ថ្ងៃសុក្រ ទី១៨ ខែតុលា ឆ្នាំ២០២៤
ថ្ងៃសុក្រ ទី១៨ ខែតុលា ឆ្នាំ២០២៤
កុមារី ហេង សុរៈផុស្សតី ម៉ូដែលវ័យក្មេងរបស់ កម្ពុជា ត្រៀមតំណាងកម្ពុជាដើម្បីឆ្ពោះទៅដើរបង្ហាញម៉ូដ ក្នុងកម្មវិធី China Star Model international រដូវកាលទី៧ ប្រចាំឆ្នាំ២០២៤។
កុមារីឆ្លាតវ័យក្មេងកម្ពុជាម្នាក់ទៀតហើយ គឺ ហេង សុរៈផុស្សតី ហៅ Molly កំពុងត្រៀមបង្ហាញសមត្ថភាពដើរម៉ូដយ៉ាងស្ទាត់ជំនាញ ក្នុងកម្មវិធី China Star Model National រដូវកាលទី៧ ប្រចាំឆ្នាំ២០២៤ ដែលព្រឹត្តិការណ៍ដ៏ធំអស្ចារ្យនេះគ្រោងរៀបចំឡើងនៅថ្ងៃទី១៩ និងថ្ងៃទី ២០ ខែកក្កដា ឆ្នាំ២០២៤ ខាងមុខនេះ នៅទីក្រុងហាណា សាធារណៈរដ្ឋប្រជាមានិត ចិន។
តាមដែលដឹងមក ម៉ូដែលតូចគួរឱ្យស្រលាញ់ Molly ជាកុមារីកម្ពុជាដំបូងគេបង្អស់ដែលទទួលបានឱកាសតំណាងកម្ពុជា ចេញទៅបង្ហាញសមត្ថភាពដើរម៉ូដក្នុងវេទិកាតារាម៉ូដែលដ៏ធំ នៅប្រទេសចិននេះ។
កុមារីរូបស្រស់នេះ បានផ្តល់បទសម្ភាសន៍ទាំងអារម្មណ៍រំភើបក្តុកក្តួលសម្រាប់ការដែលបានតំណាងប្រទេសកម្ពុជា និងឱកាសផ្សព្វផ្សាយពីវប្បធម៌ដ៏ផូរផង់របស់កម្ពុជាលើវេទិកាដើរម៉ូដដ៏ធំស្កឹមស្កៃនៅប្រទេសចិន។
មែនទែនទៅ ការចេញទៅដើរម៉ូដនៅលើឆាកអន្តរជាតិនៅចិននេះ ក៏មានការជួយជ្រោមជ្រែងច្នៃម៉ូដសម្លៀកបំពាក់ដោយ លោក អូលីវ៉ា គង់ ដែលឈុតត្រៀមដើរម៉ូដនោះបំផុសគំនិតអំពីឈុត ទេពអប្សររបស់កម្ពុជាយើង។
អ្នកច្នៃម៉ូដមានប្រភពមកពីខេត្តពោធិសាត់រូបនេះឱ្យដឹងថា លោកនឹងចូលរួមធ្វើដំណើរទៅប្រទេសចិនជាមួយឈុតបង្ហាញពីអត្តសញ្ញាណជាតិមួយនេះ ព្រមជាមួយទង់ជាតិប្រទេសកម្ពុជាទៅបង្ហាញលើឆាកអន្តរជាតិ។ លោកពិតជារំភើប និងមានមោទនភាពបំផុតក្នុងការជួយជ្រោមជ្រែងគាំទ្រកុមារីឆ្លាតវ័យ Molly ក្នុងដំណើរចេញទៅប្រទេសចិននាពេលឆាប់ៗនេះ។
គួរបញ្ជាក់ផងដែរថា បច្ចុប្បន្នកុមារី ហេង សុរៈផុស្សតី កំពុងសិក្សាថ្នាក់ទី៥ នៅគ័ងចូវ ខេត្តគ័ងទុង ប្រទេសចិន។ ជានិច្ចជាកាលនាងតូចរូបស្រស់រមែងធ្វើដំណើរឡើងចុះមកមាតុភូមិកំណើត ដើម្បីជួបជុំគ្រួសារនៅពេលវិស្សមកាលម្ដងៗ។
ថ្មីៗកន្លងទៅនេះ Molly ក៏បានលេចវត្តមានចូលរួមដើរម៉ូដសម្លៀកបំពាក់ច្នៃថ្មីយ៉ាងប្រណិតក្នុងថ្ងៃប្រកួតផ្តាច់ព្រ័ត្រកម្មវិធី Cambodia’s Queen Of the Catwalk រដូវកាលទី១ ផងដែរ។
កន្លងមកកុមារីពោរពេញដោយសមត្ថភាពទេពកោល្យ ហេង សុរៈផុស្សតី ធ្លាប់បានបញ្ចេញសមត្ថភាពដើរម៉ូដដ៏ពូកែរបស់នាងក្នុងកម្មវិធី GUANGDONG FASHION WEEK នៅទីក្រុងក្វាងចូវ កាលពីថ្ងៃទី១៧ ខែសីហា ឆ្នាំ២០២៣កន្លងទោ ធ្វើឱ្យអ្នកម្តាយ និងក្រុមគ្រួសារមានមោទនភាពចំពោះកូនស្រីរូបនេះជាពន់ពេក៕
អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងហ្វេសប៊ុក