ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
សម្ដេចតេជោ ហ៊ុន សែន បានពន្យល់ថា ការណ៍ដែលសម្ដេចធ្វើដំណើរទៅចរចារ ជាមួយភាគីឡាវអំពីបញ្ហាព្រំដែនកាលពីចុងសប្ដាហ៍កន្លងទៅនេះ មិនមែនជាការឱនលំទោន ចំពោះប្រទេសឡាវ ដែលរំលោភលើដែនអធិបតេយ្យភាពកម្ពុជា ដូចអ្នកធ្វើអត្ថាធិប្បាយមួយចំនួនបានលើកឡើងនោះទេ ប៉ុន្តែជានយោបាយការទូតប្រកបដោយភាពទន់ភ្លន់ និងឆ្លុះបញ្ចាំងពីសុឆន្ទៈដោះស្រាយបញ្ហា មុនឈានទៅដល់ការប្រើកម្លាំងទ័ព ឬប្ដឹងទៅតុលាការអន្តរជាតិ។ ការពន្យល់របស់ប្រមុខរាជរដ្ឋាភិបាលយ៉ាងដូច្នេះ ដើម្បីឆ្លើយតបទៅនឹងអត្ថាធិប្បាយរបស់អ្នកនយោបាយ និងអ្នកវិភាគមួយចំនួនដែលកើតមានប៉ុន្មានថ្ងៃមកនេះ។
រូបភាព៖ លោកនាយករដ្ឋមន្ត្រី ហ៊ុន សែន។ (រូបភាពពី Facebook Samdech Hun Sen)
ជាក់ស្ដែងដំណើររបស់សម្ដេចបានទទួលជោគជ័យពិតប្រាកដ ដោយភាគីឡាវបានសម្រេចដកទ័ពចេញពីទឹកដីកម្ពុជាតាមការស្នើរបស់សម្ដេច ពោលគឺនៅមុនពេលនៃឳសានវាទមកដល់ទៀតផង។ សម្ដេចតេជោ ហ៊ុន សែន ក៏បានព្រមាន ចាប់ខ្លួនអ្នកធ្វើអត្ថាធិប្បាយទាំងឡាយ ដែលបានចោទប្រកាន់ថា សម្ដេចយកបញ្ហាព្រំដែនរវាងប្រទេសកម្ពុជា និងឡាវ ដើម្បីកេងយកចំណេញនយោបាយសម្រាប់គណបក្សប្រជាជនកម្ពុជា ព្រោះជាបទល្មើសជាក់ស្ដែងត្រូវទទួលខុសត្រូវចំពោះមុខច្បាប់។
រូបភាព៖ លោកនាយករដ្ឋមន្ត្រី ហ៊ុន សែន និងប្រធានាធិបតីឡាវ។ (រូបភាពពី Facebook Samdech Hun Sen)
បើតាមសម្ដេច ហ៊ុន សែន កម្ពុជាជាមួយឡាវបោះបង្គោលព្រំដែនជាមួយគ្នាបាន៨៦%ហើយ ដោយផ្អែកលើផែនទីខ្នាត១លើ១រយពាន់ និងកំពុងតែបន្តការចរចារ ដើម្បីឈានទៅសម្រេចផែនការ។ ចំពោះភាពចម្រូងចម្រាសដែលបានកើតឡើងកន្លងមក គឺដោយសារការយឺតយ៉ាវនៃថ្នាក់ក្រោមរបស់ឡាវ ពោលគឺរដ្ឋមន្ត្រីក្រសួងការពារជាតិឡាវ មិនបានបញ្ជួនលិខិតរបស់សម្ដេចទៅនាយករដ្ឋមន្ត្រីរបស់គេនោះទេ ធ្វើអោយខកខានមិនបានឆ្លើយតប។
