សមាជិកក្រុមចម្រៀង BTS, RM បានប្រារព្ធខួបកំណើតគម្រប់អាយុ ៣០ ឆ្នាំរបស់ខ្លួននៅថ្ងៃទី១២ ខែកញ្ញានេះ ខណៈទទួលបានការជូនពរពីអ្នកគាំទ្រជុំវិញពិភពលោក។

កើតនៅថ្ងៃទី១២ ខែកញ្ញា ឆ្នាំ១៩៩៤ តារាចម្រៀងកូរ៉េ Kim Nam-joon ត្រូវបានអ្នកគាំទ្រខេប៉ុបស្គាល់យ៉ាងច្បាស់ក្នុងនាមជាប្រធានក្រុម BTS ដែលមានសមត្ថភាពខ្លាំងខាងរ៉េប និងនិពន្ធចម្រៀងផងដែរ។ លោកបានចាប់ផ្ដើមប្រើឈ្មោះ RM ជាឈ្មោះក្នុងសិល្បៈចាប់តាំងពីឆ្នាំ២០១៧។

តារាវ័យ ៣០ឆ្នាំរូបនេះទទួលបានភាពល្បីល្បាញជាលើកដំបូងក្នុងឆ្នាំ ២០១៣ ជាមួយក្រុម BTS ដែលជាក្រុមចម្រៀងកូរ៉េដំបូង និងតែមួយគត់ដែលអាចឈានដល់លេខ ១ នៅលើតារាងបទចម្រៀង Billboard Hot 100 របស់សហរដ្ឋអាមេរិក ជាមួយនឹងបទចម្រៀងដូចជា "Dynamite", "Butter" និងបទ "My Universe" ដែលពួកគេច្រៀងជាមួយក្រុម Coldplay។ BTS ក៏ជាក្រុមចម្រៀងកូរ៉េដំបូង និងតែមួយគត់ផងដែរដែលមានឈ្មោះជាបេក្ខភាពដណ្ដើមពានរង្វាន់ Grammy និងអាចលក់អាល់ប៊ុមបានជាង ៣០ លានអាល់ប៊ុម។

ក្នុងឆ្នាំ ២០១៥ RM បានចេញអាល់ប៊ុម “mixtape” ដំបូងរបស់ខ្លួន និងបានចេញអាល់ប៊ុមទោលទីពីរមានចំណងជើងថា 'Mono' ក្នុងឆ្នាំ ២០១៨ ដែលបានក្លាយជាអាល់ប៊ុមដោយតារាចម្រៀងកូរ៉េដែលមានចំណាត់ថ្នាក់ខ្ពស់បំផុតនៅសហរដ្ឋអាមេរិក ខណៈបានឡើងដល់ចំណាត់ថ្នាក់លេខ ២៦ នៅលើ Billboard 200។

នៅក្នុងពិភពហ្វេសិន RM បានក្លាយជាទូតសុច្ឆន្ទៈកម្រិតពិភពលោកដំបូង និងតែមួយគត់សម្រាប់ម៉ាកសម្លៀកបំពាក់ប្រណិតអ៊ីតាលី Bottega Veneta ។បច្ចុប្បន្ន តារាចម្រៀងរូបនេះបានចូលបម្រើយោធាចាប់តាំងពីខែធ្នូ ឆ្នាំ ២០២៣ ជាកាតព្វកិច្ចចាំបាច់សម្រាប់បុរសកូរ៉េខាងត្បូងមានសុខភាពល្អទាំងអស់ដែលមានអាយុពី ១៨ ដល់ ២៨ ឆ្នាំ។ សមាជិក BTS ទាំងអស់ត្រូវបានរំពឹងថានឹងបញ្ចប់កាតព្វកិច្ចយោធានៅឆ្នាំ ២០២៥ ៕
 

ប្រែសម្រួល៖ វ៉ាន់ថន