ភាពយន្តគំនូរជីវចលអំពីសត្វឆ្កែចេះក្បាច់គុនសាំម៊ូរ៉ៃ 'Paws of Fury' នឹងចាប់ផ្ដើមចាក់បញ្ចាំងតាមរោងភាពយន្តនៅចុងសប្ដាហ៍នេះ បន្ទាប់ពីលើកពេលចាក់បញ្ចាំងអស់រយៈពេល៥ឆ្នាំ។

ភាពយន្តគំនូរជីវចលថ្មីរបស់ផលិតកម្ម Paramount មានចំណងជើងថា ‘Paws of Fury: The Legend of Hank’ (ផ អហ្វ ហ្វើរី ដឺ លីជេន អហ្វ ហ៊េង) នឹងចាប់ផ្ដើមចាក់បញ្ចាំងចាប់ពីចុងសប្ដាហ៍នេះ ក្រោយពីអូសបន្លាយពេលជាយូរដោយសារបញ្ហាផលិត និងគួបផ្សំបញ្ហាជំងឺកូវីដ១៩ផងដែរ។

មានបញ្ចូលសំឡេងដោយតារាកំប្លែង Ricky Gervais (រីកគី ជើវែស), តារាសម្ដែង Samuel L. Jackson (សាមូអេល អេល ជេកស៊ុន) និងតារាសម្ដែង Mel Brooks (ម៊េល ប្រ៊ូក) ភាពយន្តនោះ មានដំណើររឿងអំពីសត្វឆ្កែមួយក្បាលឈ្មោះថា Hank (ហ៊ែង) ដែលបានបង្វឹកខ្លួនទៅជាអ្នកប្រយុទ្ធសាំម៊ូរ៉ៃមួយរូបដើម្បីការពារសត្វឆ្មាក្នុងទីក្រុងពីតួអង្គចិត្តអាក្រក់។ 

គំនូរជីវចលនេះបានដឹកនាំការផលិតដោយអ្នកដឹកនាំ Rob Minkoff (រ៉ុប មីងអហ្វ) ដែលធ្លាប់មានបទពិសោធន៍ក្នុងការផលិតគំនូរជីវចលជាច្រើន ជាពិសេសធ្លាប់ចូលរួមក្នុងការដឹកនាំភាពយន្តស្ដេចតោ "Lion King" (ឡាយអេន ឃីង) ដែលជាគំនូរជីវចលទទួលបានពានអូស្ការទៀតផង។

ភាពយន្ត ‘Paws of Fury: The Legend of Hank’ នេះ ដំបូងឡើយគឺគ្រោងចាក់បញ្ចាំងនៅខែមេសា ឆ្នាំ២០១៧ ក្រោយមកក៏លើកពេលទៅខែសីហា ឆ្នាំ២០១៧។ 
ប៉ុន្តែការចាក់បញ្ចាំងត្រូវបន្តអូសបន្លាយច្រើនឆ្នាំ រហូតដល់ខែមករា ឆ្នាំ២០២២ ពេលដែលផលិតកម្ម Paramount ទិញយកភាពយន្តនេះ ក៏មានការសម្រេចជ្រើសយកខែកក្កដា ឆ្នាំ២០២២ នេះជាកាលបរិច្ឆេទចាក់បញ្ចាំងចុងក្រោយ៕
 

ប្រែសម្រួល៖ វ៉ាន់ថន