របាយការណ៍របស់ក្រសួងទេសចរណ៍កម្ពុជា បានអោយដឹងថា នៅថ្ងៃសៅរ៍ និងថ្ងៃអាទិត្យ ចុងសប្តាហ៍មុន គឺចាប់ពីថ្ងៃ០៥ ដល់ថ្ងៃទី០៦ ខែមិថុនា ដែលជាសប្ដាហ៍ទី១ នៃខែមិថុនា កម្ពុជាបានទទួលភ្ញៀវទេសចរ ដែលភាគច្រើន ជាភ្ញៀវទេសចរផ្ទៃក្នុង ជិត ៨ម៉ឺននាក់ ក្នុងក្របខណ្ឌទូទំាងប្រទេស។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានអោយដឹងបន្ថែមលើរបាយការណ៍ថា ចំនួនទេសចរជិត ៨ម៉ឺននាក់នេះ មានការកើនឡើងប្រមាណជាង ៧ភាគរយ ធៀបនឹងសប្តាហ៍កន្លងមក។ ប៉ុន្តែបើធៀបនឹងរយៈពេលដូចគ្នានៃខែមិថុនា កាលពីឆ្នាំ២០២០នោះ គឺថយចុះជាង ៤៩%។ 

ក្រសួងទេសចរណ៍ លើកឡើងថា ភាគច្រើននៃភ្ញៀវទេសចរ គឺទៅទស្សនារមណីយដ្ឋានទេសចរណ៍បែបធម្មជាតិ និងអេកូទេសចរណ៍ ដែលមានហានិភ័យទាបពីជំងឺកូវីត១៩។ ដោយឡែក តំបន់ខ្លះនៃរាជធានីភ្នំពេញ និងខេត្តមួយចំនួន ដែលមានការកើនឡើងនៃជំងឺកូវីដ-១៩    គណៈបញ្ជាការឯកភាពរាជធានី-ខេត្ត បានបង្កើននូវវិធានការគ្រប់គ្រង និងការបិទខ្ទប់នៅតំបន់ខ្លះ ដែលធ្វើឱ្យចំនួនទេសចរនៅតាមគោលដៅទេសចរណ៍នៅតំបន់ទាំងនោះមានការថយចុះជាងសប្តា៍មុន។ 

ប៉ុន្តែជារួម បើយោងតាមរដ្ឋមន្ត្រីក្រសួងទេសចរណ៍ រមណីយដ្ឋានទេសចរណ៍ គោលដៅទេសចរណ៍ និងមូលដ្ឋានអាជីវកម្មទេសចរណ៍ភាគច្រើន បានបន្តខិតខំអនុវត្តយ៉ាងហ្មត់ចត់តាមវិធានការ «៣ កុំ» និង «៣ ការពារ» រួមជាមួយវិធានសុវត្ថិភាពទេសចរណ៍ ក្នុងការទប់ស្កាត់ជំងឺកូវីដ-១៩ និងវិធានការរដ្ឋបាលដោយឡែករបស់រាជធានី-ខេត្តនីមួយៗផងដែរ៕

អត្ថបទ៖ ហ៊ុន ឌីណូ     រូបភាព៖ ឯកសារ