ភាពយន្ត "Joker" (ចូកឃើ) វគ្គពីរ ដែលមានការវិលត្រឡប់ជាថ្មីរបស់តារាសម្ដែង Joaquin Phoenix (វ៉ាឃីន ហ្វីនិច) បានកំណត់ថ្ងៃចាក់បញ្ចាំងនៅឆ្នាំ២០២៤ រយៈពេលប្រាំឆ្នាំបន្ទាប់ពីការចាក់បញ្ចាំងវគ្គដំបូង។ 

វគ្គបន្តនៃភាពយន្តឈ្នះពានរង្វាន់អូស្ការ "Joker" (ចូកឃើ) គ្រោងនឹងចាក់បញ្ចាំងតាមរោងភាពយន្តនៅថ្ងៃទី៤ ខែតុលា ឆ្នាំ២០២៤ខាងមុខនេះ។ នេះបើតាមការលើកឡើងរបស់អ្នកនាំពាក្យផលិតកម្ម Warner Bros (វ៉ននើ ប្រូស៍)។

វគ្គបន្ទាប់នេះមានចំណងជើងពេញថា "Joker: Folie a Deux" (ចូកឃើ ហ្វូលលី អាដឺ) ដោយមានតារាសម្ដែង Joaquin Phoenix (វ៉ាឃីន ហ្វីនិច) ត្រឡប់មកកាន់កាប់តំណែងតួឯកសាជាថ្មី។ 

ទាក់ទងនឹងសាច់រឿងនៃវគ្គពីរនេះមិនទាន់មានការបញ្ចេញឲ្យដឹងច្រើននៅឡើយទេ ប៉ុន្តែការចុះផ្សាយរបស់ស្ថាប័នព័ត៌មានហូលីវូដឈ្មោះថា Variety (វ៉ារ៉ាយធី) បានឲ្យដឹងថាវគ្គថ្មីនេះនឹងមានលក្ខណៈជាសាច់រឿងបែបតន្ត្រីដោយរំពឹងថាតារាចម្រៀងស្រី Lady Gaga (ឡេឌី ហ្គាហ្គា) នឹងដើរតួជា Harley Quinn (ហាលី ខ្វីន) ដែលជាដៃគូរបស់ Joker (ចូកឃើ)។ 

គួរដឹងថាភាពយន្ត "Joker" (ចូកឃើ) ដែលចេញផ្សាយកាលពីឆ្នាំ២០១៩ ទទួលបានភាពជោគជ័យយ៉ាងខ្លាំង ដោយភាពយន្តនេះអាចឈ្នះពានរង្វាន់អូស្ការជាភាពយន្តដែលមានសាច់រឿងដើមល្អដាច់គេ និងបានជួយឲ្យតារាសម្ដែង Joaquin Phoenix (វ៉ាឃីន ហ្វីនិច) ឈ្នះពានរង្វាន់តារាសម្ដែងប្រុសឆ្នើមថែមទៀតផង។ 

ដើមឡើយភាពយន្ត "Joker" (ចូកឃើ) នេះមិនមានផែនការផលិតវគ្គពីរនោះទេ ប៉ុន្តែក្រោយការឈ្នះពានរង្វាន់ និងក្រោយពីអាចស្វែងរកប្រាក់ចំណូលបានលើសពី ១ពាន់លានដុល្លារ ធ្វើឲ្យ ផលិតកម្ម Warner Bros (វ៉ននើ ប្រូស៍) គិតគូរឡើងវិញលើការផលិតវគ្គបន្តនេះ៕