ថ្ងៃសៅរ៍ ទី២៧ ខែមេសា ឆ្នាំ២០២៤
ថ្ងៃសៅរ៍ ទី២៧ ខែមេសា ឆ្នាំ២០២៤
បុរសសញ្ជាតិកេនយ៉ា មកពីទីក្រុង Nairobi (នែរ៉ូប៊ី) ឈ្មោះ James Maina (ជេម ម៉ៃណា) បានទទួល ការចាប់អារម្មណ៍ខ្លាំងតាមរយៈស្ទីលស្លៀកពាក់ប្លែកពីគេ ដោយលោកចូលចិត្តប្រើប្រាស់សំលៀកបំពាក់បំពាក់ដែលមានពណ៌ស្រស់ៗ និងចូលចិត្តការស្លៀកពាក់ពណ៌ដូចគ្នាពីក្បាលដល់ចុងជើងតែម្ដង។
បច្ចុប្បន្ននេះបុរសវ័យ ៥៩ឆ្នាំរូបនេះ មានសំលៀកបំពាក់ជាឈុតប្រហែលជា ១៦០ឈុត, មានស្បែកជើងជាង ២០០គូ, មានមួកចំនួន ៣០០មួក និងរបស់របរតុបតែងខ្លួនជាឈុតៗជាច្រើនទៀត។ ហើយក្នុងសម័យកាលជំងឺកូវីដ១៩នេះ លោកបានបន្ថែមរបស់មួយទៀតក្នុងឈុតសំលៀកបំពាក់របស់ខ្លួន គឺម៉ាស់ការពារមុខដែលមានពណ៌ស្រស់ៗ ខុសប្លែកពីអ្នកដទៃ។
លោកបានរៀបរាប់ថា កាលពីក្មេងលោកមានជីវភាពតោកយ៉ាកខ្លាំង ដោយពេលនោះលោកមានអាវតែមួយប៉ុណ្ណោះសម្រាប់ពាក់ ដែលត្រូវគក់អាវនោះជារៀងរាល់ថ្ងៃ ហើយមានពេលខ្លះពាក់ទាំងអាវមិនទាន់ហាលស្ងួតស្រួលបួលផង។ ពេលនេះ ពេលដែលមានជីវភាពប្រសើរជាងមុន លោក James បានបំពេញក្ដីស្រម៉ៃដែលចង់តុបតែងខ្លួនប្លែកពីគេ ហើយថែមទាំងបានជួយដល់អ្នកជិតខាងរស់នៅក្នុងទីក្រុង Nairobi ដែលមានជីវភាពខ្វះខាតទៀតផង តាមរយៈការចែករំលែកសម្លៀកបំពាក់ និងម៉ាសដល់ពួកគេ ៕
ប្រែសម្រួល៖ វ៉ាន់ថន