ថ្ងៃសុក្រ ទី១៨ ខែតុលា ឆ្នាំ២០២៤
ថ្ងៃសុក្រ ទី១៨ ខែតុលា ឆ្នាំ២០២៤
ក្រោយដាក់ចេញនូវគោលនយោបាយបន្ធូរបន្ថយទិដ្ឋាការ ការកែសម្រួលការទូទាត់ប្រាក់ ព្រមទាំងយុទ្ធសាស្ត្រផ្សព្វផ្សាយតាមបណ្ដាញសង្គម ប្រទេសចិនរំពឹងថានឹងអាចទាក់ទាញភ្ញៀវទេសចរបរទេសជាង ១៥ លាននាក់ នៅក្នុងឆមាសទីពីរនៃឆ្នាំនេះ។
ស្ថិតិពីរដ្ឋបាលអន្តោប្រវេសន៍ចិន បានបង្ហាញថានៅឆមាសទីមួយនៃឆ្នាំ ២០២៤ ជនបរទេសជាង ១៤,៦ លាននាក់បានធ្វើដំណើរចូលប្រទេសចិន ដែលកើនឡើង ១៥២ ភាគរយធៀបនឹងឆ្នាំមុន។ រយៈពេល៦ខែកន្លងទៅនេះ ភ្ញៀវទេសចរបរទេសជាង ២៣ ម៉ឺននាក់បានហោះចូលអាកាសយានដ្ឋាន Chengdu (ឆឹងទូ) ហើយក្នុងនោះមានភ្ញៀវទេសចរបរទេសជាង ៩៥០០០ នាក់បានធ្វើដំណើរចូលដោយគ្មានទិដ្ឋាការ។
ទីក្រុងសៀងហៃ ដែលជាគោលដៅសំខាន់របស់ចិនសម្រាប់អ្នកដំណើរអន្តរជាតិ បានបន្តសម្រួលនូវមធ្យោបាយទូទាត់ប្រាក់សម្រាប់ភ្ញៀវទេសចរបរទេស ដោយគិតត្រឹមចុងខែមិថុនា មានម្ចាស់អាជីវកម្មចំនួន ៥ ម៉ឺនកន្លែង និងស្ថានីយធ្វើដំណើរជាង ៧ ម៉ឺនស្ថានីយ បានគាំទ្រការទូទាត់កាតអន្តរជាតិ ហើយនៅក្នុងឆមាសទីមួយនៃឆ្នាំនេះ បរិមាណប្រតិបត្តិការរបស់ភ្ញៀវបរទេសនៅក្នុងទីក្រុងបានកើនឡើងដល់ប្រមាណ ១ ពាន់លានដុល្លារអាមេរិក។ ក្នុងនោះ មានប្រហែល ៣១៦ លានដុល្លារ គឺជាការទូទាត់តាមទូរស័ព្ទដៃ ដែលកើនឡើងជាង ៨ ដងបើធៀបនឹងឆ្នាំមុន។
ក្រៅពីការបន្ធូរបន្ថយទិដ្ឋការ និងសម្រួលការទូទាត់ប្រាក់ ការផ្សព្វផ្សាយតាមបណ្ដាញសង្គមក៏ត្រូវបានយកចិត្តទុកដាក់យ៉ាងខ្លាំងដែរ។ តួយ៉ាងថ្មីៗនេះ ទីក្រុងស៊ីអាន (Xi’an) ខេត្តសានស៊ី (Shaanxi) បានអញ្ជើញ influencer អន្តរជាតិ ២១ ប្រទេសដើម្បីមកទស្សនានិងធ្វើមាតិកាពីតំបន់ទេសចរណ៍របស់ខ្លួន។
ក្រៅពីទីក្រុងធំៗដែលជាគោលដៅចម្បង ភ្ញៀវទេសចរបរទេសកាន់តែច្រើនក៏បង្ហាញភាពរីករាយក្នុងការរុករកតំបន់បែបវប្បធម៌ប្រពៃណី និងទេសភាពធម្មជាតិដែរ។ ជាក់ស្ដែងក្នុងឆមាសទីមួយនៃឆ្នាំនេះ តំបន់ស៊ីនជាំងបានស្វាគមន៍ភ្ញៀវទេសចរ ២,៣ លាននាក់ និងបង្កើតប្រាក់ចំណូលទេសចរណ៍អន្តរជាតិចំនួន ១,៧ ពាន់លានដុល្លារអាមេរិក។
ប្រធានបណ្ឌិតសភាទេសចរណ៍ចិន លោក Dai Bin (តាយ ពីន) បានមានប្រសាសន៍ថា តំបន់នានារបស់ប្រទេសចិនចាំបាច់ត្រូវកែលម្អសេវាកម្ម និងភាពងាយស្រួលបន្ថែមទៀត ដើម្បីទាក់ទាញភ្ញៀវទេសចរបរទេសកាន់តែច្រើន ដូចជាការបន្ថែមមគ្គទេសក៍ដែលអាចប្រើភាសាអន្តរជាតិ សម្រួលការកក់សំបុត្រ និងអភិវឌ្ឍផលិតផលទេសចរណ៍ផ្សេងៗ ៕
ប្រែសម្រួល៖ វ៉ាន់ថន