ថ្ងៃច័ន្ទ ទី១៦ ខែមិថុនា ឆ្នាំ២០២៥
ថ្ងៃច័ន្ទ ទី១៦ ខែមិថុនា ឆ្នាំ២០២៥
ភោជនីយដ្ឋានឈ្មោះ ETEN នៅប្រទេសហុល្លង់បានបង្កើតសេវាញ៉ាំអាហារខាងក្រៅបែបទំនើបសម្រាប់សម័យកូវីដ១៩ ដោយបានរៀបចំស្តង់កញ្ចក់ថ្លាសម្រាប់មនុស្សពីរនាក់អាចញ៉ាំអាហារគយគន់ទេសភាពក្នុងទីក្រុង។
អ្នករត់តុច្រើននាក់ដែលពាក់ស្រោមដៃ និងរបាំងការពារមុខថ្លាៗ បានប្រើបន្ទះក្តារវែងដើម្បីនាំចានម្ហូបចូលក្នុងស្តង់កញ្ចក់ដើម្បីធានាបាននូវការទាក់ទងផ្ទាល់ជាមួយអតិថិជនតិចបំផុត។
ខណៈពេលដែលគំនិតនេះដំបូងត្រូវបានសាកល្បងសម្រាប់តែគ្រួសារនិងមិត្តភក្តិរបស់បុគ្គលិកនៃភោជនីយដ្ឋាន ETEN ប៉ុន្តែវាក៏បានធ្វើឲ្យមហាជនជាច្រើនចាប់អារម្មណ៍ដោយសារអាហារពេលល្ងាចនេះមើលទៅពិតជារ៉ូមែនទិកក្រោមពន្លឺទៀន និងទេសភាពមាត់ទឹក។
ខណៈដែលវីរុសកូវីដ១៩បានឆ្លងដល់មនុស្សជាង ៤ម៉ឺននាក់ និងសម្លាប់មនុស្សជាង ៥ពាន់នាក់ក្នុងប្រទេសហុល្លង់ភោជនីយដ្ឋាននានានៅប្រទេសនេះត្រូវបានបិទទ្វារជាសាធារណៈរហូតដល់ថ្ងៃទី ១៩ ខែឧសភាតែភោជនីយដ្ឋានខ្លះអាចបើកលក់សម្រាប់តែការកុម្ម៉ង់ខ្ចប់ទៅផ្ទះ។ សមាគមភោជនីយដ្ឋានហុល្លង់ហៅកាត់ KNH បាននិយាយថាបើទោះបីជាភោជនីយដ្ឋានត្រូវបានអនុញ្ញាតឱ្យបើកឡើងវិញដោយត្រូវអនុវត្តវិធានការណ៍សុវត្ថិភាពបែបនេះក៏ដោយ ប៉ុន្តែមានហាងជាច្រើនប្រឈមនឹងការខាតបង់ហិរញ្ញវត្ថុធ្ងន់ធ្ងរ ប្រសិនបើការរឹតបន្តឹងនៅតែមាន ៕
ប្រែសម្រួល៖ វ៉ាន់ថន