ម្យ៉ាងទៀតថា លោក ថង លុនស៊ីសូលីត ក្ដាប់មិនបានសភាពការណ៍ខាងក្រោម ព្រមទាំងមានការយល់ច្រឡំចំពោះផែនទីដោយមិនបានយកខ្នាត ១លើ១០០ពាន់ ប៉ុន្តែបែរជាយកខ្នាត ១លើមួយលានទៅប្រើ ធ្វើអោយមានការយល់ច្រឡំហើយធ្វើអោយឆ្លងចូលដីកម្ពុជាជាង ៤៩១ គីឡូម៉ែត្រការ៉េ។ ទោះបីជាយ៉ាងណា ភាគីទាំងពីរបានដកទ័ពចេញអស់ហើយ ព្រមទាំងបានសន្យាគ្នាមិនអោយរឿងដដែលនេះកើតឡើងទៀតនោះទេ។ សម្ដេចតេជោ ហ៊ុន សែន ស្នើអោយពលរដ្ឋស្ងប់ចិត្ត និងជឿជាក់លើរាជរដ្ឋាភិបាល ក្នុងការដោះស្រាយបញ្ហាព្រំដែនជាមួយប្រទេសជិតខាង។
រូបភាព៖ លោកនាយករដ្ឋមន្ត្រី ហ៊ុន សែន និងប្រធានាធិបតីឡាវ។ (រូបភាពពី Facebook Samdech Hun Sen)
ជុំវិញបញ្ហាព្រំដែននេះផងដែរ សម្ដេចតេជោ ហ៊ុន សែន កាលពីព្រឹកមិញ បានបង្ហាញនូវប្រតិកម្មចំពោះប្រធានគណបក្សអំណាចខ្មែរលោក សូន សេរីរដ្ឋា ដែលបានចោទប្រកាន់មេទ័ពខ្មែរថា ជាមេទ័ពចោរ ដែលសម្ដេចចាត់ទុកថា ជាការប្រមាថធ្ងន់ធ្ងរ ដល់កងទ័ពជាតិដែលមិនអាចទទួលយកបាន។ សម្តេចបញ្ជាក់ថា ចាត់ទុកជាសំណាងហើយ ដែលលោក សួន សេរីរដ្ឋា ត្រូវបានចាប់ខ្លួនកាលពីម្សិលមិញ ម្ល៉េះសមមានគ្រោះថ្នាក់ដោយសារតែកំហឹងកងទ័ពក៏ថាបាន។ សម្ដេចបានគួសបញ្ជាក់ថា លោក សួន សេរីរដ្ឋា មានទោសផ្សេងទៀត ដែលធ្ងន់ធ្ងរជាងការញុះញង់ប្រមាថ ដល់កងទ័ពថាជាចោរ នោះគឺការប្រមាថដល់អង្គព្រះមហាក្សត្រ ហើយបើមេបក្សរូបនេះ ប្រព្រឹត្តខុសធ្ងន់ធ្ងរបែបនេះ គណបក្សអំណាចខ្មែរអាចត្រូវរំលាយ។
ដោយឡែកចំពោះការប្រើប្រាស់អំណាចជានាយករដ្ឋមន្ត្រីក្នុងការបញ្ជាទ័ព ត្រូវបានសម្ដេចចាត់ទុកថា ជារឿងត្រឹមត្រូវ ដោយមិនបានបញ្ជា ក្នុងនាមជាប្រធានគណបក្សប្រជាជនកម្ពុជានោះទេ។ ម្យ៉ាងទៀត កងទ័ពបង្កើតឡើងដើម្បីការពាររដ្ឋ ហើយពន្ធធនាគារបង្កើតដើម្បីដាក់អ្នកប្រព្រឹត្តខុស។ សម្ដេចថា ប្រសិនបើបញ្ជាទ័ពមិនបានទេ កុំធ្វើជានាយករដ្ឋមន្ត្រី ហើយនៅក្នុងកាលៈទេសៈនេះ សម្ដេចត្រូវពង្រឹងអំណាចក្នុងការបញ្ជាទ័ព ដើម្បីបញ្ចៀសបដិវត្តន៍ពណ៌៕
ប្រភព៖ PNN News
.jpg)
.jpg)
