តារាសម្ដែងស្រី Anya Taylor-Joy (អានីយ៉ា ថេឡឺ ចយ) ដែលទទួលបានភាពល្បីល្បាញតាមរយៈការសម្ដែងក្នុងភាពយន្តភាគ "The Queen's Gambit" (ដឺ ឃ្វីន ហ្គេម ប៊ីត) បានរៀបអាពាហ៍ពិពាហ៍ស្ងាត់ៗកាលពីពេលថ្មីៗជាមួយមិត្តប្រុសជាតន្ត្រីករ។

តារាសម្ដែងកូនកាត់អង់គ្លេស-អាមេរិក Anya Taylor-Joy (អានីយ៉ា ថេឡឺ ចយ) ត្រូវបានស្ថាប័នព័ត៌មានជាច្រើនចុះផ្សាយថាបានរៀបអាពាហ៍ពិពាហ៍យ៉ាងស្ងៀមស្ងាត់ជាមួយមិត្តប្រុសជាតន្ត្រីករឈ្មោះថា Macolm McRae (ម៉ាលខម ម៉ករ៉េ)។ 

វិបសាយព័ត៌មាន Page Six (ផេក សិក) ដែលទទួលបានដំណឹងពីប្រភពអនាមិក បានរាយការណ៍ថាគូស្នេហ៍មួយគូនេះបានរៀបអាពាហ៍ពិពាហ៍បែបសាមញ្ញានៅសហរដ្ឋអាមេរិក ខណៈដែលអ្នកតំណាងឲ្យតារាស្រីវ័យ ២៦ឆ្នាំរូបនេះ សុំមិនបញ្ចេញមតិលើរឿងរ៉ាវនេះ។ 

តាមប្រភពដដែលបានឲ្យដឹងថាតួស្រីក្នុងរឿង "The Queen's Gambit" (ដឺ ឃ្វីន ហ្គេម ប៊ីត) និងមិត្តប្រុស បានចងចំណងអាពាហ៍ពិពាហ៍ពេលដែល Anya Taylor (អានីយ៉ា ថេឡឺ) សម្រាកពីការថតភាពយន្ត Furiosa (ហ្វូរីអូសា) នៅឯប្រទេសអូស្ត្រាលី។ 

គួររំឭកថា Anya Taylor (អានីយ៉ា ថេឡឺ) និង Macolm McRae (ម៉ាលខម ម៉ករ៉េ) បានចាប់លាតត្រដាងពីទំនាក់ទំនងស្នេហារបស់ពួកគេនៅឆ្នាំ២០២២នេះ ដោយពួកគេបានបណ្ដើរគ្នាចូលរួមកម្មវិធីធំៗ  ដូចជាកម្មវិធីសម្ពោធភាពយន្ត "Northman" (ន័តម៉េន) នៅទីក្រុងឡុងដ៏កាលពីខែមេសា និងកម្មវិធីជប់លៀងពានរង្វាន់អូស្ការកាលពីខែមីនាជាដើម៕

ប្រែសម្រួល៖ វ៉ាន់ថន