ថ្ងៃសុក្រ ទី១៩ ខែកក្កដា ឆ្នាំ២០២៤

កម្ពុជា សម្រេចការនាំចេញកសិផលជាង ៣,២ពាន់លានដុល្លារ សម្រាប់ ៩ខែ ឆ្នាំ២០២៣

១៧ តុលា ២០២៣ | សេដ្ឋកិច្ច

 

ក្រសួងកសិកម្ម រុក្ខាប្រមាញ់ និងនេសាទ បានបង្ហាញពីរបាយការណ៍នាំចេញកសិផល ក្នុងរយៈពេល ៩ខែ ឆ្នាំ ២០២៣នេះ កម្ពុជា សម្រេចការនាំចេញកសិផលបាន ក្នុងតម្លៃទឹកប្រាក់ជាង ៣ពាន់ ២០០លានដុល្លារអាមេរិក ជាមួយនឹងបរិមាណជាង ៥លានតោន។ក្នុងរយៈពេល ៩ខែ ឆ្នាំ ២០២៣នេះ ការនាំចេញកសិផលទៅក្រៅប្រទេស មានបរិមាណជាង ៥លាន ៥សែនតោន ទៅកាន់ទិសដៅ ៧១ប្រទេស ថយចុះចំនួន ១៣%។

 


កសិផលសំខាន់ៗដែលបាននាំចេញមានដូចជា អង្ករនាំចេញជាង ៤៥ម៉ឺនតោន គិតជាទឹកប្រាក់ជិត ៤០០លានដុល្លារ ស្រូវនាំចេញជាង ១លាន ៨សែនតោន គិតជាទឹកប្រាក់ ៦៥៨លានដុល្លារ ខណៈកសិផលក្រៅពីស្រូវអង្ករត្រូវបាននាំចេញជាង ៣លាន ៣សែនតោន ជាមួយនឹងទឹកប្រាក់នាំចេញជាង ២ពាន់លានដុល្លារ។

 


អ្នកជំនួញនៅក្នុងវិស័យកសិកម្មមួយរូប ធ្លាប់បានលើកឡើងថា វាជាពេលវេលាមួយ ដែលវិស័យនេះត្រូវតែធ្វើពិពិធកម្មទំនើប ដូចទៅនឹងបណ្តាប្រទេសជឿនលឿនដទៃទៀតដែរ ហើយដើម្បីរក្សាលំនឹងក៏ដូចជាបង្កើនការនាំចេញផលិតផលកសិកម្ម កម្ពុជា ចាំបាច់ត្រូវតែពង្រឹងទាំងធនធានថវិកា និងធនធានមនុស្សឲ្យដើរស្របគ្នា ជាពិសេសបន្តគៀងគរកម្លាំងជំរុញការវិនិយោគពីបរទេស។

 


សូមជម្រាបថា នៅ ៣ត្រីមាសដើមឆ្នាំ ២០២៣នេះ ប្រទេសកម្ពុជា សម្រេចបាននូវទំហំពាណិជ្ជកម្មជាង ៣៥ពាន់លានដុល្លារអាមេរិក មានការធ្លាក់ចុះប្រមាណ ៣% បើប្រៀបធៀបនឹងពេលដូចគ្នាកាលពីឆ្នាំមុន៕

 

 

 

អត្ថបទ៖ ងួន សុភ័ត្រ្តា រូបភាព៖ ឯកសារ

 

 

 

ព័ត៌មានដែលទាក់ទង

© រក្សា​សិទ្ធិ​គ្រប់​យ៉ាង​ដោយ​ PNN ប៉ុស្ថិ៍លេខ៥៦ ឆ្នាំ 2024