កម្មវិធីពានរង្វាន់ Mnet Asian Music Awards ឬ MAMA ឆ្នាំ២០២៤ ដែលបានប្រារព្ធឡើងរយៈពេល ៣ថ្ងៃបានបិទបញ្ចប់ថ្ងៃចុងក្រោយនៅប្រទេសជប៉ុន ដោយរកឃើញអ្នកឈ្នះពានធំគឺក្រុម Seventeen និង aespa។

ក្រុមចម្រៀងបុរស Seventeen និងក្រុមចម្រៀងនារី aespa បានក្លាយជាម្ចាស់ជយលាភីពានរង្វាន់ធំនៅក្នុងកម្មវិធីពានរង្វាន់តន្ត្រីកូរ៉េ MAMA Awards ក្នុងកម្មវិធីរៀបចំនៅទីក្រុង Osaka ប្រទេសជប៉ុន កាលពីចុងសប្ដាហ៍កន្លងទៅ។

ក្នុងនោះ Seventeen ដែលជាក្រុមចម្រៀងបុរសមានសមាជិក ១៣ នាក់បានឈ្នះពានរង្វាន់សិល្បករប្រចាំឆ្នាំ និងពានរង្វាន់អាល់ប៊ុមប្រចាំឆ្នាំសម្រាប់អាល់ប៊ុម 'Seventeenth Heaven' ស្របពេលក្រុមចម្រៀងនារីពីផលិតកម្ម SM, aespa បានឈ្នះពានរង្វាន់បទចម្រៀងប្រចាំឆ្នាំ សម្រាប់បទ “Supernova”។ ពានរង្វាន់ធំ១ទៀតក្នុងចំណោមពានរង្វាន់ធំទាំង ៤ របស់ MAMA គឺពានរង្វាន់ Fan’s Choice of the Year បានទៅលើ Jimin សមាជិកក្រុម BTS ។

យ៉ាងណាក៏ដោយ ភាពភ្ញាក់ផ្អើលធំបំផុតនៅយប់ចុងក្រោយនៃកម្មវិធី MAMA ឆ្នាំនេះបានកើតឡើងនៅពេលសមាជិកក្រុម Big Bang រួមមាន G-Dragon, Taeyang និង Daesung បានជួបជុំគ្នានៅលើឆាកពានរង្វាន់នេះម្ដងទៀតក្រោយរយៈពេល ៩ ឆ្នាំ ដោយក្នុងចន្លោះពេលនេះសមាជិកម្នាក់ៗបានបំពេញកាតព្វកិច្ចយោធា សមាជិកខ្លះបានរៀបការកសាងគ្រួសារ ហើយសមាជិកខ្លះក៏មានរឿងអាស្រូវជួញដូរផ្លូវភេទរហូតត្រូវកាត់ទោសឱ្យជាប់ពន្ធនាគារ។

គួរបញ្ជាក់ថា ឆ្នាំ២០២៤នេះគឺជាលើកទីមួយហើយដែលកម្មវិធី Mnet Asian Music Awards បានប្រារព្ធធ្វើឡើងក្នុងប្រទេសចំនួនពីរ គឺសហរដ្ឋអាមេរិក និងប្រទេសជប៉ុន ក្នុងរយៈពេលបីថ្ងៃ។ ក្នុងនោះកម្មវិធីថ្ងៃដំបូងបានរៀបចំឡើងនៅមហោស្រព Dolby ក្នុងទីក្រុង Los Angeles សហរដ្ឋអាមេរិក នៅថ្ងៃទី ២១ ខែវិច្ឆិកា មុនពេលបន្តទៅរៀបចំនៅពហុកីឡដ្ឋាន Kyocera Dome ក្នុងទីក្រុង Osaka ប្រទេសជប៉ុន នៅថ្ងៃទី ២២ និង ២៣ ខែវិច្ឆិកា ៕
 

ប្រែសម្រួល៖ វ៉ាន់ថន