មហោស្រពជាតិភាពយន្តខ្លីកម្ពុជា លើកទី៤ ក្រោមពាក្យស្លោក «ភាពយន្តខ្នាតខ្លី ជាជំហានឆ្ពោះទៅកាន់ភាពយន្តខ្នាតវែង» នឹងរៀបចំពិធីបើកសម្ពោធជាផ្លូវការ នាថ្ងៃទី២៥ ខែវិច្ឆិកា ឆ្នាំ២០២៤ នៅសាលសន្និសីទចតុមុខ។ 

ក្រសួងវប្បធម៌ និងវិចិត្រសិល្បៈ បានផ្តួចផ្តើមប្រារព្ធរៀបចំមហោស្រពជាតិ ភាពយន្តខ្នាតខ្លីកម្ពុជាលើកទី៤ ឆ្នាំ២០២៤ ក្រោមពាក្យស្លោក «ភាពយន្តខ្នាតខ្លី ជាជំហានឆ្ពោះទៅកាន់ភាពយន្តខ្នាតវែង» ក្នុងគោលបំណងលើកទឹកចិត្ត និងអភិវឌ្ឍន៍សមត្ថភាពយុវជន តាមរយៈការបញ្ចេញគំនិតច្នៃប្រឌិត នៅក្នុងវិស័យភាពយន្ត។

នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ ដែលមាន លោក ប៉ុក បូរក្ស ជាប្រធាន រួមទាំងក្រុមការងារពាក់ព័ន្ធទាំងអស់ បានខិតខំប្រឹងប្រែងបំពេញការងារប្រកបដោយការយកចិត្តទុកដាក់ និងបានផ្តល់អនុសាសន៍ណែនាំសម្រាប់ការអនុវត្តផែនការការងាររដើម្បីឱ្យដំណើរការរៀបចំមហោស្រពប្រព្រឹត្តិទៅបានរលូន នាពេលប៉ុន្មានថ្ងៃខាងមុខនេះ។

ខណៈដែលគណៈកម្មការមេប្រយោគ បានយកចិត្តទុកដាក់ខ្ពស់ក្នុងការវាយតម្លៃភាពយន្តនីមួយៗដែលបានដាក់ពាក្យចូលរួមប្រកួតក្នុងឆ្នាំនេះ ដើម្បីចម្រាញ់យកភាពយន្តខ្លីដ៏មានគុណភាពឆ្ពោះទៅការក្លាយជាម្ចាស់ជយលាភីនាឆ្នាំនេះ។

សម្រាប់បងប្អូនប្រជាពលរដ្ឋ និងអ្នកស្រលាញ់វិស័យភាពយន្ត អាចអញ្ជើញចូលរួមទស្សនាភាពយន្តខ្លីដោយសេរី ចាប់ពីថ្ងៃទី២៦ ដល់ថ្ងៃទី២៩ ខែវិច្ឆិកា ឆ្នាំ២០២៤ នៅរោងភាពយន្តនានាក្នុងរាជធានីភ្នំពេញ ដើម្បីចូលរួមធ្វើការបោះឆ្នោតជ្រើសរើសភាពយន្តដែលខ្លួនពេញចិត្ត ។

ការប្រកាសផ្តល់ពានរង្វាន់ជាផ្លូវការ នឹងប្រព្រឹត្តទៅក្នុងពិធីបិទមហោស្រព នាថ្ងៃទី៣០ ខែកញ្ញា ឆ្នាំ២០២៤។ សូមចូលរួមធ្វើជាសក្ខីភាពទាំងអស់គ្នា ថាតើយុវផលិតករ ឬសមិទ្ធករភាពយន្តរូបណា នឹងក្លាយជាម្ចាស់ពានរង្វាន់ជយលាភីកំពូលរបស់មហោស្រពជាតិភាពយន្តខ្លីកម្ពុជា លើកទី៤ ប្រចាំឆ្នាំនេះ!!

អត្ថបទ៖ រ៉ាត់ ចាន់ធីតា រូបភាព៖ ឯកសារ