ថ្ងៃអង្គារ៍ ទី២៧ ខែកុម្ភៈ ឆ្នាំ២០២៤

នៅម្នាក់ឯង ៩ឆ្នាំហើយ សុខ ស្រីនាង នៅតែមិនទាន់រកដៃគូថ្មីម្ដងទៀត!

០៤ មិថុនា ២០២១ | កម្សាន្ដ

តារាចម្រៀងសប្បុរស្រអែម សុខ ស្រីនាង បានបែកបាក់ជីវិតគូអស់ពេល ៩ ឆ្នាំហើយ តែនាងនៅមិនទាន់រកបានគូស្រករថ្មីទៀតនោះទេ បើទោះបីជាមិត្តភក្តិរួមជំនាន់បានរៀបការនិងមានកូនចៅជាបន្តបន្ទាប់ ។ 

 

 

តារារួមជំនាន់បានរៀបការ និងមានកូនចៅជាបន្តបន្ទាប់ ប៉ុន្តែតារាចម្រៀងស្រគត់ស្រគុំ សុខ ស្រីនាង បែរជាសុខចិត្តនៅម្នាក់ឯង មិនទាន់ប្រាថ្នាជីវិតគូជាលើកទី ២ ក្រោយបែកបាក់គ្រួសារអស់រយៈ ពេល ៩ ឆ្នាំ ។

 


តារាចម្រៀងរូបនេះ មានឈ្មោះជាមេម៉ាយរយៈពេល ៩ ឆ្នាំមកហើយ តែនាងហាក់មិនខ្វល់ខ្វាយពីជីវិតគូស្រករជាលើកទី ២ ឡើយ។ ផ្ទុយទៅវិញនាងបែរជារីករាយជាមួយជីវិតនៅម្នាក់ឯង និងធ្វើការរកប្រាក់ចិញ្ចឹមជីវិតដោយខ្លួនឯងផ្ទាល់។

 


ជាក់ស្តែងរាល់ពេលទៅចូលរួមកម្មវិធីជួបជុំម្តងៗ តារាចម្រៀងរូបនេះតែងតែទៅម្នាក់ឯង ខុសប្លែកពីមិត្តភក្តិផ្សេងទៀតបណ្តើរដៃគូទៅចូលរួមយ៉ាងត្រសង ។ ចំពោះរឿងជ្រើសរើសជីវិតគូជាថ្មីនេះ  សុខ ស្រីនាង បញ្ជាក់ថា ការរស់នៅម្នាក់ឯង មិនមែនជារឿងអាក្រក់នោះទេ សំខាន់យើងចេះរកសេចក្តីសុខឱ្យខ្លួនឯង ។ 

 


ទោះបីជា សុខ ស្រីនាង ជាតារាចម្រៀងស្រគត់ស្រគុំ តែនាងមានមន្តស្នេហ៍មិនធម្មតាទេ មានបុរសក្នុងនិងក្រៅប្រទេសជាច្រើនស្រឡាញ់ពេញចិត្ត ចង់បាននាងធ្វើជាគូ គ្រាន់តែនាងមិនព្រមជ្រើសរើស យកនរណាម្នាក់មកធ្វើជាគូប៉ុណ្ណោះ ដោយសារនាងខ្លាចជួបរឿងបែកបាក់ដូចជាស្នេហាដំបូង ។ ចាប់តាំងបែកបាក់ស្នេហ៍មក សុខ ស្រីនាង មិនធ្លាប់ពើបប្រទះរឿងអាស្រួវស្នេហាទៀតឡើយ ។ 

 


មកទល់ពេលនេះ សុខ ស្រីនាង បានប្រលូកក្នុងសិល្បៈរយៈពេលជាង ១៦ ឆ្នាំហើយ នាងបានចូលច្រៀងក្នុងផលិតកម្មជាច្រើន តែចុងក្រោយនេះនាងច្រៀងនៅក្នុងផលិតកម្ម រស្មីហង្សមាស ដែលមានបទចម្រៀងល្បីៗជាច្រើនកំពុងអង្រួញបេះដូងយុវវ័យ មិនតែប៉ុណ្ណោះនាងធ្លាប់សម្តែងនៅក្នុងរឿង « រាជនីភូមិគ្រឹះ » និងរឿង « ខ្ញុំមានញាណលើស » ។

 

 

ស្នាដៃទាំងពីរនេះធ្វើឱ្យ សុខ ស្រីនាង កាន់តែលេចធ្លោខ្លាំងក្នុងវិស័យសម្តែង  ឆាប់ៗខាងមុខនេះ សុខ ស្រីនាង នឹងលេចមុខនៅក្នុងរឿងថ្មីមួយទៀតផងដែរ ៕ 

 

 

អត្ថបទ ៖ ម៉ា រីសា រូបភាព ៖ ឯកសារ និង ហ្វេសប៊ុក

 

ព័ត៌មានដែលទាក់ទង

© រក្សា​សិទ្ធិ​គ្រប់​យ៉ាង​ដោយ​ PNN ប៉ុស្ថិ៍លេខ៥៦ ឆ្នាំ 2024