តារាក្បាច់គុនជើងចាស់ Jackie Chan ឬ ឈិន ឡុង បានចែករំលែករឿងរ៉ាវពិបាកបំផុតដែលលោកបានជួបប្រទះពេលចូលសិល្បៈដំបូងដើម្បីជាការលើកទឹកចិត្តដល់អ្នកគាំទ្រខ្លួន។

នៅក្នុងព្រឹត្តិការណ៍ផ្សព្វផ្សាយខ្សែភាពយន្តថ្មីរបស់ខ្លួនមានចំណងជើងថា "Panda Plan" ដែលរៀបចំឡើងនៅទីក្រុង Jinan (ជីណាន) ខេត្ត Shandong (សានទុង) ប្រទេសចិនកាលពីពេលថ្មីៗ កំពូលតារាសម្ដែងនិងផលិតករភាពយន្តហុងកុង ឈិនឡុង បានចែករំលែកនូវរឿងរ៉ាវមួយចំនួនអំពីគ្រាលំបាកបំផុតក្នុងជីវិតរបស់លោក ដើម្បីលើកទឹកចិត្តអ្នកគាំទ្រឱ្យមានព្យាយាមគិតវិជ្ជមានក្នុងពេលជួបប្រទះការលំបាក ។

តារាវ័យ ៧០ឆ្នាំរូបនេះបាន​និយាយ​ថា​៖ “ជីវិតតែងតែមានពេលឡើង និងមានពេលចុះ។ ក្នុងពេល​ធ្លាក់ដល់​ចំណុច​ទាប​ក្នុង​ជីវិត ខ្ញុំធ្លាប់មិនមានអ្វីហូបសោះក្រៅពីនំប៉័ងចំនួន ៧ ថ្ងៃជាប់គ្នា”។ 

លោកបានបន្ថែមថា ទម្រាំមានការទទួលស្គាល់ លោកបានប្រឹងប្រែងក្នុងការហ្វឹកហាត់ខ្លាំងដើម្បីឱ្យការសម្ដែងក្បាច់គុនរបស់ខ្លួនមានការវិវត្ត តួយ៉ាងដូចជានៅក្នុងភាពយន្ត “កំពូលក្បាច់គុនពស់ស្រមោលឥន្ទី” កាលពីឆ្នាំ១៩៧៨ និងភាពយន្ត “កំពូលក្បាច់គុនស្រវឹង” កាលពីឆ្នាំ១៩៩៤ ជាដើម។ លោក​​បន្ត​ថា គ្រប់គ្នា​ត្រូវ​តែ​ប្រឹងប្រែង​នៅ​ពេល​​មិនទាន់​មាន​ឱកាស ដើម្បី​ថ្ងៃ​ណាមួយ​លទ្ធផល​នៃ​ការ​ខិតខំ​របស់យើង​នឹង​ត្រូវ​​អ្នក​ដទៃមើលឃើញ។

 
ចាប់ផ្ដើមចាក់បញ្ចាំងកាលពីថ្ងៃទី៣០ ខែកញ្ញា ភាពយន្តបែបកំប្លែងនិងបាញ់ប្រហារថ្មីរបស់លោក Jackie Chan មានចំណងជើងថា "Panda Plan" មានសាច់រឿងនិយាយពីកូនខ្លាឃ្មុំផេនដាដ៏គួរឱ្យស្រលាញ់មួយក្បាលដែលត្រូវបានចិញ្ចឹមដោយកំពូលតារាក្បាច់គុនពិភពលោក ឈិន ឡុង និងបានក្លាយជាគោលដៅនៃក្រុមឧក្រិដ្ឋកម្មសកលលោក។ ភាពយន្តនេះរកចំណូលបាន ៣០ លានដុល្លារ ក្រោយបញ្ចាំងក្នុងប្រទេសចិនបានមួយសប្ដាហ៍ ៕

ប្រែសម្រួល៖ វ៉ាន់ថន