជះភាពអវិជ្ជមាន និងរូបភាពមិនល្អសម្រាប់សង្គមជាតិ។ 

ចាប់តាំងពីចូលសិល្បៈ អេតវីន ផ្តោតលើការថតភាពយន្តជាចម្បង និងឆ្លៀតពេលធ្វើជាគ្រូបង្វឹកហាត់ប្រាណផងដែរ។ ស្របពេលជាមួយគ្នានោះ តារាសម្តែងដែលធ្លាប់លេចធ្លោខ្លាំងក្នុងវិស័យភាពយន្តរូបនេះ ក៏បានចំណាយពេលហ្វឹកហាត់ និងសិក្សាស្វែងយល់អំពីកីឡាកាយវប្បកម្ម ហើយឆាប់ៗនេះ អេតវីន នឹងចូលរួមប្រកួតកម្មវិធី IFBB (International Fitness and Bodybuilding) នៅថ្ងៃទី ២៩-៣០ ខែវិច្ឆិកា ឆ្នាំ២០២៤ នៅទីក្រុងបាងកក ប្រទេសថៃ ។

តាមការបញ្ជាក់របស់សាម៉ីខ្លួន លោកបានហ្វឹកហាត់ត្រៀមរយៈពេល ៦ខែមុនកម្មវិធីប្រកួតមកដល់ ដើម្បីតម្លើង និងសម្រកគីឡូឱ្យត្រូវតាមលក្ខន្តិកៈរបស់ការប្រកួត។ កម្មវីធីនេះ ផ្តោតទៅលើបុរសដែលមានរូបរាងកាយសាច់ដុំមាំមួន គួបផ្សំជាមួយមុខមាត់សម្រក ស្រស់ស្អាត ដើម្បីទាក់ទាញ យកពិន្ទុពីគណៈកម្មការគ្រប់វិញ្ញាសារប្រកួត។

បេក្ខជនតម្រូវឱ្យមានសាច់ដុំស្ងួត ដែលមានជាតិខ្លាញ់ក្នុងខ្លួនតិចបំផុត ពេលឈរបង្ហាញខ្លួនលើឆាកនៅថ្ងៃប្រកួត ដើម្បីឱ្យ គណៈកម្មការដាក់ពិន្ទុលើរូបរាងបេក្ខជនណា ដែលមានសាច់ដុំមួយតួរខ្លួនស្អាត ស្ងួតប្រៀបផ្ទឹមជាមួយកីឡាករដ៍ទៃទៀតជុំវិញពិភពលោក។ ក្នុងនោះ កំលោះសង្ហារូបនេះ នឹងធ្វើការប្រកួត ២វិញ្ញាសារ គឺ សាច់ដុំផ្នែកខាងលើ  សាច់ដុំទាំងលើ ទាំងក្រោម ។ 

សម្រាប់ការប្រកួតពេលព្រឹកអ្នកដែលទទួលបានលេខមួយក្នុងក្នុងការប្រកួតជម្រុះក្នុងស្រុក  ទើបមានសិទ្ធដើម្បីទៅចូលរួមប្រកួតជាមួយអ្នកឈ្នះលេខមួយពីប្រទេសផ្សេងៗ ដើម្បីទទួលបាន (Professional Card Certified) ទើបមានសិទ្ធទៅប្រកួតយកឈ្មោះពីស្ថាប័ន្ថ IFBB  ដើម្បីមានសិទ្ធចូលជាកីឡាករលំដាប់ថ្នាក់ពិភពលោករបស់សហរដ្ឋអាមេរិក Mr Olympia ។

តារាសម្តែងរូបនេះសង្ឃឹមថា ពុកម៉ែបងប្អូននឹងគាំទ្រផ្តល់កម្លាំងចិត្តដល់រូបលោកក្នុងការប្រកួត IFBB នៅប្រទេសថៃ ហើយលោកប្តេជ្ញាបញ្ចេញឱ្យអស់ពីសមត្ថភាពដើម្បីឈ្នះការប្រកួតនេះ។

សូមជម្រាបផងដែរថា ក្រោយចប់ការប្រកួត IFBB នៅប្រទេសថៃ លោកនឹងងាកមកផ្តោតការងារសិល្បៈឡើងវិញ ដោយបើកទទួលគ្រប់ការងារសិល្បៈទាំងអស់ដែលមានបំណងចង់ហៅលោកទៅរួមការងារ។ មិនតែប៉ុណ្ណោះ លោកក៏មានគម្រោងត្រឡប់មកប្រឡូកវិស័យសម្រស់ និងកម្មវិធីបុរសឯកផងដែរ ដោយបច្ចុប្បន្នលោកកំពុងសម្លឹងមើលកម្មវិធីដែលស័ក្កសមសម្រាប់ត្រៀមពង្រឹងសមត្ថភាពក្រោយត្រឡប់ពីការប្រកួត IFBB នេះវិញ។

លោក យិន មាសឧស្សាហ៍ ហៅ អេតវីន នឹងធ្វើដំណើរចាកចេញពីកម្ពុជាទៅចូលរួមប្រកួតកម្មវិធី IFBB (International Fitness and Bodybuilding) នៅថ្ងៃទី២៨ ខែវិច្ឆិកា ស្អែកនេះ វេលាម៉ោង ៤រសៀល នៅអាកាសយានដ្ឋានអន្តរជាតិភ្នំពេញ៕

អត្ថបទ៖ រ៉ាត់ ចាន់ធីតា រូបភាព៖ ឯកសារ និងផ្តល់ឱ្យ