មកស្គាល់ភូមិមួយដែលសម្បូរកូនភ្លោះច្រើនបំផុតលើពិភពលោក

១៦ តុលា ២០២៤ | កម្សាន្ដ

ភូមិមួយដែលត្រូវបានស្គាល់ថាជាភូមិសម្បូរកូនភ្លោះបំផុតក្នុងប្រទេសនីហ្សេរីយ៉ាបានប្រារព្ធនូវពិធីបុណ្យជួបជុំកូនភ្លោះប្រចាំឆ្នាំ ជាមួយការប៉ុនប៉ងបំបែកកំណត់ត្រាការជួបជុំកូនភ្លោះធំបំផុតលើពិភពលោក។

កម្មវិធីជួបជុំកូនភ្លោះពិភពលោក World Twins festivalប្រចាំឆ្នាំនៅភូមិ Igbo-Ora (អ៊ីកបូ អូរ៉ា) ក្នុងរដ្ឋ Oyo (អូយ៉ូ) ភាគនិរតីនៃប្រទេសនីហ្សេរីយ៉ា ត្រូវបានរៀបចំយ៉ាងអធិកអធមកាលពីចុងសប្ដាហ៍ ដោយមានកូនភ្លោះជាច្រើនក្រុមបានមកចូលរួមក្បួនដង្ហែ ថតរូបគូៗ ស្លៀកពាក់ដូចៗគ្នា អមដោយការប្រគំតន្ត្រីវាយស្គរ និងការសម្ដែងរបាំ។ កម្មវិធីបុណ្យដែលមានរយៈពេលរហូតដល់ ៥ថ្ងៃនេះ បានបង្ហាញទំនាក់ទំនងដ៏ពិសេសក្នុងចំណោមកូនភ្លោះ។

គួរបញ្ជាក់ថា ការមានកូនភ្លោះគឺជារឿងធម្មតាបំផុតនៅក្នុងចំណោមជនជាតិ Yoruba (យ៉ូរូបា) ដែលរស់នៅភាគនិរតីនីហ្សេរីយ៉ា។ ការសិក្សាកាលពីឆ្នាំ១៩៧០ បង្ហាញថាក្នុងចំណោមការឆ្លងទន្លេ ១០០០ ដងនៅទីនេះ គឺមាន ៥០ ដងជាការឆ្លងទន្លេកូនភ្លោះ ដែលត្រូវបានចាត់ទុកជាអត្រាខ្ពស់បំផុតមួយលើពិភពលោក ជាពិសេសក្នុងភូមិ Igbo-Ora នេះគឺមានកូនភ្លោះយ៉ាងហោចមួយគូគ្រប់គ្រួសារ។

លោក Kehinde (កេហ៊ីនដេ) ជាស្ថាបនិកពិធីបុណ្យកូនភ្លោះពិភពលោកបាននិយាយថា សម្រាប់ព្រឹត្តិការណ៍ឆ្នាំនេះ លោកមិនទាន់អាចបង្ហាញពីចំនួនកូនភ្លោះជាក់លាក់នោះទេ ប៉ុន្តែសម្រាប់ឆ្នាំមុនៗ ធ្លាប់មានកូនភ្លោះច្រើនបំផុតដល់ ២០៣៤ ក្រុមចូលរួម។

ពាក់ព័ន្ធការមានកូនភ្លោះនេះដែរ អ្នកស្រុកនៅទីនេះមានជំនឿថាភាគរយខ្ពស់នៃការកើតបានកូនភ្លោះគឺជាប់ទាក់ទងនឹងស្លឹកពោតបារាំង និងម្សៅដំឡូងមី ដែលពួកគេប្រើប្រាស់សម្រាប់ធ្វើមុខម្ហូបប្រចាំតំបន់ម្យ៉ាង។ ទោះយ៉ាងណា ការស្រាវជ្រាវបង្ហាញថា កត្តាហ្សែនទំនងជាមូលហេតុច្រើនជាង។

គួរបញ្ជាក់ថា អ្នករៀបចំកម្មវិធីជួបជុំកូនភ្លោះប្រចាំឆ្នាំនេះក៏បានបង្ហាញពីបំណងបំបែកកំណត់ត្រាពិភពលោកហ្គីណេសសម្រាប់ការជួបជុំភ្លោះដ៏ធំបំផុត និងរក្សាការទទួលស្គាល់ពីអង្គការយូណេស្កូថាជាព្រឹត្តិការណ៍បេតិកភណ្ឌវប្បធម៌ផងដែរ ៕