សមាជិក 2NE1, Park Bom បានបង្ហើរសំនៀងក្រអួនក្រអៅរបស់ខ្លួនម្ដងទៀតតាមរយៈបទចម្រៀងថ្មី “I Want U Back” ដែលជាបទចម្រៀងសម្រាប់ភាពយន្តភាគ “Face Me”។

កាលពីថ្ងៃទី៧ ខែវិច្ឆិកាកន្លងទៅនេះ ក្រុមហ៊ុន Big Ocean ENM ដែលជាក្រុមហ៊ុនកម្សាន្តនៅពីក្រោយរឿងភាគ “Face Me” បានចេញផ្សាយជាផ្លូវការនូវបទចម្រៀងសម្រាប់រឿងភាគថ្មីនេះ ដោយមានការចូលរួមច្រៀងជាពិសេសដោយតារាចម្រៀង Park Bom។ បទចម្រៀងមានចំណងជើងថា “I Want U Back” បានបង្ហាញពីភាពឈឺចាប់ ដែលត្រូវនឹងសមត្ថភាពពិសេសរបស់ Park Bom ក្នុងការបង្ហាញអារម្មណ៍មនោសញ្ចេតនាតាមរយៈសំឡេងរបស់នាង។

កំពុងចាក់ផ្សាយលើប៉ុស្តិ៍ KBS2 ភាពយន្តភាគ Face Me គឺជាប្រភេទរឿងបែបឧក្រិដ្ឋកម្មវេជ្ជសាស្រ្ដ និយាយពីគ្រូពេទ្យវះកាត់កែសម្ផស្ស និងអ្នកស៊ើបអង្កេតដ៏ខ្លាំងពូកែម្នាក់ ដែលបានរួមដៃគ្នាដោះស្រាយឧក្រិដ្ឋកម្មដ៏ស្មុគស្មាញ ដោយប្រើប្រាស់ការវះកាត់ដើម្បីជួយជនរងគ្រោះ និងស្វែងរកការពិតដែលលាក់កំបាំង។ គួររំឭកថា Park Bom បានបង្ហាញខ្លួនជាផ្លូវការក្នុងឆ្នាំ ២០០៩ ក្នុងនាមជាសមាជិកនៃក្រុម K-pop 2NE1 ។

ក្រុមចម្រៀងស្រីមួយនេះត្រូវបានចាត់ទុកថាជាក្រុមលំដាប់ Legend មួយដែលអាចច្បាមយកប្រជាប្រិយភាពលើឆាកអន្តរជាតិជាមួយនឹងបទល្បីៗ ដូចជា "Lonely" "I Am the Best" និង "Ugly” ជាដើម។ សម្រាប់ Park Bom ផ្ទាល់ក៏មានបទចម្រៀងទោលដែលទទួលបានជោគជ័យយ៉ាងខ្លាំងដែរនៅជំនាន់នោះ ដូចជាបទ “You and I" និងបទ "Don't Cry”។ បច្ចុប្បន្នសមាជិកទាំង ៤ កំពុងមមាញឹកក្នុងការប្រគំតន្ត្រីទេសចរណ៍អាស៊ី “Welcome Back Tour” ដែលជាការប្រគំតន្ត្រីជុំគ្នាលើកដំបូងរបស់ពួកគេ ក្រោយការរំសាយក្រុមរយៈពេល ៨ឆ្នាំកន្លងមក ៕

ប្រែសម្រួល៖ វ៉ាន់ថន